1. Que lle preocupaba a Xesús a noite antes de morrer?

 A NOITE antes de morrer, Xesús estaba preocupado polo futuro dos seus discípulos porque sabía que pronto tería que deixalos. Díxolles: “Non sodes do mundo” (Xoán 15:19, AGL). Máis tarde aquela noite, oroulle a Xehová a favor deles e dixo: “Eles non son do mundo, como eu tampouco non son do mundo” (Xoán 17:15, 16). Que significan estas palabras de Xesús?

2. A que se refire a expresión “do mundo”?

² Neste contexto, a expresión “do mundo” refírese á xente que non coñece a Deus e está baixo o control de Satán (Xoán 14:30; Efesios 2:2; Santiago 4:4; 1 Xoán 5:19). Como podemos evitar ser “do mundo”? Neste capítulo veremos que facer para conseguilo. Primeiro, ser leais ó Reino de Deus e manternos á marxe da política, é dicir, ser neutrais. Segundo, loitar contra o espírito do mundo. Terceiro, non chamar a atención coa nosa roupa e aspecto. Cuarto, ver os cartos de xeito equilibrado. E quinto, levar posta a armadura de Deus (ver a nota 16).

3. Cal era a postura de Xesús sobre a política?

³ Cando estivo na terra, Xesús viu que as persoas tiñan moitos problemas e que a súa vida non era fácil. Preocupábase por elas e quería axudalas. Pero non se converteu nun líder político. Sabía que o que de verdade precisaban era o Reino de Deus, do que el sería Rei. O tema principal da súa predicación foi este Reino (Daniel 7:13, 14; Lucas 4:43; 17:20, 21). Xesús foi neutral e sempre se mantivo á marxe da política. Cando compareceu perante o gobernador romano Poncio Pilato, dixo: “O meu reino non é deste mundo” (Xoán 18:36). Os seus discípulos seguiron o seu exemplo. A obra On the Road to Civilization (Camiño da civilización) di que os primeiros cristiáns “negábanse a ocupar ningún cargo político”. Actualmente, os verdadeiros cristiáns facemos o mesmo. Apoiamos con lealdade o Reino de Deus e mantémonos á marxe da política deste mundo (Mateo 24:14).

4. Como apoiamos os cristiáns o Reino de Deus?

⁴ Os embaixadores representan o seu goberno noutros países e mantéñense á marxe dos asuntos políticos deses países. Os cristiáns unxidos, que teñen a esperanza de reinar con Cristo nos ceos, actúan como embaixadores, tal e como afirmou o apóstolo Paulo: “Somos, logo, embaixadores de Cristo” (2 Corintios 5:20). Isto significa que representan o goberno de Deus. Non se implican na política nin nos gobernos deste mundo (Filipenses 3:20). Máis  ben, dan a coñecer o Reino, ou goberno, de Deus a millóns de persoas. As “outras ovellas”, que teñen a esperanza de vivir para sempre no novo mundo de Deus, apoian os unxidos e tamén se manteñen á marxe da política (Xoán 10:16; Mateo 25:31-40). Ningún cristián verdadeiro se implica na política deste mundo (le Isaías 2:2-4).

5. Cal é unha das razóns polas que non imos á guerra?

⁵ Os cristiáns verdadeiros vemos os nosos compañeiros de crenza como parte da nosa familia. Estamos unidos sen importar a nosa orixe ou nacionalidade (1 Corintios 1:10). Polo tanto, se fósemos á guerra estariamos loitando contra a nosa familia, contra os irmáns a quen Xesús nos mandou amar  (Xoán 13:34, 35; 1 Xoán 3:10-12). De feito, Xesús incluso nos mandou amar os nosos inimigos (Mateo 5:44; 26:52).

6. Cal é a postura dos cristiáns sobre os gobernos?

⁶ Inda que os cristiáns somos neutrais, esforzámonos por ser bos cidadáns e respectamos as autoridades. Por exemplo, pagamos impostos e cumprimos coa lei. Pero, ante todo, dámoslle “a Deus o de Deus” (Marcos 12:17; Romanos 13:1-7; 1 Corintios 6:19, 20). Isto inclúe amalo, obedecelo e servilo. Polo tanto, obedecemos a Xehová mesmo se implica perder a nosa vida (Lucas 4:8; 10:27; le Feitos 5:29; Romanos 14:8).

7, 8. a) Que é o “espírito do mundo”? b) Que efecto ten este espírito nas persoas?

⁷ Manternos separados do mundo de Satán significa non deixar que o “espírito do mundo” nos controle. Este espírito é a forma de pensar e actuar que procede de Satán, e controla as persoas que non serven a Xehová. Os cristiáns debemos loitar contra o “espírito do mundo”. Como dixo Paulo, “nós non recibímo-lo espírito do mundo, senón o Espírito que procede de Deus” (1 Corintios 2:12; Efesios 2:2, 3; ver a nota 17).

