ƝAAKWƐLƐI 27
Zesu haa mɛni a gu nwun maa ɓo ləi ?
Gwa nɛŋɛn a ɉəɠə, guɔ mɔnɔ mɛɛ ə lɛɛ guɔ haa maahɔlɔɓo nua kɛ a nukan dolooɠaa, Adamə da Ɛvə di kulɔ Yálá woo mu. Kəlaa kilitɔɔmaalaa kaa gu yəi. Zehova aa mɛni ta kɛ yii yaan yɛ pɛli nukanŋaa nwun maaɓoi nɛŋɛn da haa di yəi non ɉulɔnu Zesu haalai. Biblə a galan yɛ ma haai Zesu ə mo yili ɓə kɛ a nwunmaaɓo hɛn. Nwunmaaɓo hɛn kaa a hɛn ɲii da ɉala nuta nwun maaɓo mɛni ɓa. Zesu ŋɔ yɛnɛɛ ɲaapɛliɛ ə gwɛlɛ ya ɓə kɛ a nwunmaaɓo hɛn (Matie 20:28 ɓo). Ɲɛnɛɛ ŋɛi Adamə da Ɛvə di hwɛɠɛ ɉu yai kɛ ɓaa yiipoo yii kpɛɛ ho ma, Zesu ə ɲɛnɛɛ tii ŋɔ pələ laa ɓo gu tɔwɔ a ɓɛlowai ə hwaa la ma ə hwɛɠɛ yaa kpinii ŋɔ yɛnɛɛ hu ɓɛ lɔi mɛi. Ə lɛɛ ə nɛ nwɔnɔ guɔ yɛ ma yaa da Zehova da gu wɛlilakɛ kpɔ kɛnɛ. Ɲaakwɛlɛi ŋɛi kaa pai kpɔnmaa tɛɛ ə́ pɔ yɛ́ pɛli ə́ wɔ mɛinɛɛ hukɔlɔnŋaa ta pɛlɛi ma yɛ hwilɛn na Zesu haa mɛni ɓa.
1. Haa ŋɛi Zesu ə mo gwa dɔlɔ kulɔ ləi háákələi ?
Gwa kɛ mɛniɠaa kɛi yii nwɛli ho Zehova ɓa maahɔlɔɓo nɛŋɛn gaa guɔ. Kəlaa gwa gu wɔ nɛŋɛnŋaa maaliiholi kulɔ kpɔ a neelee, gu mo Zehova ɓa hwɛliwoo hu ə gu maahwaalɛɛ Zesu haalai, ə lɛɛ gu mɛni kəlee kɛ gu ho kea kɛ pai gu wɔ tuwɔpələɲɔnŋaa tii mɛi, gwa pɛli gu kɛ a məlanmun (Ɉaan dɔlɔɔ 2:1). Biblə kaa kɛi ma : “ Kilista yaa kpinii ə haa nu kəlee kɛ nɛŋɛn maamɛni ɓa, naa hee tɔnɔ gbən, yaa tii gaa a təlimomun, ə haa nuai di ho a təlimonua di maamɛni ɓa, ə gɛ, ə ka maalɛɠɛ Yálá ɓa ” (Piɛrə dɔlɔɔ 3:18, ɉɛɓɛ yili ninɛ).
2. Gu kaa tinaa pai pɛlii Zesu haa mɛni dɔlɔ kulɔi ləi ?
Zehova ə Zesu tɛɛ yii yaan ə ŋɔ yɛnɛɛ ɲaapɛliɛ kwɛlɛ ə gɛ “ nui lɔpee a laana nwun na hwa pili kəlaa a yɛnɛɛ kpɛɛ ho ma hɔlɔɓo Yálá yəi ” (Ɉaan 3:16). Zesu ŋɔ nwunmaaɓo halaa haalai, mɛniɠaa kpɔ Adamə ŋɔ kulɔnwoomulaa aa gala Zehova kaa pai gəlee kpɛtɛi. Yili mukulaa ɓaa gwa laa Zesu ŋɔ nwumaaɓo halaa la, gu kaa tinaa pai pɛlii yiipoo yii kpɛɛ ho ma hɔlɔɓoi alizana hu lɔi mɛi (Esai 65:21-23).
Ə́ WƆ MƐNIKƆLƆNŊAA TA PƐLƐ MA
Mɛnii gɛ Zesu yɛ ŋɔ yɛnɛɛ kwɛlɛ ə́ wɔ mɛnikɔlɔnŋaa ta pɛlɛ ma yɛ hwilɛn na yili ɓa, ə lɛɛ ə́ gaa pələi ya pɛli dɔlɔ kulɔi la.
3. Haai Zesu ə mo a gu nwun maaɓo nɛŋɛn da haa di yəi
VIDIO kaa, ə lɛɛ ka lono kɛ gɛɛmaalən ŋɛi mɛi.
