Mɛinɛɛɠaai tinaa gu kaa pai ɉɔlɔɓoi nwunmaaɓo halaa haalai, Zesu haa mɛni gwəlan ɉɛli a kpɔnmaa tɛɛ gu pɔ, gu gu kiliŋahiɛ diɛ, yɛ pələi haaɓəlaa nwun mɛni kaa la. Zehova ho kɛ ɓɔ nukanŋaa diɛ haa. Yili ɓə a gɛ, nu wɛlikɛmaa mun ɉaa mɛni yɛ ɓo la a mɛniɠaai da hee nukanŋaa hu lɔi mɛi, dɔnɔ (1 Kɔl 15:26). Ɓɛlowai Zesu ə ŋɔ kalan neai kaa la diɛ Lazali haa wɔlɔ ɓo, ə hee ɉu (Záán 11: 33-35). Zesu ə kulɔ Nan Yálá ɓa. Yili ɓa, gwa pɛli laana guɔ ma, gu wɔ nuta a haa guɔ nwɔlɔ ɓo, Zehova a naa kaa a hee ɉu (Záán 14:7). Zehova ŋɔ ti nua yiiɠaa daa haa, di nwun nwɛli kaa kpɔ ma kɛnɛ. Guɔ kpɛli gu kaa bɔ, gu wɔ nua yiiɠaa daa haa, di nwun (Zɔbə 14:14, 15,TMN).

Zehova kaa a Yálá yii hwa puɉu túwɔ́ ɓo, gwa pɛli laana guɔ ma puɉu túwɔ́ ho pai kɛi haaɓəlaa nwun mɛni hu (1 Kɔl 14:33, 40). Gu ho pai kuu kɛi haaɓəlaa nwun mɛni ɓa, yaamun gaa kiɛ yɛ gu kaa pai kɛi di laakwiɛn ɉii. Ya kɛ lowai həɠəi yɛ́ ə́ kiliŋahiɛ haaɓəlaa nwun mɛni ɓa, ɉɛnɛ ə ma kɛ ə́ wɔ nuta a haa ? (2 Kɔl 4:17, 18). Ya kɛ Zehova mamaɓoi nwunmaaɓo halaa maa mɛni ɓa, da haaɓəlaa nwun mɛni hukulɔ mɛni guɔ Biblə hu ? (Kɔl 3:15).

• Ə́ ɓəlan nɛlɛ da ə́ wɔ nu nɛlɛ ɓə aa haa, yii ə́ kaa bɔ ə́i ɲɛi tɔɔ ma nwɔnɔ ?

• Nuai Biblə a di maamɛni ɓo, nɛlɛ ɓə ə́ kaa bɔ ə́ gaa, ka yaa ka lono ?