16. Ka gu tɔɔ Ɓilihi la
1 ƁILIHI ƁƏ YƐNƐƐ ŊAAWOOƁOI
“ Yɛnɛɛ naa kəlee kaa mɛni ɲɔn nwun namu yee mu ” (Ɉaan dɔlɔɔ 5:19, Ɉɛɓɛ yili ninɛ).
Lə ɓə Sətana kaa bɔ ?
-
Sətana kaa bɔ ə gu hwiikpɛɛ, ə lɛɛ ə gwa Zehova ni gu wɔ ɓəlannaa kala.
-
Sətana ə mo yɛ nukanŋaa da Zehova ɓatoo maahɔlɔɓo, Zehova a kɛ luwɔ tooi diɛ. A nukanŋaa kaa diɛ Zehova kɔlɔnŋaa maakwɛli, diɛ nwɛlilakɛ, yili a nii kələn gwəi kpɔ kɛnɛ.
2 HÓ ƝƆU SƏTANA ƁA
“ Ka ka kpɔɔ maa yɛɛ Yálá yee mu, ka tɔɔ kpaan ɓilihi ɲɛi tɔwɔ, a pu, ə həɠə ka tɔwɔ ” (Ɉakə 4:7, Ɉɛɓɛ yili ninɛ).
Gu gɔlɔn ləi guɔ ma gwa pɛli tɔɔi Ɓilihi la ?
-
Zehova hwa hwaa ma Sətana ho mɛni lɔpee gəlee kɛ a guɔ. Zehova aa mo yɛ ma nu kpulu kɛnɛ nwun maa kaa pai ɓoi, diɛ pɛli tinaa kɛi ɲɛnɛɛ ninɛ hu.
-
Gwa lɛɛ a gu maalɛɠɛɛ Zehova ɓa, Ɓilihi hwa pɛli gwa Zehova ni gu wɔ nɛɛlaa kalai.
-
Korɛntə dɔlɔɔ 10:13 ; Hebreu 11:4-40
Zehova aa mo yɛ gaa pai kpɔnmaa tɛɛ gu pɔ guɔ pɛli lɛɛi a gu təlimoɔ ma, yɛ pələi lɔ ə gɛ la a ŋɔ kólókɛnua toloo.
3 GƐ A NƐLƐƐ SƏTANA ŊƆ HƐLƐNŊAA TƆWƆ
“ Gwəi kiliɠaa di ho looli guɔ ” (Korɛntə veelɛ 2:11).
Lə mɛni ɓa Ɓilihi a kɛ kɔ pɛlɛi Zehova ɓatoonua diɛ ? Ə lɛɛ hɛlɛn ləkɛɛ ɓə a kɛ dɛi di tɔwɔ ?
-
Ɉaan 15:19 ; Kulɔ ponoŋa hɛɓɛ 12:12, 17
Yɛnɛɛ nua ɓə Ɓilihi kaa di ŋaawooɓoi, kəlaa Zehova ɓatoo nua hwəi. Yili ɓə a gɛ yɛ kɔ pɛlɛ diɛ.
-
Gɔwɔtɔɔi 3:1 ; Galatə 5:19-21 ; Efɛsə 6:12
Mɛniɠaa gu hwiikpɛɛ ɉii Ɓilihi a gɛ pələ kwɛli ma ə di kɔlɔn. A ɲəi pənə di hu yɛ kɔ pɛlɛ la guɔ.
-
Ɉáláá hɛɓɛ 19:26 ; Esai 1:13, 15 ; Markə 5:25, 26
Kɛ́ gili-gili yii hwilɛn na ə́ halikɛ mɛni ɓa. Nu taɠaa da tɛɛ a kpaalə tamaa ə gɛ di kɔlɔi ə pono. Yili maamɛni ɓa, da pɛli di hwaa ma di hali ta kɛ diɛ yii a həɠə ɲinɛnŋaa yəi.
-
Dɔ́n ɉɛɓɛ 18:10-12 ; Gɛlaɠaa 19:19 ; Galatə 6:7 ; Kulɔ ponoŋa hɛɓɛ 21:8
Ɲinɛnŋaa da gaa diɛ hali mɛni wɛli kaa guɔ, da pɛli tɛɛ yili kɔwɔi diɛ gu ɲɛi kulɔ hali mɛni pɔ. Gwa tunwɔn hali mɛni ɓa, gu ho pai lɛɛi a gu təlimoɔ Zehova ɓa.
4 HÓ ƁILIHI ŊƆ LƐƐ MƐNIƓAA BƏLƏ TAƓA
“ Ɓilihi [...] kaa a lɛɛ mun, yɛ ɓo a lɛɛ nan ” (Ɉaan 8:44).
Gwa pɛli Ɓilihi ŋɔ lɛɛ məniɠaa ɓələ taɠai ləi ?
-
Romə 1:11, 12 ; Timote veelɛ 2:16
Nua da kɛ mɛniɠaa hu kulɔi vilɛnŋaa Ɓilihi da ŋɔ ɲinɛnŋaa diɛ, diɛ kɛ ma di hwaŋa kɛnɛi kpɔ kɛnɛ, ya pa di ho tii. Hɛnigɛ lɔ gu kɛ ma guɔ Ɓilihi da ŋɔ ɲinɛnŋaa di maamɛni ɓo yii a ɲɔu lɔ nua hu, yaamun yii maanɛɛ gu gɛ ya ɓaa guɔ gu keeni hwaŋalɔ.
-
Ɉɛlɛnŋaai Ɓilihi a dɛ nua tɔwɔ, gwa kɛ a di kɔlɔnŋaa, yili a kpɔnmaa tɛɛ gu pɔ gu tɔɔ kpaan Ɓilihi tɔwɔ, ə lɛɛ gu gu maalɛɠɛ Zehova ɓa.
