Éé ní ea ólò dọ̀ ní nyíe tṍó eo dã́à mòn bel ea kọlà “apocalypse” e? Òó láá dòòmà dẽe ló gbele agẹ bá tã̀àgã̀ ea é nááá zìvèkà bàlà booí, be à sẹlẹ ní ea é nveè kùbmà ló dùm kọ̀láá nen ea di boo kunukẽ̀í. Sìgà gbò zigà kọọ̀ níà íb nú ea é gé naaá ló bàlà booí é, èlmà tõ̀ò tṍó e bà bugi gbò kpẹ̀a ea dì belí vóí:

•   “Bé gím e bà tú bóm̀b ea ólò palàge kyọ̀sĩ́ nu beemá—Íb béí é láá beá tṍó e bà noo, mm̀ bùló, àbèè boo béè lọ̀ dànù ea bã́ kẽ.”—Bulletin of the Atomic Scientists.

•   “Mm̀ òb gbáá ea kil nvéeá, gã́bug agẹ bá ìlìsẽ́ ea kyọsĩ́ nu a ulà, sã́ a dọgàgi ló kọ̀l, kã́á kãà kẽ a nááá sìgà ketõ̀ò, kpá ló gbò coral ea di kètẽ́ múú a kiià boo béè gã́bug agẹ bá nú ea ni nááa vá ló, gbele bẹ̀à sã́ fọ́ọ́lọ́ a ulà, vaá tù múú a nááá beeá ló bàlà booí.”—National Geographic.

•   “Gbò ńgùlù bèè a kpáá palàge kyọ̀sĩ́ nu mm̀ dó Africa èlmà bé ea beè dì naá mm̀ gbò gbáá ea kil nvéeá.”—The Associated Press.

 É kọọ̀ zivèkà boo kunukẽ̀í é gé kyọasĩ́? Éé ní e Kpá Káí kọ́ẹ́?

 Ẽ́èe. Kpá Káí náa kọ é nyimá kọọ̀ boo kunukẽ̀í é di dọ̀ dè-dè. (Ẹ̀klìsíástìs 1:4) Tãa vó e Bàrì kyọ sĩ́ zivèkà boo kunukẽ̀ ea beè dèmí, àé beè “kyọ̀ sĩ́ gbò e bà gé kyọ bàlà booí.”—Kùùà Nù 11:18.

 Dẹ̀ẹ̀a boo nú ea di mm̀ Kpá Káí, “bàlà boó” ea é íná kùbmà dú gbò e bà lọl togó kèbá Bàrì vaá naa ba lee ló. Bàrì é kyọ sĩ́ “gbò e bà náa fã́e” belí bé ea beè naá deè Nóàa—2 Pítà 2:5; 3:7.

 Dì belí bé e 1 Jọ́ọ̀n 2:17 kọ́ naa, “bàlà booí nè dénè a kpéè é téní tà.” Nakà gã́belí zógè kọọ̀ Bàrì é kyọ sĩ́ gbò e bà náa fã́e, níì boo kunukẽ̀í nì.

 Kpá Káí náa kọ́ nèi kà lèlà tṍó e kùbmà é bã́ ló. (Máátìù 24:36) Sõò, à kọ́ nèi gbò nú ea zógè kọọ̀ kùbmà a íná kuló. Nee gbò nú e Kpá Káí beè tú tṍó gbẹẹ́ sĩ́ kọ̀í:

•   Gbò nú ea dì belí bé, kíì gyã́á, pẹ̀ẹ̀ kòm, nè zùgà kunukẽ̀ “é nááá kele-kele ketõ̀ò.”—Máátìù 24:3, 7, 14; Lúùk 21:10, 11; Kùùà Nù 6:1-8.

•   Gã́bug nen é íe kà agẹ bá dùm kùlù kúlù. Dì belí nu dòòmà bá, bàé “vulè kpègè,” “bà náa é mon lé,” vaá “bà náa é lẹẹlà bel ló ba lóó.”—2 Tímotì 3:1-5.

 Gã́bug nen zigà kọọ̀ lọ̀l gé tã́gíní gbàà 1914, gbò nú ea gé nááá bàlà booí gbááá ló nu e Kpá Káí beè kọ́ nyòòmà ge kọọ̀ ke kùbmà bàlà booí a íná kuló. Ge kpáá dã́ bọ̀ọ̀vẹ̀, bugi gbò togó bel ea kọ́ọ̀, “What Does Bible Chronology Indicate About the Year 1914?” nè “What Is the Sign of ‘the Last Days,’ or ‘End Times’?”

 Kà lèlà moǹ bel Gríìk e bà tàbmà “apocalypse” mm̀ Kpá Káí tõó dọ̀ “ge naa kọọ̀ nen á mòn” àbèè “ge tẹlẹ bàlà kẽ.” Gã́bug tṍó nakà moǹ belí ólò bọ̀ọ̀gẹ̀ loá bel nyòòmà ge tú nú ea beè di ke gũ̀a tẹlẹ bàlà kẽ. Kpá Káí ló bel ea kil ló “kùùà nù [àbèè, ge naa kọ é mòn] Dõò Jíízọ̀s,” ea é nááá tṍó e Jíízọ̀s é dọ́ bàlà kẽ dì belí nen ea íe kpóó ge lọ̀lmà kọ̀láá kà pọ́lọ́ lab dògò boo kunukẽ̀í, vaá nè kpẽ́ gbò e bà fã Bàrì.—2 Tẹ̀sàlónaikà 1:6, 7; 1 Pítà 1:7, 13.

 Dee deè nvéè kpá ea di mm̀ Kpá Káí kọlà A·po·kaʹly·psis, àbèè Kùùà Nù, boo béè kọọ̀ à kọ́ gbò nú ea é nááá dì deèsĩ́. (Kùùà Nù 1:1) Nakà kpáá fáálá lé kpẹ̀a nè lẹ̀ẹ̀la tóm ból dẽesĩ́. (Kùùà Nù 1:3) À zógè kọọ̀ Bàrì é lọl kọ̀láá íb pọ́lọ́ bèèla vaá naa kọọ̀ boo kunukẽ̀í à dú Páladaìs. Tṍóá, nu náa é nyááná ló gbò nen, bà náa é mon na tã̀àgã̀, àbèè ge ù.—Kùùà Nù 21:3, 4.

 É kọ àé léémá ni gè kpáá nó zivè tõ̀ò nú ea kil ló nagbò lé zìgànù ea di mm̀ Kpá Káíí? Gbò Neǹ Ditõ̀ò Jìhóvà íe nòònù ge noòmà Kpá Káì nen e nóo é kpẽ́ kpègè ló ea é láá nvèè bá nè ni. Òó láá bĩ́íná enè ọ̀và kọ á noòmàè ni Kpá Káí?