Nua da kɛ yɛlɛi guɔ a lowai taɠaa, awala kɛtii diɛ di lii holi gu pɔ ɓɛlowai gwa kɛ Zehova maa mɛni ɓoi la diɛ. Yili a pɛli gɛi gu kpəla Yálá maa mɛni ɓoi. Yili ta aa ta kɛ a yɛ́ ? — Biblə kaa hulɔnon da ma mɛni ɓoi yii Zehova wɛli ə kɛ ma, kɛlɛɛ naa wolo ə lɛɛ tiikpə yɛ kɛ ə kpəla Zehova ma mɛni ɓoi. Naa ɓaa kɛ Zelemi. Gu Zelemi maa mɛni hukulaa kaa.

Ɓɛlowai Zelemi ə kɛ la a hulɔnon, Zehova ə mo ma yɛ ma ə mo nua diɛ di kpəla mɛni ɲɔn gɛɛ ɓa. Yili kɛ laa ə wala Zelemi yəi kpɔ kɛnɛ, ə lɛɛ yɛ ɲɔu. Ə mo Zehova ɓa yɛ ma : « Və́ gɔlɔn yii maanɛɛ ŋi mo. Gáá lɔ ɓaa hulɔnu lokolo. » Kɛlɛɛ Zehova ə mo ma yɛ ma : « Ho ɲɔu. Gáá pai kpɔnmaa tɛɛ ə́ pɔ. »

 Yili ɓa Zelemi ə gɔwɔtɔɔ yɛ mo nua diɛ yɛ kɛ diɛ da wala kpəla di wɔ tuwɔ pələ ɲɔnŋaa diɛ mɛni kaa pai laa diɛ. Ə́ wɔ kili ɓa mɛnii Zelemi ə mo nua diɛ di gɛ ? — Kpaa. Di yɛlɛ ma ə lɛɛ di di lii holi bɔ kpɔ kɛnɛ. Daɠaa diɛ kɛ di baa ! Ə́ wɔ kili ɓa lə ɓə həli Zelemi ɓa ? — Ə ɲɔu ə lɛɛ ə mo yɛ ma : « Və́ kea pai pənəi və́ Zehova maa mɛni ɓo. » Kɛlɛɛ ə kpəla kpɔ ma a neelee ? — Kpaa, ho gɛ tii. Zehova wɛli ə kɛ ma kpɔ kɛnɛ, yili ɓa ho pɛli kpəlai maa mɛni ɓoi. Zehova ə Zelemi nwun maaɓo maahɔlɔɓo yili ho kpəla ma mɛni ɓoi.

Gɔɔmaa ta ɓaa, holo ta, mɛni ɲɔn gɛ nua di Zelemi pili lowa kpon gweaa ta hu yii palaya ə kɛ ɉu. Kɔnɔn və kɛ laa ɲəi da yá. Nua tii di kɛ bɔ di Zelemi lɛɛ laa ə haa. Kɛlɛɛ Zehova ə kpɔnmaa tɛɛ bɔ ə kulɔ gɔi tii hu !

Mɛnii tii laa Zelemi ɓa kili ləkɛɛ ɓə ya pɛli ɉɔlɔɓoi ɉu ? — Ə ma kɛ ə kɛi ɲɔu lowai taɠaa, ho ta kɛ kpəla li Zehova maa mɛni ɓoi nua diɛ. Yɛ́ kpɛli ya kɛi Zehova maa mɛni ɓo, nua da pɛli yɛlɛi yɛ́, awala kɛtii di di lii holi ə́ pɔ. Ya pɛli ɲɔuwii ə lɛɛ yii maanɛɛ ə́ gɛ hwa kɛ gaai. Kɛlɛɛ ho kpəla Zehova maa mɛni ɓoi. Gaa pai kpɔnmaa tɛɛ ə́ pɔ a yələ kəlee yɛ pələi ə kpɔnmaa tɛɛ la Zelemi pɔ.