Nu hee hweelɛ ɓə Biblə a di maa mɛni hukulɔ yɛ hwilɛn na kóló kɛ mɛni ɓa galangbɔn ɉu, diɛ ɓaa “ mɛi kaa nua da tiɓo kɛ nua ”. (Filipə 1:1, TMN.) Kɛlɛ-kɛlɛ hu, da kɛ a di tamaa kalangbɔn dɔnɔ hu. Tiɓo kɛ nua da kpɔnmaa tɛɛ ləi ku pɔ ?

Da kpɔnmaa tɛɛ kalaɉonŋaa pɔ. Ə ma kɛ di kaa a mu həɠə ninɛɠaa awala kɛtii nu maa pɔlɔɔɠaa, tiɓo kɛ nua kaa a nua yiiɠaa di maalɛɠɛɛ Zehova ɓa, diɛ kóló kɛ kpɔ kpaan təlimo laa hu. Da mɛni tamaa ɲɛi kulɔ yii vilɛnŋaa ŋaakpɔn gɛ pɛlɛ ɓa, ə lɛɛ galangbɔn ɉu mɛni taɠaa. Yili a kpɔnmaa tɛɛ kalaɉonŋaa pɔ di di ɲɛi lɛɛ kalan gɛɛ ɓa galangbɔn ɉu, ə lɛɛ diɛ galan nea mɛi kaa.

Da kóló tamaa kɛ. Tiɓo kɛ nua taɠaa da laakwiɛn gɛ ŋaakpɔn gɛi lowai. Daɠaa diɛ hee vaa kwɛliɠaa pulu, daɠaa diɛ wali laakɛ awala kɛtii diɛ kalan ɉɛɓɛɠaa ɲaakwɛlɛ. Tiɓo kɛ nua da kóló kɛ nwɔnɔ ŋaakpɔn gɛ pɛlɛ maahəɠə mɛni ɓa. Gbəli a kɛ, kalaɉonŋaa di mo diɛ, ə gɛ di kpɔnmaa tɛɛ nu maa pɔlɔɔɠaa pɔ. Kólói lɔpee da dɛɛ di pɔ, da gɛ a di kwəinɛɛ. Yili a gɛ, galangbɔn ɉu nua diɛ di maawiɛ. — Timɔtə dɔlɔɔ 3:13.

Di kaa a kɔɔmaa lɛlɛɛɠaa. Nuai da di kɛ a tiɓo kɛ nua di kaa a nua yiiɠaa di wɔ kalan ɲii ɓo pələ lɛlɛɛ. Di wɔ kalan gɛ pələ ŋaakpɔnŋaa diɛ a ku wɔ laana laa huwala-wala. Di kaa a kɔɔmaa lɛlɛɛɠaa Yálá lawoo laa həli mɛni hu, yili a ku hwaŋalɔ kuɔ kpɛli. Da kalaɉonŋaa da kɛi kóló kɛ gee ɓa, yili a kwəinɛɛ tɛɛ ku pɔ, ə ku yee lɔ gee (Efɛsə 4:16). Da lɛɛ lɔ ma diɛ kóló kɛ a nɛlɛɛ, ə lɛɛ la ɉu di pɛli kalaɉon naa hu, da di kɛ a kalaɉonŋaa.

• Túwɔ́ pələ ləkɛɛɠaa ɓə maanɛɛ ə kɛ nu yəi diɛ təɠa pa gɛi a tiɓo kɛ mun ?

• Lə ɓə tiɓo kɛ nua da gɛ kalangbɔn dɛ mɛni ɓa tɔwɔ ?