JW LIBRARY
Descargar e administrar publicacións en iOS
En JW Library atoparás centos de libros, folletos, folliñas e vídeos que poderás ler ou ver sen conexión a Internet.
Para descargar e administrar as publicacións, sigue as seguintes instrucións:
Descargar unha publicación
Podes descargar tantas publicacións como desexes para lelas ou estudalas sen estar conectado a Internet.
Preme en Publicacións na barra do menú para ver a lista de publicacións.
Preme o botón Idiomas para ver a lista dos idiomas nos que hai publicacións dispoñibles. Selecciona o idioma que desexes. Os que utilices máis a miúdo aparecerán ó inicio da lista. Tamén podes atopar un idioma escribindo o seu nome.
En JW Library existen varias maneiras de atopar as publicacións.
A sección Categorías agrupa as publicacións do idioma seleccionado por categorías, como por exemplo libros, folliñas ou vídeos. Preme nalgunhas destas categorías para ver as subcategorías. Por exemplo, os anos no caso de La Atalaya, ou os distintos tipos de vídeos. Pulsa en Tódalas categorías para volver á lista inicial.
A sección Novidades contén as publicacións máis recentes no idioma que teñas seleccionado.
As publicacións sen descargar aparecerán coa imaxe dunha nube. Pulsa nunha publicación para descargala. Cando estea descargada, a imaxe da nube desaparecerá. Pulsa outra vez na publicación para abrila.
Na sección Descargado podes acceder a tódalas publicacións que teñas descargadas en calquera idioma. Podes ordenar a lista polas Máis usadas, Menos usadas ou por Tamaño.
Eliminar unha publicación
Podes borrar unha publicación se xa non a necesitas, ou se precisas liberar espazo no teu dispositivo.
Preme en Publicacións na barra do menú e a continuación preme nunha categoría de publicacións (por exemplo, Libros) para ver a lista de publicacións. Preme en Seleccionar e a continuación nas publicacións que desexas eliminar. Tamén podes manter pulsadas as publicacións e premer Eliminar. A continuación confirma que desexas eliminar as publicacións.
Se precisas liberar espazo no teu dispositivo, podes borrar as publicacións que apenas uses ou que ocupen moito. Preme en Publicacións na barra do menú. Vai á sección Descargado e ordena a lista por Menos usadas ou por Tamaño. Elimina as publicacións que non vaias usar máis.
Actualizar unha publicación
Cando haxa actualizacións dispoñibles dalgunha publicación que teñas descargada, aparecerá un símbolo ó lado da mesma para indicalo.
Ó pulsar na publicación, aparecerá unha mensaxe indicando que hai unha actualización dispoñible. Preme en Descargar para baixar a actualización, ou en Máis tarde se non desexas actualizala nese momento.
Para ver que publicacións tes sen actualizar, preme en Publicacións na barra do menú. Se hai algunha actualización dispoñible, aparecerá nunha sección chamada Actualizacións pendentes. Preme nesa sección para velas. Pulsa nunha publicación para actualizala, ou no botón Actualizar todo para descargar tódalas actualizacións.
Estas funcións están dispoñibles dende febreiro de 2015 na versión da aplicación JW Library 1.4, compatible con iOS 6.0 ou posterior. Se non aparecen na túa aplicación, sigue as instrucións do artigo “Os primeiros pasos en JW Library para iOS”, no apartado Actualizacións.