⁸ O espírito do mundo volve as persoas egoístas, orgullosas e rebeldes. Fainas crer que non precisan obedecer a Deus. Satanás intenta que as persoas fagan o que queiran sen pensar nas consecuencias e que se deixen levar polas súas inclinacións  e desexos (1 Timoteo 6:9, 10; 1 Xoán 2:16). O Demo pon especial empeño en enganar os servos de Xehová para que pensemos coma el (Xoán 8:44; Feitos 13:10; 1 Xoán 3:8).

9. Como nos pode chegar a influír o espírito do mundo?

⁹ O espírito do mundo é coma o aire que respiramos, está por todas partes. Se non facemos o posible por loitar contra el, acabará afectándonos (le Proverbios 4:23). Pode empezar dun xeito que pareza inofensivo. Por exemplo, poderiamos deixarnos influír pola forma de pensar e actuar das persoas que non serven a Xehová (Proverbios 13:20; 1 Corintios 15:33). Ou tamén podería influírnos a través da pornografía, a apostasía ou o espírito competitivo do deporte (ver a nota 18).

10. Que podemos facer para loitar contra o espírito do mundo?

¹⁰ Que podemos facer para evitar que o espírito do mundo nos controle? Debemos estar preto de Xehová e deixar que nos guíe coa súa sabedoría. Oremos constantemente para pedirlle o seu espírito santo e manteñámonos ocupados nas actividades cristiás. Xehová é o ser máis poderoso do Universo, así que podemos confiar en que nos axudará a loitar contra o espírito do mundo (1 Xoán 4:4).

11. Como inflúe o espírito do mundo no aspecto e forma de vestir?

¹¹ Co noso aspecto e forma de vestir tamén demostramos que non somos do mundo. Moitas persoas visten para chamar a atención, espertar desexos  sexuais nos demais, reflectir unha actitude rebelde contra a sociedade, ou presumir dos cartos que teñen. A outras persoas non lles preocupa o seu aspecto, ou mesmo prefiren ir desaliñados ou sucios. Non debemos permitir que ningunha destas actitudes inflúa no noso aspecto e forma de vestir.

12, 13. Que principios bíblicos nos axudarán a escoller a nosa roupa?

¹² Os servos de Xehová debemos levar roupa limpa, ben coidada, de bo gusto e apropiada para  a ocasión. Como di a Biblia, imos “con vestido decente, con reverencia e modestia”, como cómpre ós verdadeiros cristiáns (1 Timoteo 2:9, 10; Xudas 21).

¹³ A nosa forma de vestir pode influír no que outros pensan de Xehová e dos seus servos. Por iso procuramos facelo todo “para gloria de Deus” (1 Corintios 10:31). A modestia implica respectar os sentimentos e opinións dos demais. Por iso, non esquezamos que as decisións que tomemos sobre o noso aspecto e a nosa roupa afectarán a outras persoas (1 Corintios 4:9; 2 Corintios 6:3, 4; 7:1).

14. Que preguntas debemos facernos ó escoller a roupa para as actividades cristiás?

¹⁴ Pensemos agora en como imos vestidos ás reunións ou a predicar. Chamamos demasiado a atención sobre nós? Facemos que os demais se sintan incómodos ou avergonzados? Cremos que a nosa forma de vestir é só cousa nosa? (Filipenses 4:5; 1 Pedro 5:6) É normal que queiramos vernos ben. Pero o que de verdade nos fai atractivos é a nosa forma de ser. O que Xehová ve de nós é a “personalidade escondida dentro”. Se somos bos cristiáns, “isto si que é algo precioso ós ollos de Deus” (1 Pedro 3:3, 4).

15. Por que Xehová non nos deu unha lista de regras sobre como vestir?

¹⁵ Xehová non nos deu unha lista de regras sobre como vestir. En vez diso, deunos unha serie de principios bíblicos para axudarnos a tomar boas decisións (Hebreos 5:14). Deus quere que baseemos as nosas decisións, sexan grandes ou pequenas, no  noso amor por el e polo próximo (le Marcos 12:30, 31). Arredor do mundo, os servos de Xehová vestimos diferente dependendo da nosa cultura e gustos persoais. Esta fermosa variedade fai a vida máis interesante.

16. a) En que se diferencia o que ensinou Xesús do que este mundo pensa dos cartos? b) Que preguntas deberiamos facernos?

