ƝAAKWƐLƐI 55
Kpɔnmaa tɛɛ ka wɔ kalangbɔn pɔ
Lɔi mɛi naakələi nu miliɔn damaa da Zehova ɓatoo ə lɛɛ di kaa a ŋaakpɔn waa tamaa. Zehova ŋɔ Kəlaɠaa tii kəlee kwəinɛɛ galanwoo da dənəndɔɔɓoɠaa da kɛ ɉɔlɔɓoi maamɛni ɓa. Ə lɛɛ da di kpɔɔ tɛɛ ə gɛ di kpɔnmaa tɛɛ di wɔ kalangbɔnŋaa pɔ. Gwəinɛɛ tii ta kaa yɛ́ kpɛliman ə́ yəi ka wɔ kalangbɔn hu ?
1. Kpaalə ləkɛɛɠaa ɓə ya ə́ wɔ lowai da ə́ hwaŋa həɠəi la yɛ́ pɛli kpɔnmaa tɛɛ ka wɔ kalangbɔn pɔ ?
Gu kəlee gwa pɛli gu kpɔnmaa tɛɛ galangbɔn bɔ. Akɛ ka nan nonnii taɠaa kaa ka wɔ ŋaakpɔn gɛ pɛlɛ mu diɛi daa pɔlɔ awala kɛtii kpɛɠii yɛ bə diɛ ya pɛli ə́ kpɔnmaa tɛɛ di pɔ diɛ pɛli lii ŋaakpɔn ma. Ya pɛli ə́ kpɔnmaa tɛɛ di pɔ mɛni taɠaa hu yɛ pələi ə́ li ə́ di wɔ haŋaa ya awala kɛtii ə́ di yəi bɛlɛlaaləi kóló ta kɛ (Ɉakə 1:27 ɓo). Gwa pɛli nwɔnɔ gu kpɔnmaa tɛɛ gu wɔ ŋaakpɔn gɛ pɛlɛ kpɛtɛ mɛni ɓa da maahəɠə mɛni. Nuta lɔpee hwa pɛli hɔlɔhima laai gu mɛi gbɔnmaaɠaa tii tɛɛ mɛni hu. Zehova ŋɔ wɛlikɛmaa da gu nan nonnii di wɔ wɛlikɛmaa a gɛ guɔ kɛ Zehova ɓa “ ɲáá ɓə, dí ! ” (Esai 6:8).
Nuai da batɛɛmu hɔlɔɓo da pɛli nwɔnɔ di kpɔnmaa tɛɛ galangbɔn pɔ a kpaalə takpɛliɠaa. Nan nonnii hinaa daa tɛ tɔwɔ di wɔ Yálá mɛni hu da pɛli di di kɛ a tiɓokɛnua, pulu ɓa di di kɛ a kalaɉonŋaa. Nan nonnii hinaa da nan nonnii nɛa di kəlee da pɛli di kpɔnmaa tɛɛ Yálá Lawoo laahəli mɛni hu a kɛi da mo a pələkulɔnua. Zehova ŋɔ Kəla taɠaa da pɛli dəli kɛɛnaa ta kpɛli kpɔnmaa tɛɛ mɛni ɓa ŋaakpɔn gɛ pɛlɛ tɔɔ mɛni hu, awala kɛtii dəli kɛɛnaa takpɛli di kpɔnmaa tɛɛ laa kalangbɔn da pɔ ɓɛi Yálá Lawoo laahəliɛ ŋɔ kpaan gaa laa.
2. Gwa pɛli gu kpɔnmaa tɛɛ galangbɔn pɔ a gu yəi wali da gu yəi haŋaa
Biblə a gu hwaŋalɔ ə gɛ gu ‘ Zehova maawiɛ a gu hɔlɔɓo hɛngɔuɠaa ’ (Hanwon 3:9). Gaa a kwəinɛɛ mɛni gu yəi gu gu yəi wali tɛɛ, awala kɛtii gu yəi hɛnda kpɛli kpɔnmaa tɛɛ mɛni ɓa galangbɔn bɔ da Yálá Lawoo laahəli mɛni hu lɔi mɛi nakəlee (Korɛntə veelɛ 9:7 ɓo). Ɓɛi kɛɛ aa kala laa, gɔɓo waliɠaa gwa dɛɛ da kpɔnmaa tɛɛ nwɔnɔ naa nua pɔ. Yii Zehova ŋɔ Kəla tamaa da gɛ kɛlɛ-kɛlɛ “ da hɛnda laa di kwɛlɛ kɔɓo kɛ mɛni ɓa ” (Korɛntə dɔlɔɔ 16:2 ɓo). Da pɛli di gɔɓo waliɠaa tii tɛɛ gwɛli yɛli donate.pr418.com ɓa. Awala kɛtii di doo gəhiɠaa di kaa gu wɔ ŋaakpɔn gɛ pɛlɛɠaa mu.
Ə́ WƆ MƐNIKƆLƆNŊAA TA PƐLƐ MA
Pələi ya pɛli ə́ kpɔnmaa tɛɛ la galangbɔn bɔ gɛ pələ taɠaa kaa.
3. Gwa pɛli gu kɔɓokɛ a gu yəi hɛnŋaa
Nui a kɔɓokɛ a nii kəlee maanu wɛlikaa Zehova da Zesu diɛ. Yeehowolo nɛɛnu ta ə kɔɓokɛ, Zesu ə naa kaa yili ə gwəinɛɛ. Lukə 21:1-4 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Kɔɓo kɛnɛ kɛɛ lɔ ɓə a gu wɛli too Zehova ɓa ?
-
Gwa kɛi kɔɓokɛ a gu lii kəlee Zehova da Zesu da gaa ləi ?
