Ə́ kaa bɔ ə́i wɔ mɛni kɔlɔnŋaa ta pɛlɛma yɛ hwilɛn na Biblə ɓa ? Ə́ kaa bɔ ə́ vɛlisɛɛ ta ɲaakaa ? Nuai Biblə a di maa mɛni ɓo, ə́ kaa bɔ ə́ da maa mɛni kɔlɔn ? Yaa ta ə́ kpɔɔ maaləngɛ akɛ Yálá lawoo a pɛli kpɔnmaa tɛɛ ə́ pɔ ə́ maa liihɛlɛn da kpɛɛ mɛni ɓa ? Akɛ pələ ɓə ə́ wɔ kiliŋahiɛ kaa la, li ə́ hɛɓɛ hu pili ɉɛɓɛɠaa laakɛi.

Ya pɛli hɛɓɛ lɛlɛɛɠaa hu pilii laa. Zehova ŋɔ Kəlaɠaa di wɔ hɛɓɛɠaa kpɔ daa bɛɛn gəlee hwa hɔlɔɓo kiɛ ə́ lawoo hu. Kɛlɛɛ ya li ɉɛɓɛɠaa laakɛi ŋaakpɔn gɛ pɛlɛ la, ə́ kaa pai kalan ɉɛɓɛ ninɛɠaa kaai laa. Ə́ kaa nwɔnɔ kiɛ pai Biblə huwu takpɛliɠaa kaai laa, awala kɛtii dikisiɔnɛɛli, ə ma kɛ hɛɓɛ lɛlɛɛ takpɛliɠaa. Gɛɛ ŋaakpɔn və gɔwɔtɔɔ, awala kɛtii ŋaakpɔn gbɛɛ pulu, ya pɛli lii ə́ hɛɓɛ hu pili laa. Akɛ ɔlidinaatɛɛli kaa laa, ya pɛli Watchtower Library hu kaai. Watchtower Library kaa a hɛɓɛ yiliɠaai da pɛli moi ɔlidinatɛɛli hu. A kpɔnmaa tɛɛ nu pɔ wooɠaa da vɛlisɛɛɠaa ɲaakaa mɛni ɓa.

Nua di laa pɛɛn laakpan ɉu tee kalan ma, ɉɛɓɛɠaa laakɛi a kpɔnmaa tɛɛ di pɔ. Akɛ ə́ laa pɛɛin galan tii ɓa, ɉɛɓɛɠaa laakɛi a pɛli kpɔnmaa tɛɛ ə́ pɔ ɛsipozee kpɛtɛ mɛni ɓa. Laakpan ɉu tee kalan mɛi kaa mun mə ɲɛi kaa ɉɛɓɛɠaa laakɛi. A gɛ pələ kwɛli ma ɉɛɓɛɠaa di laa a nɛlɛɛ, ə lɛɛ ɉɛɓɛ ninɛɠaa kəlee di kɛ laa. Ə́ maakpaan a kɛ hɛɓɛ ta ɓa, laakpan ɉu tee kalan mɛi kaa mun, awala kɛtii Zehova ŋɔ Kəla yii ka yaa ka kɛ Biblə kalan ɉii a pɛli kpɔnmaa tɛɛ ə́ pɔ ə́ ɉɛɓɛi tii hɔlɔɓo. Kɛlɛɛ maa ho nɛɛ li nuta ho kulɔ a ɉɛɓɛɠaa tii ta ŋaakpɔn gɛ pɛlɛ mu. Maa ho nwɔnɔ nɛɛ li nuta ho ɉɛɓɛɠaa tii ta hu ɓəla, ho maaliɓi, awala kɛtii ho ɉu pɛɛn.

Biblə yɛ nu akɛ ə “ Yálá kɔlɔn ”, maanɛɛ ə gwɛli “ yɛ hɛngɔu yii ɉɔlɔɓo laa walaa ”. (Haŋɔn 2:1-5, TMN.) Ɉɛɓɛɠaa laakɛi a pɛli kpɔnmaa tɛɛ ə́ pɔ yili maa mɛni ɓa.

• Lə ɓə a hɔlɔɓo ɉɛɓɛɠaa laakɛi ŋaakpɔn gɛ pɛlɛ la ?

• Ya kɛ bɔ ə́ hɛɓɛ ta hu kaa ɉɛɓɛɠaa laakɛi, gbɛɛ ɓə a pɛli kpɔnmaa tɛɛ ə́ pɔ ?