Ba beè naa gbò togó bel nè vídiò ea di boo túá náásĩ́ ló bẹẹ website kọbé à léémá gbò e bà íe lé bùlà e bà gáà du Gbò Neǹ Ditõ̀ò Jìhóvà. (Tóm 13:48) À ólò bọ̀ọ̀gẹ̀ ló bel ea kil ló gbò nú ea di boo níùz àbèè nú e gbò nen gé bugi togó boo vaá ló bel kilma ló.

Mósĩ́ deè ní eo é láá tú túá náásĩ́ ea di boo jw.org siimá tóm tṍó eo gé kọ́ kpẹ̀a ẹ́?

• Olòó ẹ̀b boo websiteí lee. Nvèè kpíi ló gbò nú e bà ã́àa tẹlẹ boo, vaá ò bugi togó boo bé eo é láá nvèèmà bá nè nen ea íe lèèma naa. (Kọbé ò mon dõona kà gbò nú e ba beè ãàa tẹlẹ boo túá náásĩ́í, naa klíìk boo “See More.”) Ge olòó ẹ̀b gbò nú e bà ã́àa tẹlẹ boo websiteí lee, é nveè bá naa kọ ó nyimá gbò ãa nu gè ló bel boo tṍó eo gé kọ́ kpẹ̀a.

• Tú gbò togó bel nè vídiò ea di boo túá náásĩ́í dààmà togó loa sọ́l. Gbò nú e bà ólò nvee boo bẹẹ websiteí é láá naa kọ é nyimá nú e gbò e bà di kĩée e ólò kọ́ kpẹ̀a gé bugi togó boo.

• Tú túá náásĩ́í zogè gbò nen. Ló bel boo sìgà togó bel, vaá ò zógè nená bé ea é láá gbĩ́ nú boo websiteí naa.

• Lẹ̀ẹ̀là líǹk. Náa ólò valí ló sìgà nen gè zọ̀i loá bel sĩ́ nè sĩ́, sõò à ólò leemá va gè bã boo bẹẹ website. Vóà naa, ó gá aa ló gè lẹ̀ẹ̀là líǹk ea é tú nen tẹlẹ boo túá náásĩ́ ló bẹẹ website àbèè líǹk ea kil ló ene kà togó bel àbèè vídiò ea di kĩá má nen ea íe lèèma.