Mm̀ July 2022, ba beè nè kpẹ̀a ea kil ló bé e sĩ́dee kpáá zoogá ló gè bẹ̀à sã́ beeá ló bàlà booí naa kọọ̀:

•   “Gbò e bà ólò nè kpẹ̀a ea kil ló sĩ́dee e bà di China beè ãane gbò nen ea kil ló bé e sĩ́deè 70 pọ̀b bon é kpáá palàge bẹ̀à sã́ ẽ́ e di m-mí naa.”​—Níà bé e CNN Wire Service ne kpẹ̀a naa ló July 25, 2022 e.

•   “Boo béè bé e zivèkà Europe kpáá bẹ̀à sã́ naa, náa kọọ̀ sã́ á dọ̀gagi ló gã́bug kọ̀l ea di gã́bug dó.”​—Níà bé e The Guardian níí July 17, 2022 ne kpẹ̀a naa ẽ́.

•   “Deè Sundaya, sĩ́deè gã́bug pọ̀b bon ea di United State beè bẹ̀à sã́ èl bé ea beè olòó dì naa, boo béè gbò bẹ̀à sã́ ea aa East Coast nè sìgà ketõ̀ò ea di South nè Midwest.”​—níà bé e The New York Times níí July 24, 2022 ne kpẹ̀a naa ẽ́.

 Éé ní e dénè níí doà bá ẹ́? É kọọ̀ boo kunukẽ̀í é beè dọ̀ ní e gbò nen náa é beè láá tõó ná boo? Éé ní e Kpá Káí kọ́ ẹ́?

 Ẽei. Bẹ̀à sã́ fọ́ọ́lọ́ ea gé ulà beeá ló bàlà booí gbááá ló nú e Kpá Káí beè kọ àé nááá mm̀ beélè tṍóí. Dì belí nu dòòmà bá, Jíízọ̀s beè kọọ̀ èé mon “gbele-gbele nu pọ̀” nè “gbò nú e nen gáà mòn tọ́ọ̀ dee” ea é nááá gi. (Lúùk 21:11) Bé e sĩ́dee gé kpáá bẹ̀à sã́ naa a náa kọọ̀ pọ̀ á sii gã́bug nen kọọ̀ gbò nen é kyọsĩ́ boo kunukẽ̀í.

 Ẽ́èe. Bàrì beè dèm boo kunukẽ̀í kọ á dú kiẽ́e e gbò nen é tõo dọ̀ọ̀mà dè-dè. (Psalm 115:16; Ẹ̀klìzíástìs 1:4) Tãa vó e Bàrì sọtọ́ deè kọọ̀ gbò nen á kyọ̀sĩ́ boo kunukẽ̀í, ẹlẹ é beè gé “kyọ̀sĩ́ gbò e bà gé kyọgàlà bàlà booí,” dì belí bé ea beè zìgà naa.​—Kùùà Nù 11:18.

 Bugi togó boo kóló bàà kà kọ́ọ̀ bùlà Bàrì ea tẹ́lẹ bàlàkẽ dõòna kà nú e Bàrì beè zìgà:

•   “Nyíè boo bàlà ól nè kã́á kãà kẽ é ẹ́ẹ, Vaá boo kpáà bàlà ól záí sãa é íe zààvà vaá tẹ̀g belí doo-doo sĩ́ pà sãa.” (Àìzáíà 35:1) Bàrì náa é sọtọ́ deè kọọ̀ boo kunukẽ̀í á dú ní e gbò nen náa é láá tõó ná boo, sõò àé sí tóm ló òòmà sẹlẹ bé ea beè dì naa.

•   “Ò ẹb nú ea ki ló boo kunukẽ̀í, vaá naa kọ á palàge dú lé vaá mumè nu.” (Psalm 65:9) Tení dú tã́áná dee bá ea aa bá Bàrì àé náa kọọ̀ boo kunukẽ̀í á dú páladaìs.

 Kọbé ò nyímá gã́bug nú ea kil ló bé e nyààa ea gé bã́ ló sĩ́deè ḿm̀-mè kọ́ọ̀ bùlà Bàrì ea di Kpá Káí naa, bugi togó bel ea kọ́ọ̀ “Bé E Sĩ́dee Gé Nyááá Naa Nè Bẹẹ Dì Deèsĩ́​—Nú E Kpá Káí Kọ́.”

 Kọbé ò kpáá nyimá gã́bug nú ea kil ló nú e Kpá Káí kọ́ kilma ló gè òòmà boo kunukẽ̀í sẹlẹ bé ea beè dì naa, ẹ̀b togó bel ea kọ́ọ̀ “Mée Ní Ea É Duulà Boo Kunukẽ̀í Ẽ́?”