Gã́bug dó beeá ló bàlà booí a pooà boo béè bìlà bẹlbẹ̀l. Gbò e bà kọlà Pew Research Center ne kpẹ̀a mm̀ gbáá 2022 kọọ̀, “nú ea sígá ló báàsĩ́ gbò e togó va ni tulà nu e bà di 19 dó e ba beè bugi kọọ̀, gbò e bà nveè sãa kúm kele-kele kpóó bẹlbẹ̀l e bà di ba dó gé palàge zọ̀ dõona gbò e bà nveè sãa kúm dõona kà kpóó bẹlbẹ̀l dùlà.”

 É kọọ̀ olo nveè kpíi ló kọọ̀ gbò e bà di kĩée e olo dì, gé kpáá palàge pòòà boo béè bìlà bẹlbẹ̀l? Éé ní ea náa à dì naa vó é? É kọọ̀ à íe nú ea é láá nvèè kùbmà ló? Nvèè kpíi ló nú e Kpá Káí kọ́.

 Kpá Káí beè gbẹẹ́ sĩ́ kọ́ kilma ló beélè deeí, ea dú gbò deé e Kpá Káí kólíe “gbò dee e tṍó é gé tà,” kọọ̀ gã́bug nen é lábví láb ea é náa kọọ̀ gbaa ló á gá di zẹ̀ẹ̀ gbò nen.

•   “Gbò deé e tṍó é gé tà é dú kà tàvàlà tṍó. Boo béè kọọ̀ gbò nen é vulè áá ba lóó, . . . bà náa é náa nú e ba beè zìgà.”​—2 Tímotì 3:​1-3.

 Náa kal ló béè kọọ̀ gã́bug gbò e bà gé bẹl gé piigà boo gè naa nú ea é léé ló gbò nen, ba pììgà náa síá tóm. À tavala ló gbò e bà náa ẹb nú mm̀ tẽ̀ènè sĩ́deè ge gbá siá tóm vaá kpoogè deè ló tã̀àgã̀. Gbò nú ea silà aa m gbááá ló nú e Kpá Káí beè gbẹẹ́ sĩ́ kọ àé nááá.

•   “Nen a bẹl nen mm̀ sĩ́deè ea nveèe kom ló.”​—Ẹ̀klìzíástìs 8:9.

 Náa kal ló béè vó, Kpá Káí kọ́ nú ea é nveè kùbmà ló, ea dú kpóó bẹlbẹ̀l e nen ea é bẹl boo é láá lọ̀l dénè tã̀àgã̀ e gbò nen gé téní bá deè niéi.

 Kpá Káí kol béè ene kà méné ea ié gã́bug lé kpãa vaá sìm tùlà ge lọ̀l gbò tã̀àgã̀í, ea dú Jíízọ̀s Kráìst. Jíízọ̀s íe kpóó, tàn, nè kpóó lẹ̀ẹ̀là bel gè naa kọọ̀ kọ̀láá nen á di mm̀ gbaa ló nè fẹ́ẹ́-fẹẹ̀ ló.

•   “Nu é léé ló gbò lé lab dògò mm̀ gbò tṍó ea gé bẹl, vaá fẹ́ẹ́-fẹẹ̀ ló é dí dénè ketõ̀ò.”​—Psalm 72:7.

•   “Dénè gbò dó é sí tóm nèe.”​—Psalm 72:11.

 Jíízọ̀s dú kà lé méné boo béè kọọ̀ à ólò ẹ̀b nú ea kil ló vaá gbĩ́ gè nvèè bá nè gbò nen, èlmà tõ̀ò gbò e bà tú pọ́lọ́ bá sẹ̀ẹ̀mà va.

•   “Àé áálá neǹ nání bá ea gé tó kolíe vaá bĩiná nvèè bá, gba nágé ló nen ea dìtõ̀ò kil kẽ nè kọ̀láá nen e bè náa íe neǹ nvèè bá. Àé tó sàn gbò e ba dìtõ̀ò kil kẽ nè gbò e nání bá dì vá dẽe, vaá àé kpenà gbò e nání bá dì vá dẽe. Àé áálá va lọl kèbá nàà uú boo nè dùm gboo-gboo ló.”​—Psalm 72:12-14.

 Kpáá nó gã́bug nú ea kil ló Boǹ Méné Bàrì, ea dú bẹlbẹ̀l e Jíízọ̀s é tõó káála bẹl boo gbò nen. Gbĩ́tẽ́ ló bé eo é láá ié bélè lọl ló nè bé eo é láá nvèè sãa kúm a bẹlbẹ̀l naa.

•   Ẹ̀b vídiò ea kọlà Éé Ní Ea Dú É Boǹ Méné Bàrì E?

•   Bugi togó bel ea kọ́ọ̀ “God’s Kingdom​—A Government With No Corruption.”