Yii da gɛ a gu wɔ kɔɓo hɛnŋaa ə gɛ yɛ́ pɛli gɔlɔn ɉii, VIDIO kaa. Ə lɛɛ ka lono kɛ gɛɛmaalən ŋɛi mɛi.
-
Gu wɔ kɔɓo hɛnŋaa da kpɔnmaa tɛɛ ləi galangbɔn bɔ lɔi mɛi naa kələi ?
4. Gwa pɛli gu gu kpɔɔ tɛɛ Zehova ŋɔ kóló kɛ mɛni ɓa
Zehova ɓatoonua tolooɠaa di wɔ lowai kɔɓo hɛn lɔ hwəi di kɛi gulɔ, kəlaa di kɛi kóló kɛ kpɔ a nwala-walaa ɓɛi di kɛi Yálá ɓatoo laa naa maahəɠə mɛni ɓa. Tɔɔɓəlaa kɛmɛni veelɛ 34:9-11 ɓo, ə lɛɛ ka lono kɛ gɛɛmaalən ŋɛi mɛi :
-
Isilayɛli lonnii tɛi-tɛi kəlee di kpɔnmaa tɛɛ ləi Zehova ɓatoo bɛlɛ ho mɛni hu a nɛlɛɛ ?
Pələi Zehova ŋɔ Kəlaɠaa da di wɔ ŋaakpɔn gɛ bɛlɛɠaa hon na ə gɛ yɛ́ pɛli gaai, VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Lə mɛni ɓa mɛni wala-wala ɓaa guɔ ŋaakpɔn gɛ pɛlɛ ə lɛɛ a maahəɠɛɛ ?
-
Kpaalə ləkɛɛɠaa ɓə ya pɛli ə́ kpɔnmaa tɛɛ la Yálá batoo pɛlɛ maahəɠə mɛni hu a nɛlɛɛ ?
5. Nan nonnii hinaa da pɛli di di kpɔɔ tɛɛ kóló kɛ mɛni ɓa galangbɔn ɉu
Biblə a nan nonnii hinaa hwaŋalɔ ə gɛ di di kpɔɔ tɛɛ kóló kɛ mɛni ɓa galangbɔn ɉu. VIDIO kaa, ə lɛɛ ka lono kɛ gɛɛmaalən ŋɛi mɛi.
-
Vidio hu, Ryan ə gbɔɔ tɛɛ ləi galangbɔn ŋɔ kóló kɛ mɛni hu ?
Yii maanɛɛ nan non ɉulɔnu ə gɛ yɛ pɛli kɛi a tiɓokɛmu awala kɛtii a kalaɉon Biblə a nɛ. Timote dɔlɔɔ 3:1-13 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Nan non ɉulɔnu yii gaa bɔ ə kɛ a tiɓokɛmun awala kɛtii a kalaɉon túwɔ́ pələ ləkɛɛɠaa ɓə maanɛɛ ə kɛ ɲee pɔ ?
-
Túwɔ́ pələ ləkɛɛɠaa ɓə maanɛɛ ə kɛ ɲəi bɛlɛn nua yee bɔ ? (Nwookpuɔ 4 da 11 kaa).
-
Nan nonnii hinaa da kɛi di səmɛni kəlee kɛ duwɔpələlɛlɛɠaa tii kɛ mɛni hu galangbɔn ɉu nua kəlee da yili pulu mɛinɛɛɠaa hɔlɔɓo ləi ?
NUTA A PƐLI ƏI MAALƏNGƐ YƐ MA : “ Minɛ ɓə Zehova ŋɔ Kəlaɠaa da wali hɔlɔɓolaa diɛ di wɔ Yálá kólói kɛ ? ”
-
Da mo tii yɛ́ ə́ kaa pai kɛi ma lə ?
YII GU GALAN
Gwa kɛi mɛni kəlee kɛ guɔ gu wɔ lowai həɠə, gu hwaŋa da gu yəi hɛnŋaa guɔ kpɔnmaa tɛɛ la galangbɔn bɔ yili wɛli kaa Zehova ɓa.
Nɛɛ ə́ kili pɔ
-
Gwa pɛli gu hwaŋa da gu wɔ lowai həɠəi ləi galangbɔn ɉu kóló kɛ mɛni ɓa ?
-
Gwa pɛli kpɔnmaa tɛɛ ləi galangbɔn bɔ a gu yəi hɛnŋaa ?
-
Kpaalə ləkɛɛ ɓə ə́ kaa bɔ ə kpɔnmaa tɛɛ la galangbɔn bɔ ?
MƐNI TAKPƐLIƓAA
Gaa lə mɛni ɓa haakələi Yálá hwa kɛ guɔ gu gu hɔlɔɓo hɛnŋaa kəlee bou naa dɛɛ bɔ galangbɔn maamɛni ɓa.
Nan nonnii hinaa daa batɛɛmu hɔlɔɓo, Biblə a mo yɛ ma da pɛli di tɔɔi tɛɛ di pɔ galangbɔn ɉu. Kəlaa nan non nɛɛnu yii a batɛɛmu hɔlɔɓo akɛ kea gaa bɔ ə tɔɔ hɔlɔɓo yaan ?
“ Le principe de l’autorité dans l’assemblée ” (La Tour de Garde, 15 Février 2021)
Gaa pələi Zehova ŋɔ Kəla taɠa da mɔnɔ mii la ə gɛ dəli a Yálá Lawoo hɛɓɛɠaa di nan nonnii pɔ.
Gaa pələi Zehova ŋɔ Kəlaɠaa da wali hɔlɔɓo la di wɔ kalan gólóɠaa kɛ mɛni hu.
