Jíízọ̀s beè kọ́ nè pá a gbò nyòòne nvée kọọ̀: “Bàrì é néi kpóó e a é náa kọ ó láá elai nen di tõ̀ò nèm̄i . . . [imá] kùbmà bàlà booí.” (Tóm1:8) Deè nieí, Gbò Neǹ Ditõ̀ò Jìhóvà dì e bà gé tú bẹ̀à sã́ bùlà siimá nakà tómí. Náa kal ló béè vó, à íe sìgà ketõ̀ò ea di bàlà booí, bã̀àna kiẽ́e e gbò nen bọọ e lé kpẹ̀aí gáà ina. Pọ́ì ńkem̀ gbò kọ̀ kpẹ̀a ní e bà di sìgà dó é. (Máátìù 9:37, 38) Éé ní e gé náa kọbé è láá kọ́ kpẹ̀a nè gã́bug nen imá kiẽ́e e bẹẹ kpóó sim tùlà ẹ?

 Kọbé è láá sí tóm e Jíísọ̀s beè nèií, Service Committee Gbò Ge Tulè Tóm Gbò Neǹ Ditõ̀ò Jìhóvà ólò lẹ̀ẹ̀là gbò ge kọ́ kpẹ̀a aa dó dọ dó kilma gbò kiẽ́e e bíi bọọ beeá ló bàlà booí. Kà lèlà kátogóí, è íè nú ea é dú 3,090 neǹ ge kọ́ kpẹ̀a aa dó dọ dó e bà dì beeá ló bàlà booí. a Gã́bug ọ̀và beè sí tọọ̀ kpá e bà ólò noòmà Kpá Káí, ea dì belí Tọọ̀ Kpá Ea Dì Nè Gbò E Bà Gé Vee Kpẹ̀a Boǹ Méné. Gbò kọ̀ kpẹ̀a aa dó dọ dóí ólò di kpènà ló gè aa ba be kil dõòna kà dó. Boo béè bé e gbò kọ̀ kpẹ̀a aa dó dọ dó e bà bọ́ló dẹ̀lẹ̀ nyíé booí íe agẹ ló mm̀ ge fã̀ Bàrì naa, gbò búma e ba ni íe, nè gbò nú e ba ni téní bá a nveè bá kọ bàá vee lé kpẹ̀aí vaá gbẹẹ lé nu dòòmà kẽ sẹ̀ẹ̀ ãa gbò e bà gé nyoone nvéè Kráìst.

 Gbẹá tọ nàà tóm, Field Ministers Desk ea dṹùnà Service Department ólò zọ̀ Branch Committee siá tóm mm̀ ge ẹ̀b nú ea kil ló bíì gbò e bà ólò kọ́ kpẹ̀a aa dó dọ dó, dì belí gè ẹ̀b nú ea kil ló tọ́ e bàé tõó m, ba válá kpá ló, nè ńkem̀ kpègè e bàé láá naamá ba bíi. Mm̀ gbáá 2020 a, Gbò Neǹ Ditõ̀ò Jìhóvà beè tú nú e sigè ńkem̀ à tóólá $27 million (U.S.) ẹ̀bmà nú ea kil ló gbò e bà ólò kọ́ kpẹ̀a aa dó dọ dó. Nyíéi ẹ́ẹ ló gbò lọ̀là-lọ̀làí, ea náa kọọ̀ gbò e bà ólò kọ́ kpẹ̀a aa dó dọ dó á láá kilsĩ́ gè ká bùlà gbẹẹ́ boo vaá tú ba kói nvee mm̀ sìtóm kọ̀ kpẹ̀aí, nè ge siè kpóó ló pá vígà e bà di ba bõ̀ònatõ̀ò.

 Mósĩ́ deè ní e tóm gbò e bà ólò kọ́ kpẹ̀a aa dó dọ dó palàge nvèè bá mm̀ sìtóm kọ̀ kpẹ̀aí é? Frank Madsen, ea dṹùnà Branch Committee ea di Malawi kọ́ọ̀: “Agẹ ló nè kalì e gbò e bà ólò kọ́ kpẹ̀a aa dọ́ dọ dọ́ íe a nveè bá nè gbò e bà di sìgà bõ̀ònatõ̀ò kọ bàá láá kọ́ kpẹ̀a iná dénè kiẽ́e ea ólò tàvala ló ba bõ̀ònatõ̀ò ge kọ́ kpẹ̀a iná, dì belí gbò be e bà begàgì gònò tenmá ló nè kiẽ́e e bà ólò ló dõòna kà dém bel. Nagé, ba sìà kpóó ló gè nó dém bel e gbò e bà di kiẽ́e e bà ólò kọ́ kpẹ̀a ólò lò, nè bé e gbò e bà di kĩá ólò naa nu naa a dú kà lé nu dòòmà bá nè dõòna gbò, vaá ba lé nu dòòmà bá a síè kpóó ló gbò nvín ãa kọ bàá láá tú dénè ba tṍó siimá tóm nè Jìhóvà. È ṍà Jìhóvà zaa ló gbò e bà ólò kọ́ kpẹ̀a aa dó dọ dó.”

