Mentres ías lendo este folleto, sorprendícheste ó ver que o que di a Biblia é cientificamente exacto? Moitos sorpréndense ó saber isto. Tamén se sorprenden ó darse conta de que a Biblia non di algunhas das cousas que moitas relixións afirman que di. Por exemplo, a Biblia non di que Deus fixese o Universo e tódolos seres vivos en 6 días de 24 horas. De feito, non hai nada nela que contradiga os diferentes cálculos científicos sobre a idade do Universo ou da Terra. a

Ademais, o breve relato de como introduciu Deus a vida neste planeta deixa moita marxe para a investigación e as teorías científicas. O que a Biblia si di é que Deus creou tódalas formas de vida e que os seres vivos foron feitos segundo “os moitos xéneros” (Xénese 1:11, 21, 24). Poida que isto non concorde con algunhas teorías científicas, pero tampouco se opón ós feitos científicos probados. A historia da ciencia demostra que as teorías van e veñen, pero os feitos permanecen.

Agora ben, moitas persoas non se deciden a investigar a Biblia porque se desilusionaron coa relixión. Cando miran para as relixións, só ven hipocrisía, corrupción e violencia. Pero, é xusto xulgar a Biblia pola conduta dalgúns que din representala? Moitos científicos sinceros e de bo corazón horrorizáronse ó ver que algúns fanáticos violentos usaron a teoría da evolución para xustificar as súas ideas racistas. Sería xusto xulgar a teoría da evolución sobre esa base? Está claro que o mellor sería examinar o que di a teoría e despois comparalo coas probas.

Invitámoste a que fagas o mesmo coa Biblia. Poida que te sorprenda descubrir que o que ensina non ten nada que ver coas ensinanzas da maioría das relixións.  En vez de fomentar os conflitos armados e a violencia étnica, a Biblia ensina que os servos de Deus teñen que rechazar non só a guerra, senón incluso o odio que leva a esa violencia (Isaías 2:2-4; Mateo 5:43, 44; 26:52). Lonxe de alimentar o fanatismo e a credulidade, ensina que as probas son esenciais para ter unha fe auténtica e que a capacidade de razoar é imprescindible para servir a Deus (1 Tesalonicenses 5:21; Hebreos 11:1). En lugar de frear a curiosidade, anímanos a buscar as respostas a algunhas das preguntas máis importantes que nos podemos facer os seres humanos.

Por exemplo, preguntácheste algunha vez por que existe a maldade se hai un Deus? A Biblia contesta esta e outras moitas preguntas de maneira satisfactoria. b Animámoste a seguir buscando a verdade. Atoparás respostas fascinantes, lóxicas e, sobre todo, baseadas en probas convincentes. E iso non é casualidade.