BÉ E BÀ ÓLÒ TÚ GBÒ O LỌ̀LÀ-LỌ̀LÀ SIIMÁ TÓM NAA
Ge Nvèè Bá Nè Gbò E Ba Nu Kyọa Sĩ́
FEBRUARY 1, 2021
È monì bé e gã́bug bùló kyọ̀à sĩ́ nu nè pọ́lọ́ kom ea kọlà COVID-19 ni tãagẽ gã́bug nen beeá ló bàlà booí mm̀ gbáá 2020 naa. Mósĩ́ deè ní e Gbò Neǹ Ditõ̀ò Jìhóvà ni nveè bá nè gbò e dìtõ̀òí tọ́á ló é?
Kpẹ̀a bé e tóm beè siá naá mm̀ gbáá 2020, a tẹ́lẹ bàlà kẽ kọọ̀ Coordinator Committee ea dṹùnà Gbò Ge Tulè Tóm beè tenmá kọọ̀ bàá tú 28 gãà dollar b nvèèmà bá nè gbò e nu kyọa ló. Níí beè nvèè bá nè nú ea é sígá ló 200 nen e bà géè mòn tã̀àgã̀ ea dú ló bùló kyọ̀à sĩ́ nu—bií nágé ló pọ́lọ́ kom ea kọlà COVID-19, agẹbá ìlìsẽ́, tú múú ea beè naaá Africa, kíì gyã́á ea beè naaá Venezuela, nè tṍó kã́á kãà kẽ e pá Zimbabwe géè tení bá. Ba beè tú gbò lọ̀là-lọ̀làí zalmá gyã́á, múú, kọ̀là ló, biè, sìgà nu gè õ̀òmà ló kẽ, vaá ba beè tú siimá nágé tóm ló tọ, vaá kpáá tìbmà dõòna kà gbò tọ. Nee sìgà nú e gbò kpègèa beè naaáí.
COVID-19. Beeá ló zìvè kà bàlà booí, pọ́lọ́ komí a tãagẽ gã́bug pá vígà págbálà nè pábia mm̀ sĩ́deè e nen monmà dẽe, à néva tã̀àgã̀ bùlà, vaá tú tàvàlà dìtõ̀ò tẹlẹ̀ vá boo. Ba beè nvèè 800 Disaster Relief Committee kẽ beeá ló zivè kà bàlà booí. Gbòí ólò palàge gbĩ́ gè nyimá bíi ea di ló pá vígà vaá kọ́ nè Coordinator Committee ea dṹùnà Gbò Ge Tulè Tóm kọbé bà nyímá kà lé sĩ́deè ge nvèèmà bá nè va.
Mm̀ zivè kà gbááá, Disaster Relief Committeeí beè nvèè bá zalí gã́bug gyã́á, múú, gbò nu gè õ̀òmà ló kẽ, nè biè. Gbẹá sìgà ketõ̀ò, Disaster Relief Committeeí ólò zọ gbò kànen e bà di buù kà bõ̀ònatõ̀ò siá tóm kọbé bà láá ié nvèè bá lọl bá kpóó ea gé bẹl.
Gbò e bà náa ólò sí nònù a mon bé e gé nveè bá nè gbò e búù ló kyọ̀à sĩ́ nu nááa vá ló naa. Dì belí nu dòòmà bá, Field Simwinga, ea dú enè kà pọ̀b nen ea gé bẹl Nakonde, ea di Zambia, beè kọ́ nè pá vígà kọọ̀: “È palàge õai zaa ló bé eo nveenìì bá kà lèlà tṍó ea bọ́ló nei pá tọ e bù ló kyọ̀à sĩ́ nu nááá ló naa.”
Kíì Gyã́á Ea Beè Dọ Angola. Pọ́lọ́ kom ea kọlà COVID-19 beè naa kọọ̀ gyã́á á ĩá, naa ní e kùbmà gyã́á e bà íé sí kpègè. A beè tàvala ló gã́bug pá vígà ge láá zalí gyã́á ge dè.
Ba beè lẹ̀ẹ̀là bẹ̀lẹ̀-bẹ̀lẹ̀ gyã́á lọl Brazil kilma Angola
Ba beè kọọ̀ tọ nàà tóm ea di Brazil á nvèè bá lẹ̀ẹ̀là gyã́á má pá vígà e bà di Angola. Kọbé bà láá tú gbò lọ̀là-lọ̀làí siimá tóm boo bá ea palàge dú lé, pá vígà beè tú ọ̀ẹ̀ dẽe gbĩimá tẽ́ ló kà lé sĩ́deè ge zalmá gyã́á vaá lẹ̀ẹ̀là gì. Kọ̀láá bé ea dì naa, buù bẹ̀lẹ̀ gyã́áá beè sí nú ea é tóólá $22 ló gè zalí nè ge lẹ̀ẹ̀là, vaá nyèè gbò gyã́á ea dì belí rice, beans, nè nóò ge bùlmà nu beè láá kòn 20 kilogram (44 lb). Gã́bug nú e ni lẹ̀ẹ̀là a tóólá, 33,544 bẹ̀lẹ̀ gyã́á—ea gbá kòn 654 metric tons (721 U.S. tons). Bíi ló dõòna kà gbò gyã́á ea tọla kẽ kĩá, mm̀ ge nvèèmà bá nè nú ea é sígá ló 50,000 nen!
Nvèè báí beè tõó ló pá vígà naa vàẹ? Alexandre, ea ólò tõó kiẽ́e ea di kpã́á aa ló kiẽ́e e gbò nen tõó ea di Angola, kọ́ọ̀: “Gbò nuí zógè bé e Jìhóvà vulèm naa, náa dú áá m̀m̀. Bõ̀ònatõ̀ò Jìhóvà palàge nvèèm ka ló!” Mariza, e áá ẹ̀ẹ̀ ólò bumá pá a nvín kọ́ọ̀: “Jìhóvà dã́ nà tã̀àgã ló. M̀ ṍà Jìhóvà nè a bõ̀ònatõ̀ò zaa!”
