Ló January 2021, Gbò Ge Tulè Tóm beè nè gã́ kọ bà túè ene kà nuù tóm gè noomá Kpá Káí ea dú kpá ea kọlà Dé Kpéè Ló Dùm Dọ̀ọ̀mà Dè-dè! a tẹlẹ bàlà kẽ. Nè gã́á beè tọá ló olo naa vàẹ? Matthew ea dú Canada kọ́ọ̀: “Nyíém beè palàge ẹẹ! Bọọ èlmà tõ̀ò, tṍó e bà ne lòbèl vaá zogè vídiò ea baatẽ́ nú ea náa bà naa nakà kpáí nè bé e ba ni tú siimá tóm naa. A beè palàge tànim gè mòn vaá tú nakà kpáí siimá tóm.”

 Kpá ea kọlà Dé Kpéè Ló Dùm Dọ̀ọ̀mà Dè-dè! tú ãa sĩ́deè ge noomá Kpá Káí tẹlẹ bàlà kẽ. Sõò, níá níì áá kele ea di zẹ̀ẹ̀ nakà ãa kpáí nè dõona kà gbò kpá e beè olòó noomá Kpá Káí é nì. Be ò gé tú kpá ea kọlà Dé Kpéè Ló Dùm Dọ̀ọ̀mà Dè-dè! e ba beè naa príǹt siimá tóm, òé láá mòn kọọ̀ níí dú kele ló dõona kà gbò kpá gè noomá Kpá Káí. Kọbé è mon kele ea di ló nakà kpáí, naanii èé kpáá palàge ẹ̀b bé e ba beè naáe naa.

 Báà kpá e bà náámá bọọ́ gbe. Éé ní ea náa bà naáe naa vó é? Kpá ea kọlà Dé Kpéè Ló Dùm Dọ̀ọ̀mà Dè-dè! íe nú ea é sígá ló 600 fùtó, ea é láá sigá ló òb tóm gbò ní ea di mm̀ kpá ea kọlà Éé Ní E Kpá Káí É Láá Noòmài Ẽ́? Ãa kpáí íe nagé gã́bug kiẽ́e ba náa tã́ nu àbèè ge emí nu. Pálàa kà nuí ní ea náa vaá beè báà kpá e bà naamá náa beè dú gbe, gbò nú e bà tã́ boo dõona kà náásĩ́ gáẹ̀ beè sila boo dõona kà náásĩ́ ẽ́. Kọbé náa nááá naa vó, pá vígà e bà ólò sí tóm International Printing Department (IPD), ea di Wallkill, New York, U.S.A. beè dò ténì kà kele-kele íb báà kpá e ólò naamá príǹt bẹẹ gbò kpá. Writing Committee Gbò Ge Tulè Tóm beè ẹ̀b buù kà báà kpáí vaá sà ní ea palàge bọọ́ gbe ea di zẹ̀ẹ̀. Náa kal ló béè kọọ̀ nakà báà kpáí palàge sí kpègè èl ní e ólò bọọ̀gẹ̀ naamá dõona kà bẹẹ gbò kpá, à nveè bá kọọ̀ gbò e bà gé nó Kpá Káí á láá bugi buù kà náásĩ́ ea di ló kpá ea kọlà Dé Kpéè Ló Dùm Dọ̀ọ̀mà Dè-dè! e fùtó ea di dõona kà náásĩ́ náa é mááná ba bùlà lọl ló nú e bà gé bugi.

 Bà tú kele íb kóó nvee nvée. Kóó nakà kpáí dú kele ló kóó dõona kà bẹẹ gbò kpá boo béè kọọ̀ ba beè tú dõona kà nú ea é kpenà kọ̀lmà. Bà tú nu gè kọ̀lmà kpá e náa ólò bọọ̀gẹ̀ mò naamá, vó ní ea náa kọọ̀ nú e bà tã́ boo á palàge sìlàẹ. Nú e bà kọl lóí náa kọọ̀, kọbèè nen gé tú kpáí siimá tóm lee á gá vàlẹ̀ bá kyọ̀à. Náa kal ló béè vó, nakà nu gè kọl ló kpá e bè náa ólò mòí sí kpègè vòò tóm gbò èl ní ea ólò mò. Gã́bug tọ nàà tóm beè gbá siá tóm kọbé bà láá zalí nu gè kọl ló kpáí naaní e bàé láá ié ní ea sí ńkem̀ kpègè.

 Éé ní ea náa bà sà ge tú gbò nú ea palàge sí kpègè naamá kpáí é? Ene kà vígà págbálà ea ólò zọ̀ pá IPD siá tóm kọ́ọ̀: “È ẹbmà dẽe kọọ̀ bàé palàge tú kpáí siimá tóm, vóà naa è gbĩ́ì kọọ̀ á di õ̀òa kọ̀láá bé e bà gé tú siimá tóm gã́bug tṍó naa.” Eduardo, ea ólò sí tóm tọọ̀ tóm kiẽ́e bà ólò naa príǹt kpá ea di Brazil kọọ̀: “Nyíéi palàge ẹẹ gè mòn bé e bõ̀ònatõ̀ò Jìhóvà tú gbò nú ea palàge dú lé naamá kpáí naa naaní ea dú lé, aga ló vaá leé bá nen, boo tṍó e bà gé tú nágé bẹẹ gbò lọ̀là-lọ̀là siimá tóm boo lé bá.”

