“Gbò nen gé náa gã́bug nú ea é beè gé kyọ̀gàlà sĩ́dee. Múú é tú gã́bug bon. Gbele agẹ bá bẹ̀à sã́ fọ́ọ́lọ́ é dì. Ìlìsẽ́ ea é síìmà pọ̀ nen é ulà. Múú é ĩ́á gã́bug ketõ̀ò. Gã́bug té nè nom é ú. Níí níì pọ́ì nú e nen doomà dẽe ló àbèè ge tẹlẹ̀ pẹ̀lẹ ló nì. Níì gbò nú e gbò e bà gé nó sã́ìns kọ́ àé silà aa mm̀ nú e gbò nen gé náa kilma ló gbò nú e Bàrì beè dèm ẽ.”​—Níà bé e António Guterres, ea dú secretary-general pá United Nation kọ́ lèlà April 4, 2022 kilma ló kpẹ̀a ea aa bá gbò e bà ólò ẹ̀b bé e nú e gbò nen náa ólò tọá ló sĩ́dee naa, e bà kólí va Intergovernmental Panel on Climate Change.

 “Gbò e bà ólò nó sã́ìns dì e bà gé náa kọ é nyimá kọọ̀ gbò gbáá ea gé dú àla, kyọ̀àsĩ́ ea é nááá boo béè nyààa ea é bã́ ló sĩ́dee é sigè ńkem à íná dénè 423 kiẽ́e e kpóó ea gé bẹl ólò kpoogègì dee ló gbò nú e Bàrì beè dèm sẹlẹ [ea di United State], boo béè kọọ̀ gbò kĩé ólò láá vàlẹ̀ bá ié kyọ̀àsĩ́. Gbò pọ́lọ́ nu ea é láá naaá bélí nágé gbò ní e beè bugi nú ea kil ló mm̀ Kpá Káí, ea dì belí: tàà sã́ nè tù múú, bẹ̀à sã́ ea é zaali gbò báà-báà múú ea di sĩ́dee, pène é kpáá m-má èl bé ea ólò dì naa nè bẹ̀à sã́ fọ́ọ́lọ́.”​—Níà bé e níúz pẹ́pà ea kọlà The New York Times níí June 15, 2022 kè kẽè togó bel ea kọ́ọ̀ “Flooding Chaos in Yellowstone, a Sign of Crises to Come” kọ́ ẹ́.

 É kọọ̀ àé beè láá dú gè kpoogè dee ló tã̀àgã̀ ea ni bã́ ló boo kunukẽ̀í? Be è vó, mée ní ea é kpóògè dee ló é? Bugi togó boo nú e Kpá Káí kọ́ kilma ló.

 Kpá Káí kọ́ọ̀ Bàrì é gé “kyọ̀ sĩ́ gbò e bà gé kyọ̀ bàlà booí.” (Kùùà Nù 11:18) Dọ̀ Kpá Káíí nóòmài taà kà nu:

1.  1. Láb gbò nen é kyọgàlà boo kunukẽ̀í

2.  2. Kùbmà é beè bã ló gè kyọ̀gàlà boo kunukẽ̀í.

3.  3. Bàrì ní ea é kpóògè dee ló tã̀àgã̀ ea ni bã̀ ló boo kunukẽ̀í ẽ́, níì gbò nen nì.

 Kpá Káí kọ́ọ̀ “boo kunukẽ̀í é di dọ̀ dè-dè.” (Ẹ̀klìzíástìs1:4) Gbò nen é kilsĩ́ gè tõó boo.

•   “Gbò lé lab dògò ní e bàé tõó boo kunukẽ̀í ẽ́, Vaá bàé tõó boo dọ̀ọ̀mà dè-dè.”​—Psalm 37:29.

 Boo kunukẽ̀í é beè òòà tõo kà lèlà bé e Bàrì beè dèm naa.

•   “Nyíè boo bàlà ól nè kã́á kãà kẽ é ẹ́ẹ, Vaá boo kpáà bàlà ól záí sãa é íe zààvà vaá tẹ̀g belí doo-doo sĩ́ pà sãa.”​—Àìzáíà 35:1.