ƝAAKWƐLƐI 7
Pələi ka pɛli ka lon ɉutɔɔ la
« Nwooɠaa ŋɛi gáá moi yɛ́ háákələi, maanɛɛ di kɛ ə́ lii pɔ. Maanɛɛ yɛ́ pa kɛ́i di kalan ɉii ə́ lon ɉulɔnu ɓa. » (Detelonɔmə 6:6, 7, TMN).
Ɓɛlowai Zehova ə pɛlɛn mɛni hee la gbanŋa, ə lon gaa nua kɛ a di lonnii hutɔɔ nua (Kɔlɔsə 3:20). Maanɛɛ ka ka lonnii maakwɛli Zehova wɛlilakɛɛ ɓa, ə lɛɛ ka di maakwɛli yii yaan da kɛnɛ di pɛli di kpɔɔ mu (Timɔtə veelɛnaa 1:5 ; 3:15). Mɛnii gaa ə́ lon ɉulɔnu kwəi awala kɛtii ə́ lon nɛɛnu kwəi, maanɛɛ ə́ gɛ pələ kwɛli ma ə́ gɔlɔn. Mɛni wala-wala ɓaa ə́ kɔɔmaa lɛlɛɛ lɛ ə́ lon ma. Zehova lawoo a kɛ ə́ nii hu, ya ɓə ya pɛli galan ɉii la ə́ lon ma a nɛlɛɛ (Somə 40:8, TMN).
1 KƐ Ə́ LONNII LƐƐ LAA DIƐ HWAA Ə́ PƆ
YII BIBLƏ KAA MOI : « Maanɛɛ ka kɛ a nua yiiɠaai da di wəli tɔɔ kpaan, di hwa hwaa ɉa » (Zaakə 1:19). Ə́ kaa bɔ ə́ lonnii di ho kɛ ɲɔuii hwaai ə́ pɔ. Maanɛɛ di kɛ a gɔlɔnŋaa diɛ, da kɛi pələ ɓo yɛ́ ya ə́ wəli tɔɔ. Gɛ pələ kwɛli ma, liilaa ə kɛ laa, yii yaan gɛ laa ə nɛɛ di yəi pələ ɓoi yɛ́ (Zaakə 3:18). Da kɛ a gɔlɔnŋaa diɛ ə́ wɔ mɛni wala-walaai, di ho kiɛ pai di kwəi mɛni ɓoi yɛ́. Ə́ liilaa di pɔ, ə lɛɛ nɛ diɛ kɛlɛ-kɛlɛ yɛ́ ma di wɛli kaa yɛ́ (Matie 3:17 ; Kɔlɛntə dɔlɔɔ 8:1).
YII KA PƐLI GƐI :
-
Lowai tɛɛ ə́ lonnii pɔ diɛ hwaa ə́ pɔ, ə lɛɛ yɛ́ ə́ wəli tɔɔ diɛ
-
Ka ə́ lonnii ka kɛ lono kɛi kɛlɛ-kɛlɛ, ho kɛ lɔ a ɓɛlowai mɛni a di hɔlɔɓo la
2 DA KƐI MƐNI TA ƁO YƐ́, ƝAAKAA PƏLƏ KWƐLI KPƆ A NEELEE
YII BIBLƏ KAA MOI : « Nui gili a kweala kaa a mɛni lɛlɛɛ hɔlɔɓo » (Haŋɔn 16:20, TMN). Ə́ lonnii da kɛi hwaa ə́ pɔ a lowai taɠaa, kɛ ə́ kiliŋahiɛi di hwaa pələ ɓa, yii yaan ə́ di kwəi mɛni kɔlɔn. Mɛni ta a pɛli kɛi muhəɠə ninɛɠaa kwəi yii di hwa mo a nɛlɛɛ. Yili ɓa gɛ a nɛlɛɛ, maahɔlɔɓo « nui a naa pili mɛni ta hu, yii ho ɉukulaa kɔlɔn, kili kpɛɛ ɲəi mun ni ». (Haŋɔn 18:13, TMN.) Ho ə́ lii holi ɉaɉa (Haŋɔn 19:11, TMN).
