1. Que conseguiron xa moitos rapaces?

 CADA ano bautízanse miles de rapaces cristiáns. E ti? Xa deches ese paso? Se é así, os teus irmáns e irmás da congregación alégranse moito por ti, e Xehová tamén (Pr. 27:11). Pensa por un momento en todo o que conseguiches ata agora. Por exemplo, quizais por moitos anos estudaches a fondo a Biblia, e isto convenceute de que é a Palabra de Deus. Tamén chegaches a coñecer e a amar o Autor deste libro sagrado. O teu amor por Xehová medrou tanto que decidiches dedicarlle a túa vida e bautizarte. Que boa decisión tomaches!

2. Que imos ver neste artigo?

 ² Seguro que antes de bautizarte pasaches por moitos problemas que puxeron a proba a túa lealdade a Xehová. Pero, a medida que te vaias facendo maior, enfrontaraste a novas dificultades. Satanás vai intentar que deixes de amar a Xehová e de servilo (Ef. 4:14). Non permitas que isto pase. Que che pode axudar a manterte leal a Xehová e a cumprir coa promesa que lle fixeches de servilo? Seguir esforzándote por progresar “cara á madurez” cristiá (Heb. 6:1, TNM). Como podes facelo?

3. Que temos que facer tódolos cristiáns despois de bautizarnos?

³ Despois do bautismo, todos temos que seguir o consello que o apóstolo Paulo lles deu ós cristiáns de Éfeso, cando os animou a alcanzar “a madurez” (Ef. 4:13). Foi  coma se lles dixese: “Seguide progresando”. Paulo comparou o crecemento espiritual co crecemento dun neno. Por que usou esta comparación? Pensa nisto. Cando uns pais teñen un bebé, quéreno moito e están orgullosos del. Pero non pode seguir sendo un bebé para sempre. Co tempo, terá que medrar e deixar de lado “as cousas de neno” (1 Cor. 13:11). Pasa o mesmo cos cristiáns: despois de bautizarnos temos que seguir progresando. Imos ver algunhas ideas que nos axudarán a facelo.

4. Que che axudará a progresar espiritualmente? Explica a túa resposta (Filipenses 1:9, TNM).

⁴ Fai crecer o teu amor por Xehová. Ti xa queres moito a Xehová, pero este amor ten que facerse máis grande. Como podes conseguilo? O apóstolo Paulo destacou unha maneira de facelo en Filipenses 1:9 (TNM) (leo). Paulo oraba para que o amor dos filipenses fose “cada vez máis abundante”. Nós tamén podemos facer crecer o noso amor por Xehová. Para conseguilo necesitamos “coñecemento exacto e pleno discernimento”. Canto máis coñecemos a Xehová, máis o amamos, e máis valoramos a súa personalidade e a súa forma de facer as cousas. Ademais, crece o noso desexo de agradarlle e de nunca decepcionalo. Esforzámonos ó máximo por entender o que espera de nós e por levalo a cabo.

5, 6. Que podemos facer para que medre o noso amor por Xehová? Explica a túa resposta.

⁵ Xesús imitou á perfección a personalidade do seu Pai. Así que canto máis o coñecemos a el, máis queremos a Xehová (Heb. 1:3). A mellor forma de facelo é estudando os relatos dos catro Evanxeos. Se aínda non tes o costume de ler a Biblia tódolos días, por que non empezas hoxe mesmo? Ó ler os relatos sobre Xesús, fíxate nas súas calidades. Por exemplo, era accesible e trataba a todos con cariño, incluso os nenos pequenos (Mc. 10:13-16). Ademais, facía que os seus discípulos se sentisen a gusto con el, e por iso non tiñan medo de contarlle como se sentían (Mt. 16:22). Xesús imitou a Xehová, o seu Pai celestial, que tamén é moi accesible. Cando lle oramos a Deus, podemos falarlle e abrirlle o noso corazón. Estamos seguros de que non nos vai xulgar polo que lle contemos ou por como nos sintamos. El quérenos moito e preocúpase por nós (1 Pe. 5:7).

⁶ Xesús sentía compaixón pola xente. O apóstolo Mateo escribiu: “Vendo a multitude, sentiu unha fonda compaixón por ela, porque estaban todos derreados e esmorecidos coma ovellas sen pastor” (Mt. 9:36). E como se sente Xehová? Xesús dixo: “A vontade do voso Pai celestial é que non se perda ningún destes pequenos” (Mt. 18:14). Moito nos animan estas palabras, verdade? Canto mellor coñezamos a Xesús, máis medrará o noso amor por Xehová.

