KILÍÍ SĨ́ GÈ KUAI DẼE LÓ!
2022: Gbáá E Gã́bug Pọ́lọ́ Nu Nááá—Éé Ní E Kpá Káí Kọ́ Kilma Ló É?
Mm̀ gbáá 2022, e beè bọọ̀gẹ̀ dã́ kpẹ̀a ea kil ló bé gím, kíi, nè gã́bug búùló kyọ̀àsĩ́ nu. Áá Kpá Káí ní ea kọ́ kà lèlà nú ea náa gbò nuí gé nááá ẽ́.
Nú e gbò nú ea nááá mm̀ gbáá 2022 tõó dọ̀
Gbò nú ea beè naaá gbáá e aà m-má zógè kọọ̀ e di mm̀ gbò deé e Kpá Káí kólíe “gbò dee e tṍó é gé tà.” (2 Tímotì 3:1) Gbò deeí beè dààà togó mm̀ gbáá 1914. Nvèè kpíi ló bé e gbò nú ea ã́àa naaáí gbááá ló gbò nú e Kpá Káí beè kọ́ gbẹẹ́ kẽ ea kil ló beélè tṍóí naa:
“Bé gím.”—Máátìù 24:6.
“Gbáá 2022, Ní E Europe Beè Kpáá Kpeesĩ́ Ló Kà Agẹ Bá Bé Gím Ẽ́.” a
Bugi togó bel ea kọ́ọ̀ “Russia Náa Uú Boo Ukraine.”
“Kíì gyã́á.”—Máátìù 24:7.
“2022: Beè Dú Gbáá E Agẹ Bá Kíì Gyã́á Beè Dọ̀.” b
Bugi togó bel ea kọ́ọ̀ “Bé Ea Gé Béá Ukraine Náa Kọọ̀ Kíì Gyã́á Á Kpáá Zoogá Beeá Ló Bàlà Booí.”
“Pọ́lọ́ kom.”—Lúùk 21:11.
“Ge kọọ̀ kom ea kọlà polio beè kpáá dọ̀, kom ea kọlà monkeypox beè kpáá zoogá vaá COVID-19 à fẹ́ gã́bug nen, zógè bé e gbò kom ea ólò láá zilá dú gẹẹ-gẹẹ ló naa nè ge kọọ̀ àé láá vàlẹ̀ bá bã ló gbò nen.” c
Bugi togó bel ea kọ́ọ̀ “6 Gãà Nen A Ú Boo Béè Kom Ea Kọlà COVID.”
“Gbele gbele nu pọ̀.”—Lúùk 21:11.
“Bẹ̀à sã́, kã́á kãà kẽ, sã́ ea dọgagi ló kẽ, nè tù múú. Agẹ bá gbẹi ea beè mọ mm̀ gbáá 2022, dú nú e náa é valẹ̀ bá tá nyíè nen boo béè gã́bug nú ea beè kyọ̀sĩ́, gã́bug tõ̀ò nen ea beè fẹ̀, nè gã́bug gãà tọ ea beè kyọ̀sĩ́ beeá ló bàlà booí.” d
Bugi togó bel ea kọ́ọ̀ “Kpẹ̀a Ea Kil Ló Bé E Sĩ́dee Kpáá Palàge Bẹ̀à Sã́ Beeá Ló Bàlà Booí Èl Bé Ea Beè Dì Naa.”
‘Zààlì kẽ.’—Lúùk 21:9.
“Boo béè bé e dìtõ̀ò beè kpáá tàvàlà naa, èlmà tõ̀ò agẹ kiì nu, beè naa kọọ̀ gbò nen á bã̀ súng vaá kpáá palàge bé uú boo kpóó ea gé bẹl mm̀ gbáá 2022.” e
Bugi togó bel ea kọ́ọ̀ “Agẹ Kiì Nu Ea Gé Kpáá Zoogá Bàlà Booí.”
Éé ní ea é nááá gbáá ea bẽene ẽ́?