-
Adamə ə kɛ a nui nɛŋɛn və kɛ ma. Kəlaa ə kulɔ Yálá woo mu, yili ɓə gɛ nɛŋɛn da haa diɛ hwilɛn nukanŋaa kəlee pulu
-
Zesu ə kɛ a nui nɛŋɛn və kɛ ma. Ŋɔ lɛɛnwoomulaa a gu kulɔ mɛni nɛŋɛn ɲəi ŋɔ kilitɔɔmaalaa tɛɛ gu pɔ, ə ma kɛ yiipoo yii kpɛɛ ho ma
4. Zesu ə haa nukanŋaa kəlee maamɛni ɓa
VIDIO kaa, ə lɛɛ ka lono kɛ gɛɛmaalən ŋɛi mɛi.
-
Nu tɔnɔ gbən haa mɛni a pɛli kɛ ə nu kəlee nwun maaɓo ləi ?
Timote dɔlɔɔ 2:5, 6 ɓo, ə lɛɛ ka lono kɛ gɛɛmaalən ŋɛi mɛi :
-
Adamə ə kɛ a nui nɛŋɛn və kɛ ma. Kəlaa ə kulɔ Yálá woo mu, yili ɓə gɛ nɛŋɛn da haa diɛ hwilɛn nukanŋaa kəlee pulu. Nɛŋɛn və kɛ Zesu ɓa yɛ pələi lɔ nɛŋɛn və kɛ la Adamə ɓa. Yili ɓa ɲɛnɛɛ huwu mai ŋɛi kɛ Adamə yəi, Zesu haa mɛni a pɛli ɲɔnwɔman dɛɛ ləi gu pɔ ?
5. Nwunmaaɓo halaa kaa a mɛinɛɛ yii Yálá ə gɛ yɛ́
Zehova məlaa da kɛ nwunmaaɓo halaa kaa yɛ Zehova ŋɔ mɛinɛɛ aa gɛ diɛ kpinii diɛ. Galatə 2:20 ɓo, ə lɛɛ ka lono kɛ gɛɛmaalən ŋɛi mɛi :
-
Apɔtɛlɛ Polə ə nɛ ləi yɛ ma nwunmaaɓo halaa kaa a mɛinɛɛ yii Yálá ə gɛ yaa kpinii ma ?
Ɓɛlowai Adamə ə nɛŋɛn ɉəɠə la, haa ə hwilɛn yaa da nonnii kəlee di pulu. Kəlaa Zehova ə Non dɛɛ ə haa ə gɛ guɔ pɛli yiipoo yii kpɛɛ ho ma hɔlɔɓoi.
Ɓɛlowai ə́ kaa pai kɛi vɛlisɛɛɠaa ŋɛi ɓoi la, yii Zesu ŋɔ mɔnɔɠaa di gɛ Zehova ɓa ə́ kiliŋahiɛ ma. Ɉaan 19:1-7, 16-18 ɓo ɉɛɓɛ yili ninɛ hu, ə lɛɛ ka lono kɛ gɛɛmaalən ŋɛi mɛi :
-
Mɛniɠaa Zehova da Zesu daa gɛ yɛ́ ya ə́ kiliŋahiɛ ma lə ɓə yili a gɛ yɛ́ ?
NUTAƓAA DA KƐ KƐI MA : “ Nu tɔnɔ gbən haa mɛni a pɛli nukanŋaa kəlee nwun maaɓoi ləi ? ”
-
Da mo tii yɛ́ ə́ kaa pai kɛi ma lə ?
YII GU GALAN
Zesu haa mɛni ɓə a gɛ Zehova yɛ gu wɔ nɛŋɛnŋaa maahwaalɛɛ, ə lɛɛ guɔ pɛli yiipoo yii kpɛɛ ho ma hɔlɔɓoi.
Nɛɛ ə́ kili pɔ
-
Lə mɛni ɓa Zesu ə haa ?
-
Lə mɛni ɓa Biblə a kɛ ma Zesu ŋɔ yɛnɛɛ ɲaapɛliɛ kaa a “ nwunmaaɓo hɛn ? ”
-
Haa ŋɛi Zesu ə mo tɔnɔ ləkɛɛ ɓə ya pɛli ɉɔlɔɓoi yili hu ?
MƐNI TAKPƐLIƓAA
Gaa lə mɛni ɓa Zesu ŋɔ yɛnɛɛ ɲaapɛliɛ kaa a nwunmaaɓo hɛn ?
Gaa yii gu maakpaan gaa ma gu nwun maa yɛ pɛli ɓoi ?
“ Zesu a gu nwun maaɓo : Ləi ? ” (Hɛɓɛ yii gaa gwɛli yɛli ɓa)
Zehova a nɛŋɛn gbea-kpea maahwaalɛɛ ?
“ Biblə ŋɔ kɛɛmaalənŋaa mukulaaɠaa ” (La Tour de Garde, 1er mai 2013)
Gaa pələi Zesu ŋɔ nwunmaaɓo halaa ə kpɔnmaa tɛɛ la hulɔnu ta pɔ yɛ pɛli duwɔ pələ maahwalɛn ɉii.
a Da kɛ ma nɛŋɛn ya lɔ hwaa nu ə tuwɔ ɲɔnwɔɔ ɓo. Gu wɔ kiliŋahiɛɠaa da kɛ gu yalai mɛniɲɔn bɔ pələ maahɔlɔɓo Adamə da Ɛvə di lonnii ɓaa guɔ. Nɛŋɛn mukulaa hwilɛnŋaa lɔ nwɔnɔ yili ɓa.
