1, 2. a) Que agardan as parellas ó casar? b) Que preguntas analizaremos neste capítulo?

 IMAXINA unha parella de noivos no día da súa voda. Están moi ilusionados co futuro que teñen por diante, e están cheos de soños e esperanza. Agardan ter un matrimonio feliz e duradeiro.

² Porén, que un matrimonio comece ben non implica que vaia seguir sempre así. Para que un matrimonio sexa feliz e duradeiro, a parella necesita seguir os consellos de Deus. Por iso imos analizar a resposta que dá a Biblia ás seguintes preguntas: Cales son algunhas vantaxes do matrimonio? Se vas casar, como podes escoller ben o teu cónxuxe? Como podes ser ti un bo cónxuxe? Que che pode axudar a ter un matrimonio duradeiro? (le Proverbios 3:5, 6).

3. Pensas que é preciso casar para ser feliz? Explica a túa resposta.

³ Algúns pensan que non poden ser felices se non casan. Pero iso non é certo. Xesús dixo que estar  solteiro podía ser un agasallo (Mateo 19:10-12). E o apóstolo Paulo falou das vantaxes de estar solteiro (1 Corintios 7:32-38). Casar ou non casar é cousa túa. Non deixes que os amigos, a familia ou a cultura decidan por ti.

4. Cales son algunhas vantaxes dun bo matrimonio?

⁴ A Biblia di que o matrimonio tamén é un agasallo de Deus e que ten algunhas vantaxes. Xehová dixo sobre Adam: “Non está ben o home só. Vou facer para el unha axuda ó seu xeito” (Xénese 2:18). Xehová creou a Eva para ser a muller de Adam, e así formou a primeira familia humana. Ó casar, os cónxuxes xa non están sós, poden desfrutar da súa compañía e axudarse un ó outro. Ademais, se a parella ten fillos, o matrimonio proporciónalles un ambiente estable no que medrar. Pero ter fillos non é o único obxectivo do matrimonio (Salmo 127:3; Efesios 6:1-4).

5, 6. Como pode o matrimonio ser coma unha “corda de tres fíos”?

⁵ O rei Salomón escribiu: “Mellor son dous ca un: tirarán bo proveito do traballo de entrambos. Se caen, un pode axudar ó outro. Mais, ¡malia o só! Cando caia non terá quen o erga”. E engadiu: “Corda de tres fíos non se rompe axiña” (Eclesiastés 4:9-12).

⁶ Un bo matrimonio no que ambos se axudan, consolan e protexen é a amizade máis estreita que pode existir entre dúas persoas. O amor fortalece o matrimonio, pero será inda máis forte se os dous  serven a Xehová. Desa maneira chegará a ser coma unha “corda de tres fíos” que se entrelazan. Unha corda de tres fíos é moito máis resistente ca unha de dous. Do mesmo xeito, o matrimonio será máis resistente se Xehová forma parte del.

7, 8. Que di a Biblia sobre o matrimonio?

⁷ Despois de casaren, o marido e a muller poden ter relacións sexuais, satisfacendo así as necesidades un do outro (Proverbios 5:18). Pero se alguén casa só para satisfacer os seus desexos sexuais, quizais non escolla ben o seu cónxuxe. Por iso, se queremos casar, a Biblia aconsella facelo despois da idade na que os desexos sexuais son máis fortes. Deste xeito, poderán pensar con máis claridade e tomar unha mellor decisión (1 Corintios 7:9; Santiago 1:15).

⁸ Se estás pensando en casar, deberías ser realista e recoñecer que tódolos matrimonios afrontan desafíos. Paulo dixo que “os que casen terán tribulacións na carne” (1 Corintios 7:28). Mesmo os mellores matrimonios teñen problemas. Así que, se decides casar, asegúrate de escoller ben o teu cónxuxe.

9, 10. Que podería pasar se casamos con alguén que non serve a Xehová?

⁹ Ó escoller cónxuxe é importante lembrar o principio bíblico de non estar baixo o mesmo xugo “en parella desigual cos infieis” (2 Corintios 6:14). O matrimonio pode compararse a un xugo. Un labrego que coida ben dos seus animais non poñería a tirar baixo o mesmo xugo un boi e mais  un burro, pois son animais de diferente forza e tamaño, e ámbolos dous sufrirían. Do mesmo xeito, se pasamos por alto este principio bíblico, o máis probable é que teñamos moitos problemas. Por iso a Biblia recomenda casar só con alguén que tamén serve a Xehová (1 Corintios 7:39).