Tọ́ọ̀ nen náa é láá kọ́ nú ea é nááá mm̀ gbáá 2023. Sõò è nyímà kọọ̀ pọ́ì ńkem̀ tṍó àla, Boǹ Méné Bàrì é nyááná gã́bug nú boo kunukẽ̀í. (Dániẹ̀l 2:44) Boǹ Méné Bàrì é lọl gbò nú ea náa kọ gbò nen á mòn tã̀àgã̀ vaá naa kọọ̀ bùlà Bàrì á naaá boo kunukẽ̀í.—Máátìù 6:9, 10.
È síèi kpóó ló kọ ó gbanii tṍ ló dùùlà bá deè tṍ Jíízọ̀s Kráìst vaá ò “Kuai dẽe ló” nyòòmà bé e gbò nú ea gé nááá bàlà booí gé ḿm̀-mè kọ́ọ̀ bùlà Bàrì ea di mm̀ Kpá Káí naa. (Máàk 13:37) Sóo-sóo, zọ̀i lóá bel boo bé eo é láá kpáá nó gã́bug nu ea kil ló bé e Kpá Káí é láá nvèè bá nè ni naa kátogóí, nè bé ea é láá naa kọọ̀ olo nè pá o tọ á ié kà lé ból dẽesĩ́ nyòòmà dì deè sĩ́ naa.
a Jill Lawless ne kpẹ̀a ló December 8, 2022 boo AP Niùz kọọ̀, “Gbáá 2022, Ní E Europe Beè Kpáá Kpeesĩ́ Ló Kà Agẹ Bá Bé Gím Ẽ́.”
b Gbò E Bà Di Togó Nòònù Gè Naa Kọọ̀ Gyã́á Á Di Kẽ E Bà Kólí Va World Food Programme Kọ́ọ̀, “Kíì Gyã́á A Kpáá Zoogá Zivè Kà Bàlà Booí.”
c Lawrence O. Gostin JD ló bel boo togó bel ea kọ́ọ̀ “Gè Tõó Dùm Mm̀ Tṍó E Gã́bug Pọ́lọ́ Kom Gé Téní—Lọl Ló COVID-19 tẹlẹ ló Monkeypox, Polio, nè kom e bà kólíe Disease X,” ló September 22, 2022 mm̀ JAMA Health Forum.
d Martina Igini ne kpẹ̀a boo togó bel ea kọ́ọ̀ “Nu Ea Man Kà Agẹ Bá Bẹ̀à Sã́ Sĩ́dee Tṍó Gbei Mm̀ Gbáá 2022,” ló October 24, 2022 boo Earth.Org.
e Thomas Carothers nè Benjamin Feldman, beè kọ́ gbẹá bõ̀ònaló gbò e bà kọlà Carnegie Endowment for International Peace ló December 8, 2022 kọọ̀, “Tàvàlà Dìtõ̀ò Beè Bọọ̀gẹ̀ Naa Kọọ̀ Gbò Nen Á Bé Uú Boo Kpóó Ea Gé Bẹl Mm̀ Gbáá 2022.”
Àé Láá Leemá Ni Gè Ẹ̀b Nàgé
ESSENTIAL BIBLE TEACHINGS
Éé Ní Ea Dú Boǹ Méné Bàrì E?
Dénè tṍó e Jíízọ̀s beè di boo kunukẽ̀í ea géè kọ́ kpẹ̀a, a beè noòmà nú ea kil ló Boǹ Méné Bàrì èlmà dõòna kà togó bel. Mm̀ gã́bug gbò gbáá, pá a gyóòlo a tãagã ló Bàrì kọọ̀ Boǹ Ménéá á dù.
NÚ EA KILÍÍ LÓ
Bĩiná Kọ Nen Á Kãanìè Ni
Ló sọ́l boo bíb e Kpá Káí áálá, àbèè ò nó gã́bug nú ea kil ló Gbò Neǹ Ditõ̀ò Jìhóvà.