Pá vígà e bà di Angola e bà gé ṍá Bàrì zaa ló gbò gyã́á e ba néva
Nvèè Bá Boo Béè Kã́á Kãà Kẽ Ea Beè Naaá Zimbabwe. Mm̀ gbáá 2020, kà agẹbá kã́á kãà kẽ beè naaá gbẹá Zimbabwe vaá gã́bug gãà nen beè mon tã̀àgã̀ bá kà agẹbá tá kói. Gã́bug gãà pá vígà e bà di Zimbabwe náa beè ié gyã́á ea gbõomá vá ló.
Ba beè nèeè vòò kà Disaster Relief Committee kẽ, kọbé bà nvèè bá tú gyã́á má pá bẹẹ vígà. Gã́bug pá vígà ólò nvèè bá kpoogè dee ló gyã́á, kọ̀l gbò nu gè dõo, àbèè ge nè ba faà. c Mm̀ gbáá 2020, ba beè tú $691,561 nèèmà gyã́á 22,700 nen!
Pá vígà e bà di Zimbabwe beè ié gyã́á
Sìgà tṍó, gyã́á ólò tá bá pá vígà besĩ́ gbò e bà ólò nvèè bá nè gbò e ba nu kyọa sĩ́ kálá dù. Tṍó e bà ni dómà gyã́áí, pá bẹẹ vígà ólò gbóó lèèlà Jìhóvà. Kàsĩ́ sìgà ọ̀và ólò gbóó dàlà togó ọlí sọ́l nònù.
Gbẹá enè ketõ̀ò, bàà kà vaà tãa e bà dú Gbò Neǹ Ditõ̀ò Jìhóvà beè sí kẽè ene kà bilà ló bel ea beè sẹ̀ẹ̀a ba bon, boo béè ge nvèè bá nè gbò e ba nu kyọa sĩ́, e náa aa bá kpóó ea gé bẹl, e bà kọ́lí va NGO (Nongovernmental Organization). Sõò, bila ló belá beè gbóó bã̀àa mm̀ bìlà bẹbẹ̀l, vaá gbò vígà pábiaí náa beè zigà ge naa gbò nú e bà kọ́ bàá naa kọbé bà láá ié nvèè báá. Tṍó e bà aa kè bila ló belá, ba beè nvèèmà va lẹ́ vaá kọ́ nè va kọọ̀, “Ó gá kpáá dunai kọ é nèi gyã́á!” Sõò bàà sè aa ló tṍóá, pá bẹẹ vígà beè gbóó iná kĩá vaá nè gyã́á gbò vígà pábiaí besĩ́ gbò e ba beè kọọ̀ bàé nveènìè bá nèe gbò e ba nu kyọa sĩ́á, e náa aa bá kpóó ea gé bẹl à kálá dù!
Prisca kọ́ọ̀, “Jìhóvà náa ólò kẹlẹ pá a gyóòlo”
Ge nvèè bá nè gbò e bùló kyọ̀à sĩ́ nááá ló gbẹá Zimbabwe a sí kà lé neǹ ditõ̀ò. Dì belí nu dòòmà bá, bugi togó boo nú ea beè naaá ló Prisca, ea ólò tõó ene kà ńkem̀ bon. Kèbá tàvàlà dìtõ̀ò ea beè dì boo béè kã́á kãà kẽá, Prisca beè olòó kọ́ kpẹ̀a kọ̀láá deè Wednesday nè Friday, náa kal ló béè kọọ̀ aè bèè tṍó gè fó nu. Pá ba bon beè màngã̀e vaá kọọ̀: “Òó maame gbàà gyã́á pá o tọ boo béè kọ̀ kpẹ̀a.” Prisca ólò aalá kọọ̀: “Jìhóvà náa ólò kẹlẹ pá a gyóòlo.” Gbele tõ̀ò tṍó náa téní aa ló tṍóá, bõ̀ònatõ̀òí beè gbóó dõo nu nèe. Níí beè palàge bọọ́ ló pá a kè gyṍó, naa ní e bà kọ́ nèe kọọ̀: “Bàrì náa kẹlẹ́ ni, vóà naa, beele gbĩ́ gè nó nú ea kilíé ló.” Àlàbà kà a neǹ kè gyṍó gé sí nònù tenmá boo lédíó broadcast kátogóí.
Boo tṍó e gé dũuà iná kuló ke kùbmà bàlà booí, bùló kyọ̀à sĩ́ nu é kilsĩ́ gè naaáí ló. (Máátìù 24:3, 7) Nyíéi palàge ẹẹ ló bé eo dõònìì nu taalẹi bá tenmá kele-kele sĩ́ deè ea di boo donate.pr418.com naa. È túù nvèèmà bá nè pá vígà e bà gé mon tã̀àgã̀ tṍó ea lelà nè tṍó e bà íe bíi ló.
a Bẹẹ gbáá 2020 daamà togó lọl September 2019 tẹlẹ August 2020.
b Dénè gbò kpègè e géè ló bel ea kil lóá di mm̀ U.S. dollar.
c Ge kọọ̀ kom ea kọlà COVID-19 náa kọ é gá láá sí gbò kiẽ́e e gáẹ̀ beè sì, náa kọọ̀ pá vígà a tú kpá lọl bá kpóó ea gé bẹl besĩ́ bà kálá láá lẹ̀ẹ̀là gyã́á ààmà. Bà ólò palàge ọẹ̀ nàgé dẽe kọbé COVID-19 náa bã́ vá ló.