¹⁶ Satán quere que pensemos que os cartos e as posesións dan a felicidade, pero os servos de Xehová sabemos que isto non é certo. Confiamos nas  seguintes palabras de Xesús: “Por moito que un teña non por iso a súa vida depende dos seus bens” (Lucas 12:15). Os cartos non dan a verdadeira felicidade. Por exemplo, non poden darnos nin amigos de verdade, nin paz mental, nin vida eterna. Por suposto, os cartos fan falta para vivir, e todos queremos desfrutar da vida. Pero Xesús ensinou que a verdadeira felicidade depende de ser bos amigos de Xehová e ter como prioridade servilo (Mateo 4:4; 1 Timoteo 6:8). Pensa nisto: “Estou influído pola opinión que este mundo ten dos cartos? Estou sempre pensando no diñeiro ou falando del?” (Lucas 6:45; 21:34-36; 2 Xoán 6).

17. Que vantaxes ten non darlles demasiada importancia ós cartos?

¹⁷ Se nos centramos en servir a Xehová e non lles damos ós cartos a importancia que lles dá este mundo, a nosa vida terá sentido (Mateo 11:29, 30). Estaremos contentos co que temos e sentiremos paz interior (Mateo 6:31, 32; Romanos 15:13). Preocuparémonos menos polos bens materiais (le 1 Timoteo 6:9, 10). Seremos felices ó compartir o que temos (Feitos 20:35). Poderemos pasar máis tempo coas persoas ás que queremos. Mesmo é posible que durmamos mellor (Eclesiastés 5:11 [5:12, NM]).

18. Que teima en conseguir Satanás?

¹⁸ Satanás teima en destruír a nosa amizade con Xehová. Por iso debemos facer todo canto poidamos para protexela. Temos unha loita “contra os espíritos do mal” (Efesios 6:12). Satán e os seus demos  non queren que sexamos felices nin que vivamos para sempre (1 Pedro 5:8). Inda que estes inimigos son poderosos, podemos vencelos coa axuda de Xehová.

19. Como describe Efesios 6:14-18 a “armadura de Deus”?

¹⁹ No pasado, os soldados poñían unha armadura para protexerse na batalla. Nós tamén debemos poñer a “armadura de Deus” para protexernos (Efesios 6:13). A Biblia di o seguinte sobre esta armadura: “Estade, logo, en pé: cinguídevos co cinto da verdade, revestidos coa coiraza da xustiza e calzados os pés co afervoamento do Evanxeo da paz. Tede sempre no brazo o escudo da fe, que con el poderedes apagar tódolos dardos incendiarios do maligno. Collede o casco da salvación e a espada do Espírito, que é a palabra de Deus, con toda clase de oracións e de súplicas, orando decote no Espírito e velando por iso con asiduidade e súplicas por tódolos cristiáns” (Efesios 6:14-18).

20. Que debemos facer para que a nosa armadura nos protexa?

²⁰ Se un soldado esquecía poñer algunha peza da armadura, parte do seu corpo quedaba desprotexido e o inimigo intentaba atacalo xusto por aí. Do mesmo xeito, para que a nosa armadura nos protexa, non debemos esquecer ningunha peza. Ademais, debemos levala posta todo o tempo e mantela en boas condicións. A nosa loita seguirá mentres este mundo de Satán non sexa destruído, e el e mailos seus demos sexan eliminados da terra (Apocalipse 12:17; 20:1-3). Polo tanto, se estás a loitar  contra malos desexos ou algunha debilidade, non te rendas (1 Corintios 9:27).

21. Que debemos facer para vencer o Demo?

²¹ Inda que o Demo é máis forte ca nós, podemos vencelo se temos a Xehová do noso lado. Para permanecermos a carón de Deus, debemos orarlle, estudar a súa Palabra e relacionarnos cos irmáns (Hebreos 10:24, 25). Isto axudaranos a seguir sendo leais e a estarmos preparados para defender a nosa fe.

22, 23. a) Que nos axudará a estar sempre preparados para defender a nosa fe? b) Que veremos no seguinte capítulo?

²² Como nalgúns temas as testemuñas de Xehová pensamos moi diferente da maioría, debemos estar preparados para defender a nosa fe en todo momento (Xoán 15:19). Por iso é importante que nos preguntemos: “Entendo ben por que pensamos e actuamos así? Estou convencido de que a Biblia e o criado fiel e prudente están no certo? (Mateo 24:45; Xoán 17:17) Síntome orgulloso de ser testemuña de Xehová? (Salmo 34:3 [34:2, NM]; Mateo 10:32, 33) Son capaz de explicar as miñas crenzas?” (le 1 Pedro 3:15).

²³ En moitos casos é fácil ver o que debemos facer para non ser do mundo, pero noutros non o é tanto. Satán usa todo tipo de trampas para vencernos. Unha delas é o entretemento. No seguinte capítulo, veremos como podemos escoller ben o entretemento.