ƝAAKWƐLƐI 14
Lə mɛni ɓa Yálá aa ŋɔ nu huwui ŋaakpɔn niiɓa kɛ mɛni ɓa ?
1. Lə mɛni ɓa Yálá ə wɔlɔ Isilayɛli nua kɛ a ŋɔ nu huwui ?
Yálá ə Abalahamu huwu hu nua maa mɛni hee gbanŋa, ə di kɛ a lɔi tɔnɔ hu lonnii. Ə nɔi tii laahee a “ Isilayɛli ”. Ə tɔnŋaa tɛɛ di pɔ, ə gɛ di kɛ a Yálá ɓatoo nua kpɔkpɔɠaa (Somə 147:19, 20, TMN). Yili ə kɛtii, ə gɛ lúwɔ́ ə kɛ Iɔi kəlee hu nua diɛ Isilayɛli haalai.—Túwɔ́ pələ 3:25 ɓo.
Yálá ə Isilayɛli nua kɛ a ŋɔ kəlaɠaa. Nu a lɛɛ Yálá woo mu, pələi a bulu mɛinɛɛ hɔlɔɓo la, Isilayɛli ŋɔ pɔlɔ kilinŋaa a bələ lɛ (Detelonɔmə 4:6, TMN). Nu takpɛliɠaa da pɛli kɛ Yálá kpɔkpɔ kɔlɔn ɉii Isilayɛli haalai.—Izai 43:10, 12, TMN ɓo.
2. Lə mɛni ɓa Kilistalea leeleeɠaa maa mɛni heɛ gbanŋa ?
Isilayɛli lonnii di hwɛɠɛ Yálá ŋɔ nɛɛlaa hu, Zehova ə di maahwalən a kilistalea (Matie 21:43 ; 23:37, 38). Háákələi, Zehova ŋɔ Kəlaɠaa ɓə daa Isilayɛli lonnii maahwalən. Diɛ ɓə di kaa a kilistalea kpɔkpɔɠaa, diɛ kóló kɛ Zehova ɓa.—Túwɔ́ pələ 15:14, 17 ɓo.
Zesu ə ŋɔ kalan neai ŋaakpɔn, ə gɛ di Yálá lawoo laa həli lɔi kəlee hu, ə lɛɛ di nu takpɛliɠaa kɛ a Zesu ŋɔ kalan nea (Matie 10:7, 11 ; 24:14 ; 28:19, 20). Gólói tii hu aa wiɛ yiihu, ɲɛnɛɛ ŋɛi ɲaakpɛɛ lowai. Dɔlɔɔ kaŋɛi pɔlɔ kiliiŋaa hu, Zehova yɛ nu miliɔn damaa ŋaakpɔn matoo mɛni ɓaa a neelee. Nua tii kaa a lɔi kəlee hu nua (Kulɔ ponoŋa 7:9, 10). Kilistalea leeleeɠaa yee lɔɔ gee, ə gɛ di di kee hwaŋalɔ, diɛ kpɔnmaa tɛɛ di kee pɔ. Di wɔ Biblə kalan bələ kaa lɔ tɔnɔn kɛɛnaa kəlee ɓa, di wɔ ŋaakpɔnŋaa hu.—Hebulu 10:24, 25 ɓo.
3. Zehova ŋɔ Kəlaɠaa di wɔ kpɔn ə hee pələ kɛ ləi gbanŋa ?
Teɲaɠaa kaa Biblə hu, nua daa kɛ lea diɛ ɉu aa kwea. Gwəlan 1870, nu kpulu logolo yii kɛi Biblə kalan, ə pənə ə deɲaɠaa tii kulɔ loo pələi. Di ɲaakaa diɛ ma Zesu ə kilistalea ŋaakpɔn Yálá lawoo laa həli mɛni ɓa. Yili ɓə gɛ, di gɔwɔtɔ diɛ Yálá ŋɔ Tɔɔlaa maa wɛlɛɛ ɓo lɔiɠaa hu. Gwəlan 1931 ɓə di di laa hee la a Zehova ŋɔ Kəlaɠaa.—Túwɔ́ pələ 1:8 ; 2:1, 4 ; 5:42 ɓo.
4. Zehova ŋɔ Kəlaɠaa maa mɛni hee pələ kaa ləi gbanŋa ?
Zesu haa pulu, Kilistalea di wɔ kalangbɔnŋaa di kɛ lɔi tamaa hu. Di ɲɛi tɔwɔ nua kɛi di tənən dɔɔ, di kɛ Zesu kɔlɔn a di nwun namu (Túwɔ́ pələ 16:4, 5). Pələ lɔ ɓə nwɔnɔ kələi gaa la, Zehova ŋɔ Kəlaɠaa ɲɛi tɔwɔ nua kaa a kalaɉon nwɛlɛɛɠaa, diɛ ɓə da kɛ di tənən dɔɔi. ɲɛi tɔwɔ nua tii ɓə da kɛ filiyaliɠaa mɛikaai. Filiyaliɠaa hu ɓə da kɛ ɉɛɓɛɠaa hu woo pɛɛn laa (woo takpɛliɠaa hu), diɛ di kpɛtɛ laa, diɛ ŋaakwɛlɛ. Yili kəlee a kɛ híínwoo nwun-mɛida (600) da da hu. Pələ ɓə da kalangbɔnŋaa hwaŋalɔ la, diɛ di tənən dɔɔ a Yálá ŋɔ liɛwooɠaa di kaa Biblə hu. Galangbɔnŋaa tii kwɛdɛn dɛɛ waa-nwun-dɔnɔ (100 000) hu. Kalaɉonŋaa kaa galanbgɔnŋaa tii kəlee hu. Diɛ ɓə da “ Yálá ŋɔ nu kpului ” mɛikaa wɛlikɛmaa laa hu.—Piɛli dɔlɔɔ 5:2, 3 ɓo.
Zehova ŋɔ Kəlaɠaa kaa a kpɔn yii a Biblə ŋɔ wɛlɛɛ lɛlɛɛɠaa laa həli, ə lɛɛ yɛ nua kɛ a Zesu ŋɔ kalan nea. Kwa Yálá lawoo laa həli pɛlɛɠaa laaləi, yɛ pələi apɔtɛlɛɠaa di kɛi gɛ la (Túwɔ́ pələ 20:20). Nua kpɔ teɲa wɛlikaa diɛ, kwa kpɔnmaa tɛɛ di pɔ Biblə kalan mɛni ɓa. Kɛlɛɛ, Zehova ŋɔ Kəlaɠaa di ho lɔ a kpɔn, di kaa a pɛlɛ tɔnɔ mu nua, di wɛli yɛ ɓo di Nán ma. Di káá a nan nonnii yiiɠaa di maa liihɛlɛn gaa di kee ɓa (Tesalonikə veelɛnaa 1:3). Yii Zehova ŋɔ Kəlaɠaa ŋaakpɔnŋaa Yálá liiɓa kɛ mɛni ɓa, da kpɔnmaa tɛɛ nu takpɛliɠaa pɔ, di kaa a pɛlɛ tɔnɔ mu nua, ə lɛɛ kwəinɛɛ leelee kaa di yəi lɔi mɛi naa kəlee.—Piɛli dɔlɔɔ 2:9 ; Túwɔ́ pələ 20:35 ɓo.
