KILISTALEA YII PƏLƏ
Nuai gu di təli, ka gu di laakwiɛn
Hwaɠan ŋɔ holo 23 yələ, ka gu kaa pai nu miliɔn 12 da da maakpɔn ɉii Zesu haa mɛni gwəlan ɉɛli ɓa.Kəlahwaa kɛnɛ kaa pai ɓoi, maahɔlɔɓo bələɓo kɛ mun kaa pai Zehova ŋɔ mɛinɛɛ maamɛni hukulɔi, yai a nwun maaɓo halaa.Mɛinɛɛɠaai nukanŋaa kaa tinaa pai ɉɔlɔɓoi ɉalaa tii haalai, bələɓo kɛ mun kaa pai nwɔnɔ daɠaa maamɛni ɓoi (Izai 11:6-9 ; 35:5, 6 ; 65:21-23, TMN ; Záán 3:16). Ə ma kɛtii, bələɓo kɛ mun yaa tɔnɔ lɔ hwəi pai kəla hwaa ɓoi ɉɛlii tii ɓa. Gu tɛi-tɛi kəlee a pɛli da kɛi a laakwiɛn gɛɛ (Rɔmu 15:7). Nuai gwa di təli, di laakwiɛn bələ taɠaa ka :
-
Hó kɛ ə́ kaa lii ə́ hee yɛ́ ɉɛli kɔwɔtɔɔi lowai maakpɔn. Yaamun, nua laakwiɛn, diɛi gu di təli, da gu nan nonnii yiiɠaai daa di kɔlɔ haa diɛ galan mɛni hu. Ya gɛ a ɲɛi hwaŋa da kwəinɛɛ, yɛ́ yɛlɛ ə́ laa kwɛlɛ.
-
Nuai yɛ́ kpinii ə́ di təli, pələi ma ə́ kaa pai kɛi ə́ ɲɛi hee la di ɲɛi, gɛ pələ kwɛli ma, ə́i ɲɛi hee nu takpɛliɠaa ɲɛi, diɛi dəliɓo hɛɓɛ ta hɔlɔɓo. Mo nu ninɛ taɠaa diɛ yii yaan ka diɛni ka hee ka kee kwɛlɛ kaa vɛlisɛɛɠaa ɓo gee ɓa ə́ wɔ Bibləi hu, ə lɛɛ kaa nwələ too ə́ wɔ wələ hɛɓɛi hu.
-
Bələɓo a kpɛɛ, ya pɛli ə́ nu ninɛɠaa tii ta ŋɔ kɛɛmaalənŋaa mukulɔ. Gbəli a kɛ kalangbɔn dakpɛli hu nua diɛ pa di wɛi kɛ mɛni ɓa. Yili ɓa, lowai a wala hɔlɔɓo ə́ yəi, gɛ pələ kwɛli ma, ə́ li ə́ mɛi kaa ɉaɉa. Ya wala kɛ a maa nui kɔlɔnŋaa, ya pɛli ə́ mo ma yɛ́ ma : “ Ə́ wɔ kiliŋahiɛ kaa ləi yɛ hwilɛn na ɉɛlii ŋɛi ɓa ? Gáá bɔ ə́i maa hɔlɔɓo pələ lɛ máá yii yaan ŋi pa ŋi ə́ mɛikaa ”.