Gbò Nen Jìhóvà ólò sí gã́bug tóm gè nvèèmà bá nè gbò nen mm̀ nú ea é sígá ló 200 kpò kunukẽ̀. Sõò, áá nú ea é láá dú 35 kpò kunukẽ̀í ní e bà ólò ié lọ̀là-lọ̀là ge ẹ̀bmà nú ea kiló bà tóm tení baláa lòlà-lọ̀là e. È ólò naa và láá ié kpègè ge ẹ̀bmà nú ea kil ló tóm ea gé síá gbẹá gbò dó e bà náa bọọgẹ̀ ié kpègè e?

 Gbò Ge Tulè Tóm Gbò Neǹ Ditõ̀ò Jìhóvà ólò ẹ̀b nú ea kil ló bé e pá vígà é láá ié kà lé gbaa ló kilma ló Jìhóvà, nè ba sìtóm kọ̀ kpẹ̀a beeá ló bàlà booí. Bà ólò palàge tú ọ̀ẹ̀ dẽe nòòmà nú ea kil ló kpègè e bàé síímá tóm naa ní ea é síá tóm boo bá ea bọ́ló. Be tọ nàà tóm íe gã́bug kpègè ea é sígá ló tóm ea gé síá gbẹá enè ketõ̀ò, bà ólò gbóó tú gbò kpègè a sígá lóá nvèèmà bá tóm kiẽ́e e bà náa íe gbele tõ̀ò kpègè. À dú gè noo nakà nòònùí mm̀ ge nó nu dòòmà bá gbò nyòòne nvéè Kráìst mm̀ túá gbò gbááá, e ba beè nvèè bá nè ene “kọ bé tṍó e baala é íé gã́ bug vaá boolo ò iei ńkem, baala láá nvèènà gé bá nè boolo.” (2 Kọ́rìnt 8:14) Ba beè nvèè bá nè gbò níí Kráìst e bà náa beè ié gã́bug nu.

 À ólò tõó ló pá vígà e dõòna kà tọ nàà tóm tú kpègè ea sígá ló ba tóm nvèèmà bá nè va naa vàẹ? Dì belí nu dòòmà bá, gbẹá dó Tanzania kiẽ́e e gã́bug ọ̀và ólò tú nú ea é kil kẽ èl bàà kà dọ́là tõ̀òma dùm buù dee, bà beè tú gbò kpègèá siimá tóm ló Kíndòm Họ́ọ̀l e bõ̀ònatõ̀ò e tõó mm̀ sí nònù gbẹá Mafinga. Pá bõ̀ònatõ̀òa beè emí kọọ̀: “Tã́gíní tṍó e ba beè sí tóm ló bẹẹ Kíndòm Họ́ọ̀l, gã́bug nen a kpáá zọ̀i sí nònù! È palàge õá bõ̀ònatõ̀ò Jìhóvà nè pá vígà zaa ló ba gè nè nu taalẹ bá, ea nveè bá nèi kọ é láá ié kà lé tọ gè tõó m nè fã̀ Jìhóvà.”

 Sìgà pá vígà e bà di Sri Lanka a mon tã̀àgã̀ bá kíì gyã́á boo béè pọ́lọ́ kom ea kọlà COVID-19. Vígà pábià Imara Fernando nè a nvín págbálà ea kọlà Enosh, di gbàà gbò e kíì gyã́áí íná ló. Nyíéi ẹ́ẹ́ ló gbò lọ̀là-lọ̀là ea aa dõòna kà dó ea náa kọ é láá nvèè bá nè va. Bà émí nú dẽè kélè kpá kọọ̀: “È ṍài zaa e pá vígà ló vulè eo íèèí ló mm̀ nakà tàvàlà tṍóí. Nyíéi palàge ẹẹ kọ è dṹùnà nakà pá tọí, vaá è gé kilsĩ́ gè tã̀àgã ló Jìhóvà kọ á nvèè bá nè dénè pá vígà mm̀ gbò deé e tṍó é gé tàí.”

 Kọ̀láá kiẽ́e e pá vígà dì, bà ólò di kpènà ló gè dõo gbò nú e bà íe. Dì belí nu dòòmà bá, Enosh beè naa ńkem̀ kpó ea é ólòó kumà kpègè sẹlẹ́ m kọbé à láá nveè nàé gé bá nè pá tọ e bíi di. Vígà pábià Guadalupe Álvarez íe nagé tẽ̀ènè íb dùm ge dõonu taalẹ báí. A ólò tõó dó Mexico kiẽ́e gã́bug nen náa ólò dé tõ̀ò kpègè ló ẽ́, boo tṍó e sìgà nen náa ólò zẹ́ẹ́ dé tọ́ọ̀ kà kpègè ló ẽ́. Sõò, a beè nè lọ̀là-lọ̀là e báẹ sim tùlà. À émí kọọ̀: “M̀ ṍà Jìhóvà zaa ló bé ea dú lé naa nè a vulè ea kyãa mm̀ bọ́ọ̀ló dẹ̀lẹ̀ nyíé boo. Nda nyímà kọọ̀ ńdáà kpègè é dọ́ dẽè lọ̀là-lọ̀là dõòna gbò e bàé nvèèmà bá nè pá vígà.”

 À ólò ẹẹlẹ̀ nyíè pá vígà e bà di dõòna kà tọ nàà tóm tṍó e bà lẹẹlà kpègà má gbò e bíi di ló. Anthony Carvalho ea dṹùnà Branch Committee kọ́ọ̀: “Mm̀ gã́bug gbáá, e beè ié bíi ló nvèè bá ea aa bá pá vígà e bà di dõòna kà gbò dó kọbé è láá kilsĩ́ gè sí gè bẹẹ tóm. Gbò nvèèbáí beè naa kọọ̀ tómí á láá siá leevè. Kátogóí, bẹẹ dìtõ̀ò a nyááá naa ní e ni láá ié sìgà kpègè ge nvèèmà bá nè dõòna gbò. Pá vígà e bà di Brazil mon bé e sìtóm kọ̀ kpẹ̀a gé síá beeá ló bàlà booí naa, vaá mòn bé e bà láá nveeniè bá dì belí gbò nyòòne nvéè Jíízọ̀s e bà ólò tú lóó vaamá gyọ́ọ naa.”

 Mókà lé sĩ́deè ní e Gbò Neǹ Ditõ̀ò Jìhóvà ólò nvèèmà bá nè pá vígà e bíi di ló é? Buù nen náa ólò lẹ̀ẹ̀là kpègè tẹlẹ tọ nàà tóm ea di dõòna kà dó, sõò bà ólò nè lọ̀là-lọ̀là ge nvèèmà sãa kúm sìtóm kọ̀ kpẹ̀a ea gé síá beeá ló bàlà booí. Bà ólò tú gbò lọ̀là-lòlàí tẹlẹ mm̀ gbò kpó e bà émí “Worldwide Work” ló ea di buù kà bõ̀ònatõ̀ò àbèè bà ne tenmá boo donate.pr418.com. Nyíéi palàge ẹẹ́ ló gbò lọ̀là-lọ̀làí.