 Enè nen ea dṹùnà Branch Committee ea di dõòna kà dó kọ́ọ̀: “Gbò e bà ólò kọ́ kpẹ̀a aa dó dọ dóí zógè kọọ̀ gbò níí Jìhóvà di mm̀ gbaaló beeá ló bàlà booí. Bã̀àna gbò e bà náa ólò fã̀ Jìhóvà a mon kọọ̀ kiẽ́e e aà dù náa ólò poói, tãa vó nòòmànù ea di mm̀ Kpá Káí a nveè bá nèi kọ é láá gbá tõ̀òa mm̀ gbaaló.”

 Mósĩ́ deè ní e gbò e bà ólò kọ́ kpẹ̀a aa dó dọ dó ólò nvèè bá nè dõòna kà gbò kọ̀ kpẹ̀a ẹ́? Nyíè Paulo, ea dù Timor-Leste beè ẹẹ ló tóm e gbò e bà ólò kọ̀ kpẹ̀a aa dó dọ dó e ba beè lẹ̀ẹ̀là va tẹlẹ ba bõ̀ònatõ̀ò gé sí. À kọ́ọ̀: “Kiẽ́e e beele ólò kọ́ kpẹ̀a ólò palàge bẹ̀à sã́. Sõò gbò kọ̀ kpẹ̀a aa dó dọ dóí aa kiẽ́e e sĩ́ dee ólò palàge dú tọ́ọ, sõò bà náa ólò sọ̀tọ́ deè kọọ̀ níá á òòmà va lọl ló gè kọ́ kpẹ̀a. Bila ló bel ge àà gé kọ́ kpẹ̀a náa ólò tení vá kẽ tọ́ọ̀ dee. M̀ ólò bọ̀ọ̀gẹ̀ mon vá boo fèèbe e gbei gé palàge mò e bà gé sí gé kãa gbò e bà ólò noòmà Kpá Káí, nè boo ló èlà. Baa nveè bá nè gã́bug nen kọ bàá láá nó kà kà bel ea di mm̀ Kpá Káí, bií nágé ló nda. Bà ólò tú dénè ba dùm siimá tóm nè Jìhóvà mm̀ bẹ̀à sã́ bùlà, vaá níí a síè kpóó ló zivèkà bõ̀ònatõ̀ò kọ bàá kpáá sìm kilsĩ́.”

 Ketti, ea dú neǹ gyàdeè sĩ́ tóm ea di dó Malawi baatẽ́ bé e ene kà dóm nè va e bà ólò kọ́ kpẹ̀a aa dó dọ dó beè nvèè bá nè pá a tọ naa. À kọ́ọ̀: “Tṍó e ba beè lẹ̀ẹ̀là ene kà dóm nè va e bà ólò kọ́ kpẹ̀a aa dó dọ dó domá beélè bõ̀ònatõ̀ò, áá nda ní em beè dú Neǹ Ditõ̀ò Jìhóvà mm̀ beélè tọ ẹ́. Sõò dóm nè vaí beè nvèè bá nèm, vaá bã̀àà kóò pá beélè tọ. Ba lé nu dòòmà bá beè nvèè bá nè pá nà nvín kọ bàá nyimá kọọ̀ gè fã̀ Jìhóvà ólò naa kọọ̀ nyíè nen á ẹẹ vaá nè dĩ̀ìnè ló nen. M̀ ṍò zaà gbò e bà ólò kọ́ kpẹ̀a aa dó dọ dóí ló ba lé nu dòòmà bá ea náa kọọ̀ taà kà ńdáà nvín pábia á dú gbò gyàdeè sĩ́ tóm kọ̀ kpẹ̀a, vaá ńdáà dóm a daamà togó gè zọ̀i sí nònù.”

 Éé ní e ólò naa kọbé è láá ié kpègè ge ẹ̀bmà nú ea kil ló gbò e bà ólò kọ́ kpẹ̀a aa dó dọ dó é? Gã́bug nen ólò nè lọ̀là-lọ̀là ge nvèèmà sãa kúm sìtóm kọ̀ kpẹ̀aí tenmá boo donate.pr418.com. Nyíéi palàge ẹẹ ló gbò lọ̀là-lọ̀là eo neì lọaí bùlà.