YII KA PƐLI GƐI :
-
Ə́ lonnii da kɛi mɛni ta ɓo yɛ́, ho di woo hon di la, ho nwɔnɔ di woo pulu pənə a ɲɔnwɔɔ
-
Ə́ kiliŋahiɛ ɓɛlowai ə́ kɛ la yɛ diɛ, ə lɛɛ yii kɛ maa mɛni wala-walaa yɛ́ naalowai
3 MAANƐƐ KA WOO TƆƆI Ə KƐ TANƆN KA LONNII HUTƆƆ MƐNI HU
YII BIBLƏ KAA MOI : « Nón ɉulɔnu, ə́ wəli tɔɔ ə́ nán ŋɔ liɛwoo ɓa, ə lɛɛ ho ə́ lee woo pili » (Haŋɔn 1:8, TMN). Zehova ə lon gaa nua kɛ a di lonnii hutɔɔ nua. Maanɛɛ ka ka lonnii kalan, yii yaan diɛ ka maawiɛ, ə lɛɛ diɛ lɛɛ ka woo mu (Efɛsə 6:1-3). Maanɛɛ lon gaa nua « kiliŋahiɛ pələ yɛ ɓo tanɔn », awala kɛtii di lonnii da ɲaakaa (Kɔlɛntə dɔlɔɔ 1:10, TMN). Ka wala kɛ ka kee ni woo ɲaakaai mɛni ta hu, maa ho nɛɛ li ka ho nɛ ka lonnii ɲɛi ɓa, di ho pa tɛɠɛɓo ka hu.
YII KA PƐLI GƐI :
-
Pələi maanɛɛ ka ka lonnii hutɔɔ la, ka mo ka pɛli ɉu
-
Ka ə́ nɛa awala kɛtii ə́ hilɛ, ka kiliŋahiɛ pələ awala kɛ tanɔn ka lonnii hutɔɔ mɛni hu, gɛ pələ kwɛli ə́ giliŋahiɛ pələ ɲaakaa
4 KA KA LONNII HUTƆƆ PƏLƏ HEE GBANŊA
YII BIBLƏ KAA MOI : « Ka [ka lonnii] hutɔɔ, kaa di kalan a yii Námu a nɛ kaa » (Efɛsə 6:4). Lon ɉutɔɔ mɛni a nɛlɛɛ hwa kɛ kpɛli. Ho kɛli ka mɛniɠaa hee gbanŋa, ka lonnii hutɔɔ mɛni ɓa (Somə 127:4, TMN ; Haŋɔn 29:17, TMN). Lon ɉutɔɔ lɔ hwaa ə́ mɛni laa ma, kəlaa, yii gɛ yɛ́ mɛni laa ma, maanɛɛ ə́ nɛ ma ə gɔlɔn (Haŋɔn 28:7, TMN). Di maakwɛli nwɔnɔ Zehova lawoo wɛlilakɛɛ ɓa, da ŋɔ tɔn nwooɠaa ɲaakaa pələ ɓa (Somə 1:2, TMN). Yili kaa pai gɛi di tɛ tɔwɔ mɛni lɛlɛɛ da mɛni ɲɔnwɔɔ di kulɔ nowai kɛɛ hu (Hebulu 5:14).
YII KA PƐLI GƐI :
-
Gɛ pələ kwɛli ma ə́ lonnii di Yálá kaa yɛ nu leelee yii da pɛli laana
-
Mɛni ɲɔn damaa a hɔlɔɓo wɛli mɛni hu. Kpɔnmaa tɛɛ di pɔ di di kɔlɔn ə lɛɛ di di maa laa. Daɠaa kaa internet ɓa. Di maakwɛli yii yaan diɛ pɛli di kpɔɔ maakpɛi too mɛi kɛ nua yəi
“Ka [ka lonnii] hutɔɔ, kaa di kalan a yii Námu a nɛ kaa ”
