ƝAAKWƐLƐI 16

Ɓɛlowai Zesu ə kɛ la lɔi mɛi lə ɓə ə gɛ ?

NWOO MƐN

Nutaɠaa da kɛ lɔ nii Zesu kaa yɛ lon dala, daɠaa diɛ gaa yɛ nui gaa ɉaa lii tɛi, ə lɛɛ daɠaa diɛ gaa yɛ nui lɔ ŋɔ mɛni lɛlɛɛ. Kəlaa mɛniɠaa kpɔ Zesu ə gɛ ɓɛ lɔi mɛi, lə ɓə yili a nɛ guɔ yɛ hwilɛn na ma ? Ɲaakwɛlɛi ŋɛi hu, mɛni kpea-kpeaɠaa kpɔ Zesu ə gɛ lɔi mɛi, gu kaa pai daɠaa kaai, ə lɛɛ gu kaa pai gaai pələi yili a kpɔnmaa la ə́ pɔ.

1. Kóló ləkɛɛ ɓə kɛ a Zesu kɛ kóló wala-wala ?

Zesu kɛ kóló wala-walai kpɔ kɛ ma ya ɓaa kɛ ə “ Yálá Taa Tɔɔlaa maawɛlɛɛ lɛlɛɛ laahəli ” (Lukə 4:43 ɓo). Nwɛlɛɛ lɛlɛɛ ə kɛi naahəli ya ka : Yálá kaa pai Tɔɔlaa ta hei, yii pai nukanŋaa maakpaanŋaa kəlee ɲɛi kulɔi. a Kwəlan ɉaaɓa da gbulɔ yee mu Zesu ə kóló kɛ kpɔ a nwala-walaa yɛ nwɛlɛɛ lɛlɛɛ tii laahəli nukanŋaa diɛ (Matie 9:35).

2. Gbalo mɛniɠaai Zesu ə kɛi gɛ nwun maa kɛ a lə ?

‘ Gbalo mɛniɠaa da gwəi pilimaa mɛniɠaa Yálá ə gɛ Zesu haalai ’ Biblə a di maamɛni ɓo (Gɛlaɠaa 2:22). Zehova ŋɔ huwala-wala haalai, Zesu ə pɛli hwaŋa kɛnɛ ta kɔlɔ haa ma, ə nu kpulu kɛnɛ kɔnɔn gɛ, ə ɲɔngɛnua kɔlɔipono, ə lɛɛ ə haaɓəlaa nwun (Matie 8:23-27 ; 14:15-21 ; Markə 6:56 ; Lukə 7:11-17). Gbalo mɛniɠaa Zesu ə gɛ di nɛ kpɔ a neelee diɛ ma Yálá ɓə dɔɔ. Da nɛ kpɔ nwɔnɔ a neelee diɛ ma huwala-wala kaa Zehova yəi yɛ pɛli gu maamɛniɠaa kəlee kpɛɛi.

3. Kili ləkɛɛ ɓə gwa pɛli ɉɔlɔɓoi Zesu ŋɔ yɛnɛɛ hu ?

Zesu ə lɛɛ Zehova woo mu mɛni kəlee hu (Ɉaan 8:29 ɓo). Zesu ə Nan Yálá liiɓa mɛniɠaa kəlee kɛ, ə yili kɛtii ŋɔ yɛnɛɛ kəlee yee mu ɓɛlowai ə kɛ la ɓɛ lɔi mɛi, pələi ma nu tamaa di kpean na dɔwɔ. Ə nɛ yɛ ma nukanŋaa da pɛli di kóló kɛ Zehova ɓa ə ma kɛ mɛniɠaa kɛ laa ho nɛɛ li. Yili ɓa Zesu ə ‘ kɔɔmaa lɛɛ gu yəi yii yaan guɔ pɛli hwilɛn ɉii bɔɔ ɲa ’ (Piɛrə dɔlɔɔ 2:21).

Ə́ WƆ MƐNIKƆLƆNŊAA TA PƐLƐ MA

Gaa pələi Zesu ə wɛlɛɛ lɛlɛɛ laahəli la nua diɛ, ə lɛɛ pələi ə kpalo mɛniɠaa kɛ la.

4. Zesu ə wɛlɛɛ lɛlɛɛ laahəli nua diɛ

Ə gɛ Zesu yɛ pɛli nwɛlɛɛ lɛlɛɛ laahəlii nu tamaa diɛ, ə kɛi hiɛ muluun gbala pələ mɛi yɛ li kɛɛnaa kweaa ɓa. Lukə 8:1 ɓo, ə lɛɛ ka lono kɛ gɛɛmaalənŋaa ŋɛi mɛi :

Nua lɔ kɛi pa Zesu pɔ diɛ di wəlitɔɔ ma, diɛ lɔ ɓə ə kɛi Yálá Lawoo laahəli diɛ ?
Zesu ə gɛ ləi yɛ pɛli nua maahɔlɔɓoi ?

