Zehova kaa bɔ gu « təlimo laa wɛlilakɛ ». (Mika 6:8, TMN.) Yili maa mɛni wala-walaai kpɔ kɛnɛ, maahɔlɔɓo təlimo laa awala kɛ ka wɔ húlu yii hu, laana laa hwa kɛ laa. Laana laa yaan awala kɛ laa, wɛlikɛmaa hu hwa kɛnɛ.

Háákələi, nu mɔlɔɓəlaa di hwa təlimo laa kɛ di wɔ húlu yii ɓoɔ hu. Akɛ ə́ kaa bɔ ə́ lɛɛ təlimo laa kɛɛ ɓa ə́ wɔ húlu yii ɓoɔ hu, maanɛɛ ə́ tɔɔ kpaan mɛni hweelɛ kɛ mɛni ɓa.

YII BIBLƏ KAA MOI : « Yii vialaɓoɔ ka kɛ a gɔlɔnŋaa » (Filipə 1:10). Mɛniɠaai di hwialaɓoɔ ə́ wɔ yɛnɛɛ hu, da ɓaa ə́ wɔ húlu yii. Maanɛɛ maa mɛni ə kɛ a nwala-walaa yɛ́.

Zehova kaa bɔ hulɔnu da nɛa di kɛ a di kananŋaa di kee ɓa, ə ma kɛ di wɔ kiliŋahiɛ hu, ə lɛɛ di di wɔ « yɛnɛɛ ɲaanɛɛ kulɔ » gee pɔ (Kilimaa mun 9:9). Zehova aa ə́ kilaa pono, yɛ maa ho nɛɛ li hulɔnu da nɛa di ho di kee ni maa mɛni viikpɛɛ too. Yaamun, maanɛɛ di tɛi-tɛi ə gɛ pələ kwɛli ma, yii yaan kwəinɛɛ ə kɛ məlan ɲəi (Kɔlɛntə dɔlɔɔ 10:24). Yili ɓa, nɛ ə́ nɛa awala kɛtii ə́ hilɛ ɓa ə́ túwɔ́ pələ hu, yɛ́ ma ə́ maakpaan gaa ma, ə lɛɛ ə ɲaakaa yɛ ya nwɛlilakɛ.

YII KA PƐLI GƐI :

• Ə́ kiliŋahiɛ akɛ ka kɛ lowai kɛi gee ɓa kɛlɛ-kɛlɛ, kaa ka maa mɛniɠaa kəlee kɛ la gee ɓa

• Ho ə́ kiliŋahiɛ « yɛ́ tɔnɔ » yɛ́, kəlaa ə́ kiliŋahiɛ ka « nu hweelɛi » kaa

YII BIBLƏ KAA MOI : « Nui lɔpee a nɛɛnu ta kaa, ɲɛi a kulɔ bɔ ŋɔ kiliŋahiɛ hu, a kɛtii aa gbea láá a maa nɛɛnu » (Matie 5:28). Nu a kɛ lɔ ma yɛ wɛli mɛni maa kiliŋahiɛ kɛ, gɛɛ nɛa awala kɛtii ɉilɛ ɓowoi katii.

Zehova yɛ maanɛɛ ə́i « lii laahɔnmo ». (Haŋɔn 4:23, TMN ; Zelemi 17:9, TMN.) Ya kɛ ə́ yili kɛ, maanɛɛ ə́i wɔ kɛɛ kaa pələ hu yɛɠɛ (Matie 5:29, 30). Zɔbə pɔɔ kɔɔn, ə wɔlɔ minɛ həɠə yɛ hwilɛn na ŋɔ kɛɛ kaa pələ ɓa, ə gɛ ho pa nɛɛnu takpɛli kaa a ɲɛi kulɔ pələ bɔ (Zɔbə 31:1, TMN). Tɔɔ kpaan, ə́i maakwea nu kpuwulu maaninin gaa ɓa. Ə lɛɛ mɛni kəlee kɛ, ə́ ɲɛi ho pa kulɔ nu takpɛli pɔ.

YII KA PƐLI GƐI :

• Nɛ nu kəlee ɓa ə́ túwɔ́ pələ hu, yɛ́ ma ka nu hweelɛi ka yiliɛi ka kee ɓa

• Ə́ kili lɛɛ ə́ nɛa awala kɛtii ə́ hilɛ liiɓa mɛniɠaa da nwana mɛniɠaa hu, ə lɛɛ nɛɛlaa kpɔ a pɛli ka yaa ka lowai kalai, ə́ yee kulɔ ɉu