Ə́ kiliŋahiɛ mɛnii ŋɛi ɓa : Kathy aa li pə́lə́ kɛɛnaa ta. Miniti 10 aa tɛɛ lɔ, gɔlɔnmun da woo yɛ tɔɔ bulu yɛ kɛ ma.

Kathy aa tinɛn aa məlanmun Jacky kaa lɔɔ kpowo hweelɛ yɛ ɓo ɲəi naaɓoɔ. Jacky aa nɔɔ kpowo tɔnɔ lɛ Kathy ɓa yɛ ma, “ Hó kɛ máá ə́ tiikpəi nii, ə lɛɛ hwá pɛli pə́lə́ kɛi woloɓo ! ”

Kathy kaa bɔ ə lənə ma, kəlaa Jacky kaa a məlanmun. Ə lɛɛ Kathy ho bɔ Jacky ho kpaan ɲəi. Yili pulu, Jacky kaa a nɛɛnon da yii ŋɔ mɛni lɛlɛɛ. Ə lɛɛ Kathy kaa kɛi ma a nɔɔ ta kpələ, yili ho ɓaa mɛni ɲɔnwɔɔ. Gaa moi gwəi pələ yɛ kɛ ma “ lɔɔ lɔ ka tii, gbəlɛɛ ho yɛ nu a kɛi zalan gbala tɛ. ”

Mɛnii ŋɛi Kathy ə kɛ ɉu, akɛ kɛ a yɛ́ lə ɓə ə́ li gɛ ?

Ə gɛ ə́ kili túwɔ́ ɓo mɛni huwui ŋɛi hu, maanɛɛ ə́ kɛ a ə́ kpɔɔ kɔlɔnŋaa. Da kɛ ma ə́ kɛ a ə́ kpɔɔ kɔlɔnŋaa, yili mukulaa ɓaa ə́ kɛ a gɔlɔnŋaa pələi ə́ kaa bɔ ə́ túwɔ́ pələ ə kɛ la, ə lɛɛ mɛniɠaai ə́ laana, ə́ kɛ a gɔlɔnŋaa. Yili a kpɔnmaa tɛɛ ə́ pɔ ə́ ŋaawoo ə kɛ ə́ kpɔɔ la, hɛnigɛ ə́ ŋaawoo ə kɛ nu takpɛliɠaa la (Kɔlɛntə dɔlɔɔ 9:26, 27).

Ya tɛɛ ləi ə́ hu ə wala-wala yili kɛi ? Gɛɛmaalənŋaa ŋɛi mukulɔ gbea tɔwɔ.

Mɛniɠaai ə́ yee a pɛli ma, ya kɛ a gɔlɔnŋaa, yili a gɛ, hwa səka-səka.

KƆƆMAA YII A KULƆ BIBLƏ HU : Apɔtɛlɛ Pɔli ə bɛɛn yɛ ma : “ Ŋá gɔlɔn gɛ́ diɛ : Náákpan ɉu ho tee li mɛni ɓoi, kɛlɛɛ, mɛni kɔlɔn ŋaa nwɛi gaa ɲə́i ” (Kɔlɛntə veelɛnaa 11:6). Pɔli ə kɛ a Biblə kɔlɔnŋaa kpɔ a neelee, yili ə kpɔnmaa tɛɛ bɔ, nua di ho viikpɛɛ ŋɔ Yálá mɛni hu. Nu taɠaa di kɛi naa ɲɔnwɔɔ ɓo, kəlaa yili ho ɉu pu ma (Kɔlɛntə veelɛnaa 10:10 ; 11:5).

Ə́ KPƆƆ MAAKPƐƐ: Mɛni ta pɛɛn ɓɛ, yii ə́ wɛlɛɛ gɛi.

Ya kɛ a ə́ kpɔɔ kɔlɔnŋaa a neelee, ya kɛ yɛ wulu yii ɉamu hwilɛnŋaa kpɔ kpaan. Tulɔ hwaŋa kɛnɛ ə ma tɛɛ, mɛni ta hwa kɛ la.

Yɛli hu ə ma wala-wala, dee pɔɔ a kɛ ma, ɉu tee laa a nɛɛ. Mɛniɠaai ə́ hwiikpɛɛ ɉu, diɛ kpɛli di yee a tɛɛ yɛ́ ə́ wɔ yɛnɛɛ hu, ə́ wɔ tuwɔpələ lɛlɛɠaa ɲɛi a paa.

KƆƆMAA YII A KULƆ BIBLƏ HU : Apɔtɛlɛ Pɔli ə kɛ a gɔlɔnŋaa lə mɛni ɓə viikpɛɛ ɉu. Ə bɛɛn yɛ ma : ‘ Gwə́inɛɛi, Yálá ŋɔ tɔn lɛlɛɛi. Kɛlɛɛ, ŋá tɔn da kpɛli kaa gɔ́lɔi yɛ kɔ pɛlɛ ŋɔ kiliŋahiɛ lɛlɛɛ ɓa yɛ gɛ́ a nɛŋɛn ŋɔ luwɔ ’ (Rɔmu 7: 22, 23).