 E beè dààmà togó gè naa príǹt Dé Kpéè Ló Dùm Dọ̀ọ̀mà Dè-dè! ló March 2021. Níí beè naaá tṍó COVID-19, vaá vó beè naa kọọ̀ é ié gã́bug ànà-ànà. Boo béè kọọ̀ e beè kùbgì bẹẹ gbò Tọ Nàà Tóm kọbé gbò nen náa bã́ m àbèè ge aa m, gbò e bà ólò naa príǹt bẹẹ gbò kpá náa beè ié ná nvèè bá ea aa bá pá vígà e bà ólò aa kèdẹi gé nvèè bá ló tóm, vaá Tọ Nàà Tóm náa beè láá kolí nágé ãa gbò e bàé sí tóm Bẹ́tẹẹ̀l. Vó beè naa kọọ̀ é gá ié gã́bug gbò e bàé sí tóm gè naa príǹt bẹẹ gbò kpá, boo tṍó e ba beè kùb sìgà kiẽ́e e ólò tõo naa príǹt bẹẹ gbo kpá boo béè tùle ea aa bá kpóó ea gé bẹl.

 Mósĩ́ deè ní e ba beè bé èlbá gbò nu ànà-ànàí ẽ́? Tṍó e bà kpáá láá dààmà togó gè naa príǹt kpá, ba beè kọọ̀ pá vígà e bà ólò sí tóm dõona kà gbò tọọ̀ tóm ea di Bẹ́tẹẹ̀l á nvèè bá ló tóm gè naa príǹt kpá. “Ba gè tú lóó vaamá gyọ́ọ nè ge di kpènà ló gè sí ãa tóm e bà né vaí ní ea náa kọ é láá sí gbò tómí ẽ́,” níà nú e Joel ea ólò zọ̀ pá IPD siá tóm kọ́ẹ́.

 Náa kal ló béè kọọ̀ e beè kpeesĩ́ ló gbò ànà-ànàí, e náa príǹt gã́bug gãà kpá ea kọlà Dé Kpéè Ló Dùm Dọ̀ọ̀mà Dè-dè! È íè bíi ló gã́bug kele-kele íb nuù tóm dì belí báà nu e bà ólò naamá príǹt kpá, báà nu e bà ólò kọl ló kpá, báà kpá, ink, nè góm̀ kọbé è láá naa kpáí. Mm̀ kóló vòò ẽ́, e beè tú nú ea é sígá ló $2.3 million (U.S.) zalmá áá nu gè naamá kpáí. Kọbé è láá kùmà sìgà kpègè, è ólò naa Príǹt áá gã́bug e gbò bõ̀ònatõ̀ò íe bíi ló.

 Nakà kpá gè noomá Kpá Káíí tọ́á ló gbò e bà ólò nò nè gbò e bà ólò noòmà naa vàẹ? Paul, ea dú ene kà vígà págbálà ea di Australia kọ́ọ̀: “Kpá ea kọlà Dé Kpéè Ló Dùm Dọ̀ọ̀mà Dè-dè! ólò palàge leemám naaní ea ólò tànim gè noòmà gbò nen. Bé e bà náa kpáí naa kpé ló vaá náa kọọ̀ á palàge valí gè zọ̀ nen eo gé noòmà nu loá bel. Bà émí kpáí mm̀ sĩ́deè e gbò bíb, vídiò, fòtó, tã́ànu, nú e nen ea gé nó é sẹẹ̀a sĩ́ nè gbò nú e bà émí m gbááá ló ene vaá õ̀òa tẽ́. À dú kpá ea íe kele-kele íb nu gè ẹ̀b ea náa kọ ḿ láá sìm kilsĩ́ mm̀ gè noòmà nu.”

 Ene kà nvín págbálà ea gé nó Kpá Káí gbẹá United State kọ́ọ̀: “Nakà ãa kpáí palàge leemám. Gbò nú e bà tã́ m nveè bá nèm kọ ḿ dã́ ból ló gbò gá ea dú bíi. Gbò vídiò ea di m ólò tọá ḿ ló vaá naa kọ ḿ naa nú ea dú bíi.” Nvín págbálàí ólò nó nu bàà tóm buù sè vaá à ólò si nágé dénè bẹẹ gbò nònù.

 È íè bíi ló gè naa príǹt gã́bug gãà kpá ea kọlà Dé Kpéè Ló Dùm Dọ̀ọ̀mà Dè-dè! mm̀ gã́bug dém bel. Kàsĩ́, kátogóí Gbò Ge Tulè Tóm a ténmá kọọ̀ á dú gè tàb kpáí nvee mm̀ 710 dém bel, boo tṍó e ba beè tenmá kọọ̀ á dú gè tàb kpá ea kọlà Éé Ní E Kpá Káí É Láá Noòmài Ẽ́? nvee mm̀ 340 dém bel.

 È ólò naa và láá ié kpègè eé kpẽ́ ló gbò kpá e gé náa príǹt e? È ólò ié tení dú ló gbò lọ̀là-lọ̀là e bà ne nyòòmà sìtóm kọ̀ kpẹ̀a ea gé síá beeá ló bàlà booí, e ba ólò nè gã́bug tenmá boo donate.pr418.com. Nyíéi ẹ́ẹ́ ló bọọ gè dõonii nu taalẹi bá, ea nveè bá naa kọ é láá naa gbò kpá gè noomá Kpá Káí kọbé à nveè bá nè gbò e bà gbĩ́ gè nó nú ea kil ló Jìhóvà vaá “dé kpéè ló dùm dọ̀ọ̀mà dè-dè.”​—Psalm 22:26.