Kà lèlà deè Sunday, November 20, 2022, COP27 United Nations Climate Change Conference beè iná kùbmà. Náa kal ló béè kọọ̀ ba beè bilá ló kọọ̀ bàé tú kpègè nvèèmà bá nè gbò dó e ba sĩ́dee ni bọọ̀gẹ̀ kyọ̀à, gã́bug ọ̀và beè mòn kọọ̀ níì níí ní ea é nveè kùbmà ló tã̀àgã̀í ẽ́ nì.

•   António Guterres ea dú secretary-general pá United Nation beè kọ́ ló November 19, 2022 kọọ̀ “Nda nvee sãa kúm béèlàfùl ge kọọ̀ èé lọlà kpègà nveemà bá nè gbò e bà gé mon tã̀àgã̀ boo sĩ́deè ba dó ea kyọà. Sõò è nyímà kọọ̀ áá gè naa vóí náa é nvee kùbmà ló tã̀àgã̀í . . . Bẹẹ ból bàlà booí a kyọà iná kiẽ́e ea ni bã́ di kèbá gẹẹ-gẹẹ ló.”

•   Mary Robinson ea beè zẹ́ẹ́ dú president Ireland vaá du nágé UN High Commissioner pá Human Right beè kọ́ ló November 20, 2022 kọọ̀: “Bàlà booí é gé kpeesĩ́ ló gbele agẹ bá nyààa ea é bã́ ló sĩ́dee ea tọ́á ló kọ̀láá nen mm̀ kà pọ́lọ́ sĩ́deè.”

 Gbò nvín ãa nè gbò kànen palàge ié tã̀àgã̀ bùlà ea kil ló bé e bàlà booí é meà naá dì deèsĩ́. Sõò é kọọ̀ gbò dó é láá gbaá ló siá tóm gè mm-mè ba zìgà ge sí tóm ló bé e sĩ́deè gé kpáá palàge dú pọ́lọ́ naa? Éé ní e Kpá Káí kọ́ kilma ló é?

 Kpá Káí tẹ́lẹ bàlà kẽ kọọ̀ kọ̀láá bé e bà pììgà vaá sí tóm agẹlẹ bá naa, gbò dó àla náa é láá aa deè sí tóm ló sĩ́dee ea ni kyọà. Nvèè kpíí ló bàà kà bug ea náa:

•   “Nú ea bééá náa é láá lèlà.”​—⁠Ẹ̀klìsíástìs 1:⁠15.

   Nú ea tõó dọ̀: Gbò e bà gé bẹl náa ié kpóó gè naamá kọ̀láá kà nú e bà gbĩ́ gè naa, boo béè kọọ̀ Bàrì náa beè dèm gbò nen kọ bàá bẹ̀l ba bá. (Jèrémáíà 10:23) Kọbèè gbò dó àla gbááá ló, kọ̀láá bé e bà piigà naa, bà náa íe kpóó gè láá kpoogè dee ló gbò tã̀àgã̀ ea di bàlà booí.

•   “Boo béè kọọ̀ gbò nen é vulè áá ba lóó, bà é vulè kpègè, . . . bà náa é bọ́ló dẹ̀lẹ̀ nyíé boo.”​—⁠2 Tímotì 3:​2, 3.

   Nú ea tõó dọ̀: Kpá Káí beè kọ́ gbẹẹ́ sĩ́ kọọ̀ gã́bug nen é beè ié dùm kùlù-kúlù vaá bà náa é gbĩ́ gè naa nú ea é léé ló dõona gbò.

 Náa kal ló béè vó, ból dẽesĩ́ e íè nyòòmà bàlà booí dì deèsĩ́ náa dẹẹ̀a boo gbò nú e gbò e bà gé bẹl bàlà booí zigà. Bàrì á íbá ló nen ea é láá palàge bẹ̀l bàlà booí, ea dú Jíízọ̀s Kráìst. Kpá Káí kọ́ kìlmàé ló kọọ̀:

•   “Bẹbẹ̀l é díé boo gànàgĩ̀. A bée é kọlà Lé Neǹ Dùùlà Bá Deè Tṍ, Bàrì Ea Bọọ, Tẹ̀ Ea Dì Dọ̀ Dè-dè. Sã́áná Méné Fẹ́ẹ́-fẹẹ̀ Ló.”​—Àìzáíà 9:​6, émì nú ea di kè kẽ.

 Jíízọ̀s ní ea dú méné boo boǹ méné Bàrì, ea dú bẹlbẹ̀l ea di káálà ẹ́. (Máátìù 6:10) À íe kpóó, nyìmànù, nè tàn gè ẹ̀b nú ea kil ló bẹẹ bàlà booí nè dénè nú ea di boo. (Psalm 72:​12, 16) Kèbá a tùle, nakà bẹ̀l ea di káálàí é lọl gbò e bà gé “kyọ̀ bàlà booí” vaá naa kọọ̀ zìvèkà bàlà booí á kpáá dú.​—Kùùà Nù 11:​18, émì nú ea di kè kẽ; Àìzáíà 35:​1, 7.

 Be ò gbĩ́ì ge kpáá nyimá nú ea kil ló nú ea é aa deè nvèè kùbmà ló vaá sí tóm ló bé e sĩ́dee gé nyááá vaá kpáá dú pọ́lọ́ naa, bugi togó bel ea kọ́ọ̀ “Bé E Sĩ́dee Gé Nyááá Naa Nè Bẹẹ Dì Deèsĩ́​—Nú E Kpá Káí Kọ́.”