¹⁰ Poida que un cristián pense que é mellor casar con alguén que non serve a Xehová que estar só. Pero quen pasa por alto o que di a Biblia adoita sufrir dor e tristeza. Para nós o máis importante é servir a Xehová. Como te sentirías se non puideses compartir co teu cónxuxe a parte máis importante da túa vida? É por iso que moitos decidiron quedar solteiros antes que casar con alguén que non serve a Xehová (le Salmo 32:8).

11. Que podes facer para escoller ben o teu cónxuxe?

¹¹ Isto non quere dicir que calquera servo de Xehová vaia ser un bo cónxuxe para ti. Se estás pensando en casar, busca alguén que de verdade che guste e con quen te leves ben. Agarda ata atopares alguén que tamén poña a Xehová no primeiro lugar na súa vida e que teña metas semellantes ás túas. Dedica tempo a ler e reflexionar nos bos consellos sobre o matrimonio que aparecen nas publicacións do criado fiel (le Salmo 119:105).

12. Que aprendemos na Biblia sobre os matrimonios concertados?

¹² Nalgunhas culturas, enténdese que os pais saben quen será o mellor cónxuxe para os seus fillos, así que son eles quen o escollen. Este costume era habitual en tempos bíblicos. Por exemplo,  cando Abraham escolleu unha muller para o seu fillo Isaac, non se centrou nos cartos ou na posición social, senón en que ela amase a Xehová (Xénese 24:3, 67). Se a túa familia decide seguir este costume, a Biblia axudaralles ós teus pais a saber que calidades buscar (ver a nota 25).

13-15. a) Como pode un home prepararse para ser un bo marido? b) Como pode unha muller prepararse para ser unha boa esposa?

¹³ Estás pensando en casar? Entón sería bo que te  preguntes: “Estou preparado?”. Talvez penses que si, pero imos ver o que significa realmente estar preparado para casar. Poida que te sorprendas.

¹⁴ A Biblia explica que o home e a muller teñen funcións diferentes na familia. Por iso é lóxico pensar que estar preparado para o matrimonio non é o mesmo para un home que para unha muller. Se un home está pensando en casar, ten que preguntarse se está listo para ser o cabeza de familia. Xehová espera del que atenda as necesidades físicas e emocionais da muller e dos fillos. Pero a súa responsabilidade máis importante é axudar á súa familia a adorar a Deus. A Biblia describe o home que non coida da familia coma alguén “peor ca un non crente” (1 Timoteo 5:8). Así que, se es un home que quere casar, pensa en como podes poñer en práctica o principio de Proverbios 24:27: “Pon orde no teu traballo exterior, arránxate na túa leira; despois poderás construí-la casa”. Dito doutro xeito, antes de casar, asegúrate de seres a clase de marido que Xehová espera.

¹⁵ A muller que está pensando en casar debería preguntarse se está preparada para as responsabilidades que ten unha esposa ou mesmo unha nai. A Biblia menciona algúns xeitos nos que unha boa muller coida do seu home e dos seus fillos (Proverbios 31:10-31). Hoxe moitos homes e mulleres só pensan no que debería facer o seu cónxuxe por eles. Pero Xehová quere que pensemos no que podemos facer nós polo noso cónxuxe.

16, 17. Se estás pensando en casar, en que deberías reflexionar?

 ¹⁶ Antes de casares, reflexiona no que Xehová di sobre os cónxuxes. Inda que o home é o cabeza de familia, iso non lle dá dereito a maltratar a súa familia, nin física nin emocionalmente. Un bo cabeza de familia segue o exemplo de Xesús, quen sempre é amable e agarimoso coas persoas que ten ó seu coidado (Efesios 5:23). Por outra banda, a muller debe reflexionar no que implicará apoiar as decisións do seu home e colaborar con el (Romanos 7:2). Debe preguntarse se será feliz tendo un home imperfecto como cabeza da súa familia. Se pensa que non, quizais decida que é mellor quedar solteira por un tempo.

¹⁷ Os cónxuxes necesitan preocuparse máis pola felicidade da súa parella ca pola súa propia (le Filipenses 2:4). Paulo escribiu: “Todos e cada un de vós, debe ama-la súa muller coma a si mesmo; e a muller, que respecte ó seu marido” (Efesios 5:21-33). Para que o matrimonio vaia ben, ámbolos dous cónxuxes precisan sentirse queridos e respectados. Pero, sobre todo, a muller precisa saber que o seu marido a quere, e o home que a súa muller o respecta.

