Ə́ gɔlɔn Tɔɔlaa ləkɛɛ ɓə gu kaa vaaɓoi ? — Ee, Yálá ŋɔ Tɔɔlaa ɓə, Dɔɔlaa tii ɓə pai lɔi mɛi kɛi a Alizana. Ə́ kaa bɔ ə́ Dɔɔlaa tii maa mɛni tamaa kɔlɔn ? —

Tɔɔlaa kəlee ŋɔ tɔɔmun gaa ma. Ə lɛɛ dɔɔmun a dɔɔlaa kɛ ŋɔ lɔi lonnii mɛi. Nui a Yálá ŋɔ Tɔɔlaa hu Tɔɔmun ə́ gɔlɔn ? — Ya ɓaa a Zesu Kilista. Gaa yələkɔlɔn ɉu. Ɉu ho kea kwea li gaa pai kɛi a lɔi mɛi nua kəlee di wɔ Tɔɔmun ! Ə́ wɔ kili ɓa ɓɛlowai Zesu kaa pai kɛi la a yɛnɛɛ nua kəlee di wɔ Tɔɔmun gu kaa pai kɛi gu nɛɛ hu ? —

Gu kaa pai kɛi gu nɛɛ hu kpɔ kɛnɛ ! Alizana hu, nua di ho kea pai kɛi kpilɛn gɔi, ə lɛɛ di ho kea pai kɛi kɔ kɔi. Nu kəlee kaa pai məlan nwɛlilakɛi. Nuta lɔpee ho pai too a ɲɔn, nuta lɔpee ho pai haai. Ɲɛipu mun gaa pai kɛɛ kaai, wəliwolo mun gaa pai mɛni mɛn ɉii, ə lɛɛ nua di kɔwɔ ho di yəi di kaa pai kɛi gilɛ həɠəi ə lɛɛ diɛ teen. Kɔnɔn gaa pai kɛi nu kəlee yəi kpɔ kɛnɛ. Ə lɛɛ ɓəlan naa kaa pai kɛi huwɔɠaa lowai, ɓəlan naa yɛ ɓo gwa diɛ ni gu lowai. Nua daa haa di kaa pai nwun ɉii. Hinaa da nɛaa yiiɠaai yaa di maa mɛni kɔlɔn ɉɛɓɛi  ŋɛi hu yɛ pələi Rebəka, Alahabə, Davidə da Eliya di kaa la, di kaa pai nwun ɉii ! Ə́ kaa bɔ ə́ pa di kaa ɓɛlowai da pa nwun ɉii la ? —

Ə́ wɛli kaa Zehova ɓa, ə lɛɛ gaa bɔ ə́ kwəi ə nɛɛ. Ya Zehova maa mɛni kɔlɔn ə lɛɛ ə́ lɛɛ nwoo mu, ə́ kaa pai pɛlii lɛɛ Alizana a yələ kəlee ! Yili ɓə ə́ kaa bɔ ? —