7. Como che axudará pasar tempo con cristiáns maduros?

⁷ Pasar tempo cos irmáns maduros da túa congregación e coñecelos mellor axudarache a progresar como cristián e a querer máis a Xehová. Fíxate no felices que son. Non se arrepinten da súa decisión de servir a Deus. Dilles que che conten algunhas experiencias  que tiveron servindo a Xehová e pídelles consello cando teñas que tomar unha decisión importante. Recorda que “o progreso está nos moitos expertos” (Pr. 11:14).

8. Que podes facer se algunha vez tes dúbidas sobre o que di a Biblia?

⁸ Resolve as túas dúbidas. Como vimos no  parágrafo 2, Satanás vai intentar que deixes de progresar espiritualmente. Unha das súas tácticas é facer que teñas dúbidas sobre algunhas ensinanzas da Biblia. Por exemplo, pode que algúns intenten convencerte de que Deus non nos creou, senón que estamos aquí grazas á evolución. Ó mellor non pensabas nisto cando eras pequeno, pero agora quizais é o que che ensinan na escola. Poida que o que che digan os profesores para apoiar a teoría da evolución pareza lóxico e convincente. Non obstante, é posible que nunca se parasen a analizar as probas que hai de que existe un Creador. Recorda o principio que atopamos en Proverbios 18:17: “O primeiro en falar nun preito semella levar razón, ata que chega o outro e fai a réplica”. En vez de crer sen máis todo o que che ensinan na escola, párate a analizar as verdades que aparecen na Palabra de Deus, a Biblia. Investiga nas nosas publicacións e fala con irmáns que antes crían na evolución. Pregúntalles que os convenceu de que existe un Creador que nos quere. Este tipo de conversacións poden axudarche a examinar as probas de que existe un Creador.

9. Que che ensina o exemplo de Melissa?

⁹ A unha irmá que se chama Melissa axudoulle moito investigar sobre o tema da creación. * Ela conta: “Ó principio non quería facelo. Na escola preséntanche a evolución de tal maneira que parece lóxica, e tiña medo de descubrir que a teoría da evolución fose certa. Pero cheguei á conclusión de que Xehová non quere que o sirvamos a cegas. Así que me puxen a investigar. Lin o libro ¿Existe un Creador que se interese por nosotros?, e os folletos Como empezou  a vida? e A orixe da vida. Cinco preguntas que merecen resposta. Iso era xusto o que necesitaba. Oxalá o fixese antes”.

10, 11. Que pode axudarche a resistir a presión de cometer inmoralidade sexual? (1 Tesalonicenses 4:3, 4, TNM).

¹⁰ Rechaza a mala conduta. Cando es adolescente, os desexos sexuais poden ser máis intensos, e podes sentir a presión de cometer inmoralidade sexual. Isto é o que Satanás quere que fagas. Que che pode axudar a resistir esa tentación? (Le 1 Tesalonicenses 4:3, 4, TNM). Cando ores, cóntalle a Xehová como te sentes de verdade e pídelle que che dea forzas (Mt. 6:13). Recorda que Xehová quere axudarche, non castigarte (Sal. 103:13, 14). Ademais, a Biblia tamén che pode axudar. Melissa, da que falamos antes, tivo que loitar contra pensamentos inmorais. Ela explica: “Ler a Biblia tódolos días axudoume a loitar contra os malos desexos. Recordoume que lle pertenzo a Xehová e que quero servilo” (Sal. 119:9).

¹¹ Pero non tes que loitar ti só contra estes problemas. Cóntalles a teus pais o que che pasa. Claro, non é fácil falar de cousas tan persoais, pero é importante que o fagas. Melissa di: “Pedinlle a Xehová que me dese valor e falei co meu pai sobre o meu problema. Despois, sentinme moito mellor. Sabía que Xehová estaba moi orgulloso de min”.

12. Como podes tomar boas decisións?

¹² Déixate guiar polos principios da Biblia. Pouco a pouco, teus pais iranche dando máis liberdade para tomar as túas propias decisións. Pero aínda hai moitas cousas que non sabes. Como podes evitar cometer un erro que dane a túa amizade con Xehová? (Pr. 22:3) Unha irmá chamada Kari explica que foi o que lle axudou a tomar mellores decisións. Deuse conta de que os cristiáns maduros non necesitan unha norma para cada situación. Ela di: “Tiña que entender os principios bíblicos e non só as normas”. Cando leas a Biblia, pregúntate: “Que me ensina isto sobre a forma de pensar de Xehová? Hai algún principio que me axude a facer o que está ben? Se é así, como me beneficiará aplicalo?” (Sal. 19:8 [19:7, TNM]; Is. 48:17, 18). Ó ler a Biblia e meditar nos seus principios, serache máis fácil tomar decisións que lle agraden a Xehová. A medida que sigas progresando, daraste conta de que non necesitas unha norma para cada situación porque entenderás como ve Xehová as cousas.