18. Por que as parellas precisan ter coidado mentres son noivos?

¹⁸ Namentres son noivos, as parellas poden desfrutar de pasar tempo xuntos mentres se coñecen un ó outro. Tamén é o momento de seren realistas e honestos, de xeito que poidan decidir se de verdade queren pasar o resto da súa vida xuntos.  Ambos deben aprender a comunicarse e a descubrir que hai no corazón da outra persoa. Segundo a súa relación se vai estreitando, é natural que se sintan atraídos fisicamente. Por iso precisan controlar o xeito de expresar os seus sentimentos antes de casar para non faceren nada que lle desagrade a Deus. O amor verdadeiro axudaralles a saber controlarse e evitará que fagan algo que poida estragar a súa relación e a amizade que teñen con Xehová (1 Tesalonicenses 4:6).

19, 20. Que pensan os cristiáns do matrimonio?

¹⁹ Moitos libros e películas rematan cunha voda grande e fermosa. Pero na vida real, a voda é só o comezo. Xehová creou o matrimonio como unha unión permanente (Xénese 2:24).

²⁰ Hoxe moitos ven o matrimonio coma un acordo temporal. É fácil casar, pero tamén é fácil divorciarse. Por iso, cando xorden problemas, algúns pensan en deixar o seu cónxuxe e poñerlle fin ó matrimonio. Pero lembra o exemplo da corda de tres fíos entrelazados que aparece na Biblia. Unha corda coma esa non rompe mesmo inda que estea baixo moita presión. Se buscamos a axuda de Xehová, o noso matrimonio pode ser duradeiro. Xesús dixo: “O que Deus xuntou, que non o separe o home” (Mateo 19:6).

21. Que lles axudará ós cónxuxes a seguir queréndose?

²¹ Todos temos puntos fortes e puntos débiles. É moi fácil fixarse só nos defectos dos demais, sobre todo nos do noso cónxuxe. Pero se o facemos, non seremos felices. Para termos un matrimonio feliz, debemos centrarnos nas cousas boas da nosa parella. Claro, estamos casados cunha persoa imperfecta. Entón, é realista esta forma de pensar? Abofé que si. Xehová sabe que somos imperfectos e, inda así, céntrase nas nosas boas calidades. Pobre de nós se non o fixese! O salmista dixo: “Se ti levas conta dos pecados, ¿quen, Señor, se terá en pé?” (Salmo  130:3). Os cónxuxes poden seguir o exemplo de Xehová ó centrárense nas cousas boas da súa parella e ó estaren dispostos a perdoar decontado (le Colosenses 3:13).

22, 23. Que bo exemplo lles puxeron Abraham e Sara ós casados?

²² Segundo vaian pasando os anos, o matrimonio  pode facerse máis forte. Abraham e Sara tiveron un matrimonio longo e feliz. Cando Xehová lle dixo a Abraham que deixase a súa casa na cidade de Ur, é probable que Sara tivese xa máis de 60 anos. Imaxina o difícil que tivo que ser para ela deixar un fogar moi cómodo para ir vivir en tendas de campaña. Pero Sara era unha boa amiga e compañeira, e respectaba moito a Abraham. Por iso apoiou sempre as súas decisións e fixo todo o posible para que tivesen éxito (Xénese 18:12; 1 Pedro 3:6).

²³ Por suposto, que un matrimonio vaia ben non significa que o home e a muller vaian estar sempre de acordo en todo. Nunha ocasión, Abraham non estaba de acordo con Sara, e Xehová díxolle: “Fai o que Sara che di”. Abraham fíxolle caso e as cousas saíron ben (Xénese 21:9-13). Se algunha vez ti e maila túa parella non pensades igual, non vos desanimedes. O importante é que vos sigades tratando con agarimo e respecto, mesmo cando pensedes de xeito diferente.

24. Como pode o matrimonio darlle gloria a Xehová?

²⁴ Na congregación cristiá hai miles de matrimonios felices. Se queres casar, recorda que escoller cónxuxe é unha das decisións máis importantes que vas tomar. Será algo que afectará o resto da túa vida, así que busca a guía de Xehová. Escolle ben o teu cónxuxe, prepárate para o matrimonio, e esfórzate por crear unha unión forte e chea de amor que lle dea gloria a Xehová.