Ə́ kiliŋahiɛ mɛnii ŋɛi ɓa : Zalikwɛlɛ lɔwɔ yələ midi tɛɛ pulu, Georges kaa-kwəlan gaa 17, aa kpɛɛ a ŋɔ kólóɠaa ə lɛɛ yɛ viitɔɔ. Aa hee niiɓa kpəlin ɉu ə lɛɛ aa télé ɲaatɛ yɛ ɉukaa.

Naalowai kpɔlɔɔ ɓə nan aa lɔ la Salɔn mu, nii aa holi yɛ ma :

Akɛ yɛ́ ɓə tii kɛ a Georges, lə ɓə ə́ li gɛ yii yaan nwoohukulɔi tii ho too ka ə́ nan ka lowai ?

Ka ə́ wɔ nua ka kɛi hwaa, gaa lɔ yɛ ya kɛi mɔbili hiɛ. Bələ a too ə́ tɔwɔ, ya pələ takpɛli həɠə.

 GƆƆMAA TA KA :

Lucie kaa nwoo laai yɛ kɛ ma “ Gɛ laa walaai ŋi hwaa nán bɔ. A kɛ a lowai taɠaa, ŋa kɛi hwaa bɔ, yɛ nwóó pulu pənə yɛ kɛ ma : ‘ Mááhwaalɛɛ, ə́ kɛi hwaa bɔ li ? ’”

LIƐWOO HAAƁA KAA LAA YII LUCIE A PƐLI DƆNƆ HƏƓƏI ɈU.

1. Ə yaman nan mɛi.

   Lucie ə toma yɛ ma : “ Mɛni wala-wala katii ! Maanɛɛ ə́i wəli tɔɔ ! ”

2. Hwa kea pənə ho mɛnii tii ɓo nan ma.

   Lucie ə naa gwəi yɛ ma hwa kea mɛnii tii ɓo nan ma.

3. Ə naa maakpɔn ə pa mo ma a moi lowai lɛlɛɛ.

   Lucie ə mɛnii tii ɓo pulu ɓa da nan di nu hweelɛi di lowai.

Niɛwoo haaɓai tii nɛlɛ ɓə ya gɛ Lucie ɓa ?

Ə́ KILIŊAHIƐ : Lucie nan ɲɛi kaa mɛni takpɛli ɓa : Ho gɔlɔn yɛ mɛnii tii heɛi non ɉu. Yili ɓa, Lucie a Niɛwoo Doloo həɠə ɉu, nan hwa ɲaakaa lə mɛni ɓa non gaa tomai mɛi. Yili a pɛli ə gɛ Lucie nan va nwəli tɔɔ ma, ə lɛɛ ho li nɛ yɛ a nan maawiɛ (Efɛsə 6:2). A teɲa, mɛnii tii kpɛtɛ pələ lɛlɛɛ hwə li.

Niɛwoo 2 naa ɓə gɛ laa nɛɛ ə hwilɛn bulu, kəlaa ho lɛlɛ li. Lə mɛni ɓa ? Maahɔlɔɓo, mɛni a kɛ Lucie ɓa, maanɛɛ ə ɉukulɔ nan ma. Nan yaan, ə gɛ ə kpɔnmaa tɛɛ non bɔ, maanɛɛ ə kɛ a gɔlɔnŋaa yii tɛɛi non ŋɔ yɛnɛɛ hu. Lucie ŋɔ mɛni kpɛtɛ pələ lɛlɛɛ hwaa ə mɛi haa.

Niɛwoo 3 naa nwɛi, Lucie ho nɛɛ li laa mɛni ta ho kpean dɔwɔ. Aa ɉəɠə ɉu yɛ ma gaa pai mɛnii tii ɓoi a lowai takpɛli. A pɛli nwɔnɔ ə hɛɓɛ kɛ ə dɛɛ nan bɔ. A gɛ tii, nii a laa kiɛ pulu ɓa.

Lucie a ɉəɠə ɉu yɛ ma gaa hɛɓɛ kɛi, yili a kpɔnmaa tɛɛ bɔ ə gwəi woo ɓo. Nan a pa ɉɛɓɛ ɓoi, a ɲaakaa yii non ə kɛ bɔ ə mo da yii kɛ ɉeɛ ɉu. Niɛwoo 3 naa lɛlɛɛi Lucie ɓa, nɛlɛɛ nwɔnɔ nan ma. Yɛ ə kɛ di nu hweelɛi di lowai, yɛ ə kɛ a hɛɓɛ, mɛni kpɛtɛ pələ huwui tii hwilɛnŋaai Biblə ŋɔ liɛwoo ta ɓa. Gaa kɛi ma : ‘ Mɛnii a pɛli liilaa tɛɛi nua pɔ, [...] ka gu yili kwɛli ’ (Rɔmu 14:19).

Liɛwoo takpɛli ləkɛɛɠaa ɓə ə́ kili kaa ma yii Lucie a pɛli hwilɛn ɉii bulu ?

Da a pa ə́ kili pɔ, bɛɛn ɓɛ ɉɛɠɛɛ, ə lɛɛ ə́ mo pələi mɛnii tii laa a kulɔ la.

Ə́ kili lɛɛ ɉu yɛ́ ma ya pɛli ə́ mɛni ta ɓo, ə́ kaanua di ɲaakaa a dakpɛli.

GU GƆƆMAA HƏƓƏ :

Ə́ kaanua daa ə́ maaləngɛ diɛ yɛ́ lə mɛni ɓa ə́ kwəi ho nɛɛli ? Ə́ di woo pulu pənə yɛ́ ma : “ Və́ bɔ ŋi ɉukulɔ nuta ɓa. ”

Kəlaa ə too di wəlii yɛ ya kɛi kɛ ma : “ Və́ laa li ka la a neelee. Gáá pai ɉukulɔi mə́laa diɛ, kəlaa kaa hwəi. ”

Ə́ kiliŋahiɛ lɔ yɛ ya kɛ mɛni wala-wala ta hu ə lɛɛ ə́ kaanua kaa bɔ di kpɔnmaa tɛɛ ə́ pɔ. Kəlaa ə́ mo diɛ yɛ́ diɛ : “ Ka ho ka liihɛlɛn. Ɲáá dɔnɔ ŋa pɛli gbɛtɛi ?

• Da pɛli ɲaakaai yɛ ya kɛi kɛ ma ?

• Vialaɓoɔi kiɛ yɛ́ ma ?