Gbò nen gé ĩima bá gbele bá kpóó bẹ̀à sã́ ea aa ló gbei nè dõona kà gbò kyọ̀àsĩ́ nu ea aa ló bé e sĩ́dee gé kpáá dú pọ́lọ́ naa. Nvèè kpíí ló nagbò kpẹ̀aí:

•   “Lọl 174 gbáá ea kil nvéeá e gbò nen beè dààmà togó gè nè kpẹ̀a ea kil ló sĩ́dee, kpẹ̀a ea kil ló bé e sĩ́dee beè bẹ̀à sã́ naa ló June na, a el níí kọ̀láá gbáá.”​—Níà bé e National Oceanic and Atmospheric Administration, U.S. Department of Commerce, beè kọ́ naa ló July 13, 2023 e.

•   “Italy, Spain, France, Germany nè Poland gé mon tã̀àgã̀ bá gbele bá kpóó bẹ̀à sã́. Bà kọ́ọ̀ bé e fọ́ọ́lọ́ é kpáá bẹ̀à sã́ naa é bọọ dọ ló dú 48°C [118°F] gbẹá Sicily nè Sardinia ea dú gbò kpò kunukẽ̀ kĩée e múú bééá tení ló – bà kọ́ nágé kọọ̀ gbò kpò kunukẽ̀í é láá palàge bẹ̀à sã́ èl bé e dõona kà gbò ketõ̀ò ea di Europe ni bẹá sã́ naa.”​—Níà bé e European Space Agency, beè kọ́ naa ló July 13, 2023 e.

•   “Buù bé e bàlà booí gé kpáá bẹ̀à sã́ naa, níà bé eé ẹb dẽesĩ́ kọọ̀ agẹ bá boo é olòó dọọ naa ẽ́, vaá níí é náa kọọ̀ múú á kpáá bã̀ vaá kyọ̀sĩ́ nú gã́bug ketõ̀ò.”​—Níà bé e Stefan Uhlenbrook, ea di togó gbò e bà ólò nónú ea kil ló bé e múú nè báa-báà múú ólò aa boo kunukẽ̀í kil sĩ́dee vaá aa sĩ́dee dú boo kunukẽ̀í naa, beè kọ́ gbẹá World Meteorological Organization, ló July 17, 2023 e.

 É kọọ̀ ò íè tã̀àgã̀ bùlà ea kil ló bé e bà kpáá nè kpẹ̀a ea kil ló bé e sĩ́dee kpáá dú pọ́lọ́ naa? Bugi togó boo nú e Kpá Káí kọ́ kilma ló nakà togó bel ea palàge dú bíií.

 Ẽei. Gbele bá kpóó bẹ̀à sã́ nè dõona kà gbò pọ́lọ́ nú ea gé nááá boo béè bé e sĩ́dee gé kpáá bẹ̀à sã́ naa gbááá ló nú e Kpá Káí beè kọ̀ ea kil ló beélè tṍóí. Dì belí nu dòòmà bá, Jíízọ̀s beè gbẹẹ́ sĩ́ kọọ̀ èé mon gi “gbele gbele nu pọ̀,” àbèè “gbò nú ea gáà dõogẽ naaá ea é náa kọọ̀ lóó nen á kení.” (Lúùk 21:11; Good News Translation) Bé e sĩ́dee gé kpáá palàge dú pọ́lọ́ beeá ló bàlà booí naa a náa kọọ̀ gã́bug nen á siiá pọ̀ kọọ̀ boo kunukẽ̀í é kyọà iná kĩée ea é tavala ló gbò nen gè tõó boo.

 Ẽ́èe. Bàrì beè dèm boo kunukẽ̀í kọ é tõó boo dọ̀ dè-dè; náa é zigà kọọ̀ gbò nen á kyọ̀sĩ́. (Psalm 115:16; Ẹ̀klìzíástìs 1:4) Kàsĩ́, a zigà kọọ̀ àé ‘kyọẹ̀sĩ́ gbò e bà gé kyọ bàlà booí.’​—Kùùà Nù 11:18.

 Kpá Káí zógè kọọ̀ Bàrì é láá kpènà vaá àé kùbmà boo kunukẽ̀í lọl bá gbò nú ea gé kyọ.

•   “[Bàrì] ólò ọvẹ̀ dálí; vaá naa kọọ̀ kpo-kpoò múú ea di sĩ́ pène á ọ̀b.” (Psalm 107:29) Bàrì íe kpóó gè lẹ̀ẹ̀mà bel ló gbò nú ea beè dèm. À íe kpóó gè siimá tóm ló gbò nú ea ni kyọà ea di boo kunukẽ̀í ea gé náa kọọ̀ gbò nen á mòn tã̀àgã̀ bá bé e sĩ́dee gé kpáá palàge dú pọ́lọ́ naa.

•   “Ò ẹb nú ea kil ló boo kunukẽ̀í, ò náà kọọ̀ gã́bug súú té á mumí boo vaá á leevè nu.” (Psalm 65:9) Tã́áná dee bá Bàrì é náa kọọ̀ boo kunukẽ̀í á dú páradaìs.

 Kọbé ò kpáá nyimá gbò zìgànù ea di Kpá Káí ea kil ló gè kpáá sí tóm ló boo kunukẽ̀í, bugi togó bel ea kọ́ọ̀ “Mée Ní Ea É Duulà Boo Kunukẽ̀í Ẽ́?”