Ə́ kiliŋahiɛ mɛnii ŋɛi ɓa : Záán da məlaa daa lɛɛ balon gɛlɛi, Záán aa balon bili ə lɛɛ balon aa too nuta ŋɔ mɔbili mɛi aa viitɛlɛ wolo.

Akɛ yɛ́ ɓə tii kɛ a Záán, lə ɓə ə́ li gɛ ?

LIƐWOO HAAƁA KAA LAA YII YA PƐLI DƆNƆ HƏƓƏI ɈU :

1. Ə́ tɛɛ a gilɛ.

2. Ə́ nwulu hee nu takpɛli nwuɔ.

3. Nui ə́ ŋɔ mɔbili kala, mɛnii tɛɛ ə́ ɉukulɔ ma, ə́ nɛɛmaa hwə ma ə lɛɛ ə́ mo ma yɛ́ ma ə́ kaa bɔ ə́ kpɔnmaa tɛɛ mɔbilii tii kpɛtɛ mɛni ɓa.

Gɛ laa nɛɛi ə́ hwilɛn niɛwoo doloo pulu. Kəlaa nɛlɛɛi ə́ hwaa ə́ hɔn ma, yɛ ə kɛ a viitɛlɛ wolo mɛni, yɛ ə kɛ a mɛni takpɛli.

1. Yili ɓə maanɛɛ gu gɛ.

   Biblə kaa kɛi ma : “ Ku kili laa teɛi kpɔ a nɛlɛɛ, kuɔ diɛ, ku kwəi kwəlɛɛi, kuɔ túwɔ́ a nɛlɛɛ mɛni lɔpee gəlee hu ” (Hebulu 13:18).

2. Nu a hwaa ɉɔn ma, gɛ laa nɛɛi di maahwaalɛɛ.

   Biblə kaa kɛi ma : “ Nui a ɉɔn noo, hwa tɛ tɔwɔ. Kɛlaa, nui a hwaa ɉɔn ma, ə kpəla ma, maa nu ɓə Yálá a ɲɛi maawɛli kaa ” (Haŋɔn 28:13).

3. Yii kpɔ nɛlɛɛ, ya ɓaa a Yálá kwəinɛɛ mɛni.

   Biblə kaa kɛi ma : ‘ Tuwɔpələɲɔngɛmun nwɛli ho Zehova ɓa, Kɛlaa, nu haŋaaɠaa wɛli kaa ma ’ (Haŋɔn 3:32).

Karina kaa-kwəlan gaa 20. Ə kɛi mɔbili gilɛ həɠə kɛnɛ. Di ɉon diɛ ma ə dɔn ɉala. Ə kɛ bɔ ə mɛnii tii loo nan ma. Kəlaa nan ə ɲaakaa a holo ta. Karina ə mo yɛ ma : “ Kwəlan dɔnɔ tɛɛ pulu, nán ə ɲaakaa, ə lɛɛ yili ə hee ɉú kpɔ kɛnɛ ! ”

Kili ləkɛɛ ɓə gwa ɉɔlɔɓo yili hu ? Karina kaa kɛi ma : “ Ya ə́ hɔn gɛ, yɛ́ noo, ɉu a kɛ lɔ ma yɛ kɛnɛ. Ya ɉu mɔnɔ mii pulu ɓa. ”

Biblə kaa kɛi ma : “ Gu lan bələ huwu tamaai ” (Zaakə 3:2). Yɛ pələi gu gaa la, nu a hwaa ɉɔn ma kpɔlɔɔ ɲaaɓa, yili a nɛ yɛ maanu a gbɔɔ maayɛɛ, yɛ nu kɛnɛ kiliŋahiɛ kɛ.

Yili pulu, ya ə́ hɔn gɛ, maanɛɛ ə́ kili hɔlɔɓo ɉu. Nɛɛnon da yii da kɛ ma Vera ə mo yɛ ma : “ Ŋa hɔn da kɛ, ŋa gaa gɛ́ ma máákwɛli pələ ta li. Ə lɛɛ ŋa kili ta hɔlɔɓo ɉu yii pai kpɔnmaa tɛɛ bɔ́ dúwɔ́ pələ lɛlɛ yee ta ə pɛlɛ ma, ə lɛɛ mɛnii tii ta a kɛ pulu ɓa, ŋi túwɔ́ a dakpɛli. ” Gu gaa pələi ya pɛli yili kɛi la.

Ya ə́ nan ŋɔ kwɛlihoo hwɛli ma ə lɛɛ ə kala, lə ɓə ya gɛ ?

• Hó mo, ə lɛɛ yɛ́ kɛ ma ə́ nan və pai ɲaakaai.

• Ə́ teɲa ɓo ə́ nan ma.

• Pələi mɛni ə tɛɛ la, ə́ ɉukulɔ ə́ nan ma. Kəlaa ə́ nwulu hee nu takpɛli nwuɔ.

Hó hɔlɔɓo li lakwəli taa mahɔlɔɓo hó gɛ hó hɛɓɛ maakwɛli, lə ɓə ya gɛ ?

• Yɛ́ ma nakwəli wala-walaa kɛ.

• Ə́ ɉukɔlɔn yɛ́ ma hó nakwəli kɛ a nɛlɛɛ.

• Yɛ́ ma ə́ hɔn gaa ə́ kalamɔɔ kwəi.

 Nakwəli mɛnii ŋɛi gu kaa moi, gu pənə gu pa mɛi, ə lɛɛ ə́ ə́ kiliŋahiɛ lɔ yɛ ya kɛ a 1) ə́ nan 2) nakwəli kalamɔɔ. Ya ə́ hɔn gɔlɔn kɛ kpɔlɔɔ ŋaaɓa, ə́ nan da ə́ kalamɔɔ dəli di kiliŋahiɛ ləi yɛ́ ? Ya ə́ hɔn gɛ yɛ́ noo, da di kiliŋahiɛ ləi yɛ́ ?

Ə́ kiliŋahiɛ kea ə́ hɔn da ɓa yii ə́ gɛ a gwəlan ŋɛi tɛɛ, ə lɛɛ ə́ gɛɛmaalənŋaa ŋɛi mukulɔ.

Hɔn nəkɛɛ li kɛ ? Ə́ túwɔ́ ɉu ləi ?

• Ŋi noo.

• Ŋi nwulu hee nu takpɛli nwuɔ.

• Ŋi hwaa ɉɔn ma kpɔlɔɔ ŋaaɓa.

Akɛ hó hwaa ə́ hɔn ma, lə ɓə yili ə gɛ yɛ́ pulu ɓa ?

• Gwə́i ə nɛɛ : mɛnii tii ə həɠə nwə́li pulu !

• Liihɛlɛn ə too máá : maanɛɛ kɛ ŋi teɲa ɓo.

Ya pɛli kɛ mɛnii tii hon ɉii ləi a nɛlɛɛ ?

Kili ləkɛɛ ɓə ə́ ɉɔlɔɓo ɉu ?

Lə mɛni ɓa nu taɠaa di hwa kɛ hwaai di hɔn ma ?

Ya kɛi ə́ hɔn noo, nua da ə́ kaa ləi ? Kəlaa ya kɛi hwaa ə́ hɔn ma, da ə́ kaa ləi ? (Lukə 16:10).