Ba beè tú náa fẹẹmá gã́bug nen beeá ló zivè kà bàlà booí, mm̀ July 2022:

•   “Ge fẹ́ neǹ Japan ea ólò bìlà ńkọ́sì e gbò nen palàge nyimáe ló [ea beè zẹ́ẹ́ dú Prime Minister ea bée kọlà Shinzo Abe beè palàge tãagẽ gbò e bà di dóá vaá naa kọọ̀ pọ̀ á sii gbò nen beeá ló bàlà booí, bọọ èlmà tõ̀ò tã́gíní bé e na íb dùm gboo-gboo lóí gáà bọ̀ọ̀gẹ̀ naaá dóá, vaá bà íe gã́bug log ea ténmá kọọ̀ gbò nen ágá ié náaá.”​—Níà bé Níúz pẹpà ea kọlà The Japan Times ne kpẹ̀a naa ló July 10, 2022 e.

•   “A beè palàge bọọ́ ló gbò e bà di Denmark tṍó e nen ea fáálá náa beè tãa taà nen gbẹá pọ̀b kà tọọ̀ ki ea kọlà Copenhagen.”​—Níà bé e Reuters ne kpẹ̀a naa ló July 4, 2022 e.

•   “Gbẹá South Africa, gbò e bà fáálá náa beè tãa 15 nen fẹ̀ gbẹá kiẽ́e e bà ólò tõo ṍ míí ea di pọ̀b boǹ Soweto.”​—Níà bé Níúz pẹpà ea kọlà The Guardian ne kpẹ̀a naa ló July 10, 2022 e.

•   “Ba beè tãa nú ea é sígá ló 220 nen fẹ̀ gbẹá U.S. deé e ba beè ié deè ge sẹ̀ẹ̀à ló July 4.”​—Níà bé CBS Níúz ne kpẹ̀a naa ló July 5, 2022 e.

 É kọọ̀ è íè gé bóòl dẽesĩ́ kọọ̀ íb dùm gboo-gboo lóí é beè iná gé kùbmà? Éé ní e kpá káí kọ́ kilma ló é?

 Kpá Káí kọọ̀ è di “gbò deé e tṍó é gé tà,” ea dú tṍó e gbò nen é sí bàg, dú gboo-gboo ló, vaá labví gi pọ́lọ́ láb. (2  Tímotì 3:​1, 3) Íb láb gboo-gboo lóí ólò naa kọọ̀ pọ̀ á sii gbò nen. (Lúùk 21:11) Náa kal ló béè vó, Kpá Káí zigà kọọ̀ à íe tṍó e dùm gboo-gboo ló é íná kùbmà vaá “gbò [nen] é tõó kiẽ́e e fẹ́ẹ́-fẹẹ̀ ló dì, kiẽ́e e bàé íé kpènà nè ketõ̀ò bõ̀ séi.” (Àìzáíà 32:18) Mósĩ́ deè ní e dùm gboo-gboo ló é íná kùbmà ẽ?

 Bàrì é kyọsĩ́ gbò pọ́lọ́ nè dénè nuù bé.

•   “Kilma kiẽ́e e gbò pọ́lọ́ dì, àé dú gè fùl va lọl boo kunukẽ̀í.”​—Próvẹẹ̀b 2:22.

•   “[Bàrì é] nveè kùbmà ló bé gím zivèkà boo kunukẽ̀í. À búni ba bò díìla vaá zaali ba sòbà; à tẹ́lẹ̀ sã́ ló ba faà bé.”​—Psalm 46:9.

 Bàrì é lọl nú ea dú kpò kúm dùm gboo-gboo ló tení dú ló gè noòmà gbò nen kọ bàá tõó mm̀ fẹ́ẹ́-fẹẹ̀ ló.

•   “Bà náa é nveè tọ́ọ̀ kà kom ló nen àbèè ge kyọ̀sĩ́ nu boo gbò nà gù ea di káí, boo béè kọọ̀ nyìmànù Jìhóvà é íè ge m-má boo kunukẽ̀í belí bé e múú ólò m-má mm̀ pène naaá.”​—Àìzáíà 11:9.

•   Bã̀àna kátogóí, Bàrì gé noòmà nu gbò nen beeá ló bàlà booí kọ bàá kìn dùm gboo-gboo ló, bàá gá bé bé, nè ge kọọ̀ bàá ‘kììlà ba gẹ̀ bé naamá nuù síìmà tóm vaá tú ba sòbà naamá nu gè kamá té.’​—Máíkà 4:3.

 Be ò gbĩ́ì ge kpáá nyimá gã́bug nú e Kpá Káí zigà ea kil ló bàlà boo e pọ̀ náa é dinà, bugi togó bel ea kọ́ọ̀ “Ge Di Pọ́ì Aa Bá Pọ̀​—É Kọ Àé Válí Gé?”

 Be ò gbĩ́i ge kpáá nyimá gã́bug nú ea kil ló kùbmà ea é bã́ ló dùm gboo-gboo ló, bugi togó bel ea kọ́ọ̀ “Fẹ́ẹ́-fẹẹ̀ Ló A Íná Boo Kunukẽ̀í!”