Yálá ə nɛɛ tɔwɔ ə mo yɛ ma Kristə ə kɛi pa nwɛlɛɛ lɛlɛɛ laahəlii. Esai 61:1, 2 ɓo, ə lɛɛ ka lono kɛ gɛɛmaalənŋaa ŋɛi mɛi :

Zesu ə nolowoo ŋɛi laahwɛɛ ləi ?
Ə́ wɔ kili ɓa nukanŋaa maakpaan gaa nwɛlɛɛ lɛlɛɛ ŋɛi mɛn mɛni ɓa háákələi ?

5. Zesu ə teɲaɠaa kalan yii tɔnɔ kaa ma kpɔ a neelee

Zesu ə nwɛlɛɛ lɛlɛɛ laahəli yii vilɛnŋaa Yálá ŋɔ Tɔɔlaa ɓa, ə lɛɛ ə teɲaɠaa kalan diɛ gwa pɛli di tɔnɔ kulɔi kpɔ a neelee. Galan ŋɛi Zesu ə gɛ ɲee tona, kɔɔmaaɠaa kaa diɛi da kulɔ galan tii hu. Matie 6:14, 34 da 7:12 ɓo, ə lɛɛ ka lono kɛ gɛɛmaalənŋaa ŋɛi mɛi :

Liɛwoo lɛlɛɛ ləkɛɛɠaa ɓə Zesu ə dɛɛ vɛlisɛɛɠaa tii hu ?
Ə́ wɔ kili ɓa niɛwooɠaa tii tɔlɔ kaa lɔ nii diɛ háákələi ?

6. Zesu ə kpalo mɛniɠaa kɛ

Zehova ə kpalo mɛniɠaa kɛ mɛni ŋɔ huwala-wala tɛɛ Zesu pɔ. Gɔɔmaa tɔnɔ kaa. Markə 5:25-34 awala kɛtii ə́ VIDIO kaa. ə lɛɛ ka lono kɛ gɛɛmaalənŋaa mɛi.

VIDIO : Zesu ə ɲɔngɛ nɛɛnu ta kɔlɔipono (5:10)

Nɛɛnui ŋɛi maamɛni ɓoɔ vidio hu, yai gɔlɔi ho kɛ pono li, lə mɛni kpɔ ɓə kɛ naana kpɔ a neelee ?
Gbalo mɛnii ŋɛi Zesu ə gɛ, lə kpɔ ɓə nwɛli aa too yɛ́ ɉu ?

Ɉaan 5:36 ɓo, ə lɛɛ ka lono kɛ gɛɛmaalən ŋɛi mɛi :

Lə ɓə Zesu ŋɔ kpalo mɛniɠaa di nɛ yɛ hwilɛn na yaa kpinii ma ?

Ə́ kili kaa ɉu ?

Mɛniɠaai kpɔ gu gɔlɔn yɛ hwilɛn na Zesu ɓa, mɔlɔmun a kulɔ Biblə ŋɔ hɛɓɛ yili naan ŋɛi hu diɛ da kɛ diɛ Evanzilə : Matie, Markə, Lukə, da Ɉaan. Evanzilə pɛɛnnua di mɛni tɛi-tɛiɠaa ɓo vilɛnŋaa Zesu ɓa diɛi di ho kɛ tanɔn. Mɛniɠaa tii kəlee pɛlɛɛ gee ɓa a kpɔnmaa tɛɛ gu pɔ gu Zesu kɔlɔn kpɔ a neelee.

MATIE

ya ɓə kɛ a nu doloo yɛ ŋɔ Evanzilə pɛɛn. Zesu ŋɔ kalan-nwooɠaa ɓə ə kɛi maamɛni ɓo gəlee ə ma gɛ yii Zesu ə galan yɛ hwilɛn na Yálá ŋɔ Tɔɔlaa ɓa.
MARKƏ

ya ɓə ŋɔ Evanzilə kpuaa dɛɛ məlaa di wɛi ɓa. Ə Zesu kɛ mɛniɠaa tamaa hukulɔ kpɔ a kpaalə ta yii a nu kwəinɛɛ kpɔ kɛnɛ.
LUKƏ

nwɛi Yálá hwɛliɛ kpɔ ɓə ə gɔwɔ hwilɛn mɛi kɛnɛ. Da pələi Zesu ə kɛi tuwɔ la a nɛaa.
ɈAAN

mɛniɠaa Zesu da məlaa leeleeɠaa di kɛi lono kɛ mɛi ə ma kɛ nu takpɛliɠaa yili ɓə nwɛi a ɉukulɔ. Ə lɛɛ yili a kpɔnmaa tɛɛ gu pɔ gu Zesu kɔlɔn kpɔ a neelee.