Kà lèlà May 19, 2022, United Nations Security Council beè dã́ bel lọl gã́ nú ea é sígá ló 75 nen e gbò nen ólò nvèè ka ló e bà kọ́ọ̀, “bé ea gé béá Ukraine kpáá naa kọọ̀ kíì gyã́á e COVID-19 nè nyààa ea bã́ ló sĩ́dee beè domá á zoogá beeá ló bàlà booí.” Níúz pẹpà ea kọlà The Economist kọ́ nágé kọọ̀,“béí é náa kọọ̀ tá kói á kpáá palàge zoogá mm̀ bàlà boó e gã́bug tã̀àgã̀ zẹ́ẹ́ dìí.” Kpá Káí beè gbẹẹ́ sĩ́ kọọ̀ kíì gyã́á é di mm̀ tṍó e dìí, sõò à nveè nàgé bá nèi kọ é nyimá sĩ́deè ge tõ̀òma bá.

•    Jíízọ̀s beè kọọ̀: “dó é bé dó vaá boǹ méné bé boǹ méné, vaá kíì gyã́á” é di.​—Máátìù 24:7.

•    Kpá Kùùà Nù kọ́ ea kil ló ténì nen e bà di boo nom̀ tee ea íe nú ea doà bá. Ene kà ea di zẹ̀ẹ̀ doà bá bé gím. Ní ea bẽene à dòà bá kíì gyã́á, tṍó ea é tavàlà ge ié gyã́á vaá gbò nen é tú ki èlmà ló kọ̀láá kà ńkem̀ ea dì. “M beè ẹ̀b, vaá gbóó mòn ene kà bila nom̀ tee. Nu gè dòòmà bé e nu nyèè naa beè di bá nen ea dìé boo. M beè dã́ nu ea bélí mon ea silà . . . vaá kọ, ‘Kpègè tóm dee á tá ló tẽ̀ènè do ọ̀lọ́s, vaá kpègè tóm dee á tá ló kóló taà doò kpá kyàlà.’ ”​—Kùùà Nù 6:​5, 6.

 Gbò kọ́ọ̀ bùlà Bàrì ea kil ló kíì gyã́á e Kpá Káí beè kọ́ nú ea kil ló dì ea gé ḿḿ-má kátogóí e Kpá Káí kólíe “gbò dee e tṍó é gé tà.” (2 Tímotì 3:1) Kọbé ò kpáá nyimá gã́bug nú ea kil ló “gbò dee e tṍó é gé tà” nè ténì nen e bà di boo nom̀ tee e kpá Kùùà Nù kọ́ nú ea kil lóá, ẹ̀b vídiò ea kọlà Dìtõ̀ò Bàlà Booí A Nyááá Lọ̀l Gé Gbáá 1914 vaá ò bugi togó bel ea kọ́ọ̀ “Ténì Nen E Bà Di Boo Nom̀ Teeá Tõó Dọ̀ Éé?”

•    Kpá Káí fáálá gbò bel dùùlà bá deè tṍ ea é láá nvèè bá nei kọ é emá gbò tàvàlà dìtõ̀ò e gé téní bá, bã̀àna tṍó e kpeè sĩ́ ló àgẹ kiì gyã́á nè kíì gyã́á. Ẹ̀b sìgà nu dòòmà bá mm̀ togó bel ea kọ́ọ̀ “Sĩ́deè Ge Láá Tú Ńkem̀ Nu Tõ̀òma Dùm.”

•    Kpá Káí ne nài gé ból dẽe sĩ́ kọọ̀ nu é beè dú lé. A zigà kọ à íe tṍó e “gã́bug súú súú gyã́á é ḿḿ-má boo kunukẽ̀í” vaá kọ̀láá nen é íe nu gè dè ea é gbõomá vá ló. (Psalm 72:16) Kọbé ò kpáá nyimá gã́bug nú ea kil ló ból dẽe sĩ́ e Kpá Káí zigà nyòòmà dì deè sĩ́ nè nú ea náa òó láá dẹlẹ nyíé boo, bugi togó bel ea kọ́ọ̀ “Kà Kà Ból Dẽesĩ́ Ea Kil Ló Lé Dì Deèsĩ́.”