13. Como che poden axudar os bos amigos? (Proverbios 13:20).

¹³ Escolle amigos que amen a Xehová. Como xa vimos, os amigos que escollas pódenche axudar a converterte nun cristián maduro (le Proverbios 13:20). Unha irmá que se chama Sara notou que xa non era tan feliz. Pero entón pasou algo que lle axudou a recuperar a alegría. Ela conta: “Atopei bos amigos xusto cando máis o necesitaba. Empecei a quedar cunha rapaza tódalas semanas para estudar A Atalaia. Outra amiga axudoume a comezar a comentar nas reunións. Grazas á súa axuda, empecei a tomarme máis en serio a oración e o meu estudo persoal. Isto axudoume a fortalecer a miña amizade con Xehová e a volver a ser feliz outra vez”.

14. Que fixo Julien para ter bos amigos?

 ¹⁴ Que podes facer para ter amigos que sexan unha boa influencia para ti? Julien, que agora é ancián de congregación, di: “Cando era novo, fixen bos amigos predicando. O seu entusiasmo axudoume a ver canto se podía desfrutar da predicación. Así que empecei a poñerme a meta de servir a tempo completo. Ademais, deime conta de que estaba perdendo a oportunidade de ter máis amigos porque tan só me centraba nos que eran da miña idade. Máis tarde, tamén fixen bos amigos en Betel. O seu exemplo axudoume a escoller mellor as miñas diversións, e isto achegoume máis a Xehová”.

15. Que advertencia lle deu Paulo a Timoteo? (2 Timoteo 2:20-22).

¹⁵ Que deberías facer se te das conta de que pasar tempo con alguén da congregación podería danar a túa amizade con Xehová? Paulo sabía que algunhas persoas da congregación do século primeiro non pensaban nin actuaban como cristiáns. Por iso lle dixo a Timoteo que se apartase delas (le 2 Timoteo 2:20-22). Esforzámonos moito por achegarnos ó noso Pai celestial, así que non deberiamos deixar que ninguén bote a perder o máis valioso que temos: a nosa amizade con Xehová (Sal. 26:4).

16. Que tipo de metas deberías poñerte?

¹⁶ Ponte metas que merezan a pena. Escolle metas que fortalezan a túa fe e che axuden a chegar a ser un cristián maduro (Ef. 3:16). Por exemplo, poderías estudar e ler a Biblia con máis frecuencia (Sal. 1:2, 3). Ó mellor podes intentar falar máis con Xehová e abrirlle o teu corazón. Ou quizais teñas que escoller mellor as túas diversións e usar mellor o teu tempo (Ef. 5:15, 16). Xehová séntese moi feliz cando ve os esforzos que fas por progresar.

17. Como te beneficiará axudar a outros?

¹⁷ Chegar a ser un cristián maduro tamén implica axudar a outros. Xesús dixo: “É máis felicidade dar que recibir”  (Feit. 20:35). Usar o teu tempo e as túas enerxías para axudar a outros cando es novo farate moi feliz. Por exemplo, podes poñerte a meta de axudar ós irmáns maiores ou enfermos da túa congregación. Igual podes facerlles algún recado ou botarlles unha man co uso dos dispositivos electrónicos. Se es un irmán, ponte a meta de chegar a ser servo ministerial para poder axudar máis ós irmáns (Flp. 2:4). Ademais, podes demostrar o teu amor polos que non forman parte da congregación predicándolles as boas noticias do Reino (Mt. 9:36, 37). E se é posible, ponte a meta de servir a Xehová a tempo completo.

18. Como pode o servizo a tempo completo axudarche a achegarte máis a Xehová?

¹⁸ O servizo a tempo completo pode darche moitas oportunidades de achegarte máis a Xehová. Ser pioneiro pode abrirche a porta para asistir ó Curso para Evanxelizadores do Reino. Tamén poderías servir en Betel ou en proxectos de construción. Kaitlyn, unha irmá de 21 anos que é pioneira, di: “Pasar tempo predicando con irmáns e irmás de experiencia axudoume moito a progresar en sentido espiritual despois de bautizarme. O seu exemplo animoume a estudar a Biblia máis a fondo e a mellorar a miña forma de ensinar”.

19. De que bendicións desfrutarás se segues progresando espiritualmente?

¹⁹ Se segues progresando espiritualmente, desfrutarás de moitas bendicións. Por exemplo, evitarás malgastar a túa xuventude indo tras metas que non valen a pena (1 Xn. 2:17). Ademais, libraraste da dor que provocan as malas decisións. En vez diso, irache ben e serás feliz (Pr. 16:3). O teu bo exemplo animará a outros, tanto novos coma maiores (1 Tim. 4:12). E o máis importante de todo é que desfrutarás da paz e da satisfacción que dá saber que lle estás agradando a Xehová e que tes unha boa amizade con el (Pr. 23:15, 16).