Ə́ KPƆƆ MAAKPƐƐ: Lə mɛni ɓə ə́ hwiikpɛɛ ɉu yii maanɛɛ ə́ yee ə tɛɛ ma ?

Ya pɛli tɛi mɔbili ta hu ə lɛɛ yɛ́ ɉiɛmun ma ə kɛ lɔ ma yɛ pɛlɛɠaa maatinɛn ə lɛɛ ɉu nwɔnɲa ə kpɛɛ mɔbili hu ? Yili a kɛ a kilikpɛɛɲəi, da wali hukalaa !

Kili ləkɛɛ ɓə yili a dɛɛ gu pɔ ? Ya mɛni ta həɠə ɉu yɛ́ ma ə́ kaa gɛi, ə́ wɔ yɛnɛɛ a kɛ a ɉeɛ gbaŋa ə lɛɛ hwá kpaŋo lɔ kɛɛnaa tɔnɔ ɓa yɛ́ tinɛn. Ə́ gɔlɔn ɓɛi ə́ kaa lii laa da pələi ə́ kaa lii la.

KƆƆMAA YII A KULƆ BIBLƏ HU : Apɔtɛlɛ Pɔli ə bɛɛn yɛ ma : “ Gáá gilɛ həɠəi, ɉɛn gáá maa gilɛ həɠəi ɲɛ́i heɛ ma ” (Kɔlɛntə dɔlɔɔ 9:26). Pɔli ho kɛ a nuta yii pələi lɔ mɛniɠaa da kulɔ la, bələ lɔ ɓə a gbɛtɛ la. Ə kɛi ŋɔ mɛniɠaa hee gbaŋa, yɛ ɲɛi lɛɛ ma yɛ gɛ (Filipə 3:12-14).

Ə́ KPƆƆ MAAKPƐƐ: Mɛni haaɓa pɛɛn ɓɛ yii ə́ kaa bɔ ə́ gɛ gwəlan ŋɛi pai.

Akɛ mɛni ta ho laa yii ə́ laana, ya kɛ a nui a tɔɔ takpa-takpa. Ya kɛ lɔ yɛ loolowolo. Ya ə́ ɓəlaa kaa lɔ mɛni ta hu, ə́ too di pɔ ə́ kɛ yɛ diɛ. Yili yaan a nɛ yɛ hó gɔlɔn gbɛɛ kpɔkpɔ ɓaa yɛ́.

Kəlaa akɛ ə́ kɛmɛniɠaa hwilɛnŋaai ə́ wɔ laanalaa mɛi, ya lɛɛ a ə́ kɛ pələ, ə́ ɓəlaa di ma mɛni lɔpee gəlee kɛ.

KƆƆMAA YII A KULƆ BIBLƏ HU : Ɓɛlowai Yálá ŋɔ loloɓomun Daniyɛli ə kɛ nii la a muhəɠəninɛ, ə naa gwəi yɛ ma gaa lɛɛi Yálá ŋɔ tɔnŋaai pulu (Daniyɛli 1:8). Yili ə gɛ ə lɛɛ a yaa kpinii. Daniyɛli ə kɛi tuwɔ a ŋɔ laanalaa pɔ yii ɓo pələ.

Ə́ KPƆƆ MAAKPƐƐ: Lə mɛniɠaa ɓə ə́ laana ? Gɔɔmaa ta ka : Ə́ laai Yálá la ? Ya kɛ ma ee, lə mɛni ɓə ə́ laa la na ? Lə ɓə a nɛ yɛ́ yɛ ma Yálá kaa laa ?

Ə́ laana yɛ́ ma Yálá ŋɔ tɔn-nwooɠaai da pɛli ə́ wɔ yɛnɛɛ tənəndɔɔ a nɛlɛɛ ? Ya kɛ ma ee, lə mɛni ɓa ?

Akɛtii kea, lə ɓə ə́ kaa bɔ ə́ kulɔ ma : ə́ kaa bɔ ə́ kɛ yɛ laakpala yii hwaŋa wolo tiikpə a ɉəɠə, ɓaa ə́ kaa bɔ ə́ kɛ yɛ wulu yii tulɔ hwaŋa hwa hɛnda kɛ la ? Mɛniɠaai ə́ laana, da yiiɠaa ə́ kaa bɔ ə́ gɛ, ya kanan diɛ kpɔ kpaan, ə́ kaa pai kɛi yɛ nwului tii tulɔ hwaŋa hwa hɛnda kɛ la. Ya gɛ tii, ə́ kaa pai gɔlɔn ɉii nui ya ɓaa yɛ́.