1, 2. a) Que pasa normalmente cando alguén se bautiza? b) Que imos analizar neste artigo?

 FIXÁCHESTE algunha vez nun grupo de candidatos ó bautismo? Seguro que sentiches o convencidos que responderon as dúas preguntas que lles fixeron antes de bautizarse. E cando saíron da auga, escoitaches un forte aplauso e viches as súas caras cheas de felicidade. Ademais, puideches ver que os seus familiares e amigos tamén estaban moi contentos. De media, cada semana dan este paso miles de persoas, e así convértense en testemuñas de Xehová dedicadas e bautizadas.

² E ti? Gustaríache bautizarte? Se estás pensando en dar este paso, significa que estás “buscando a Xehová”, e iso quere dicir que non es coma as demais persoas deste mundo malvado (Sal. 14:1, 2, TNM). Sen importar os anos que teñas, este artigo é para ti. E se xa estamos bautizados, tamén queremos estar cada vez máis decididos a seguir servindo a Xehová para sempre. Que razóns temos para facelo? Vexamos tres delas.

3. Por que aman a verdade e a xustiza os servos de Xehová? (Salmo 119:128, 163).

³ Xehová mandoulle ó seu pobo: “Amade a verdade” (Zac. 8:19, TNM). E Xesús animou os seus seguidores a buscar a xustiza (Mt. 5:6). Isto quere dicir que necesitamos ter un forte desexo de facer o que é bo, xusto e limpo ós ollos de Deus. Dirías que amas a verdade e a xustiza? Por suposto que si! Odias as mentiras e todo o que Xehová di que é malo (le Salmo 119:128, 163). Cando alguén mente está imitando a Satanás, o gobernante  deste mundo (Xn. 8:44; 12:31). Un dos obxectivos do Demo é manchar o santo nome de Xehová. De feito, leva espallando mentiras sobre Deus dende a rebelión que houbo no xardín de Edén. Quere que as persoas vexan a Xehová como un gobernante egoísta e mentireiro que non lles dá cousas boas ós humanos (Xén. 3:1, 4, 5). As mentiras de Satanás contaminan a mente e o corazón das persoas. Cando alguén decide non amar a verdade, o Demo inflúe nel para que faga todo tipo de cousas inxustas e malvadas (Rm. 1:25-31).

4. Como demostra Xehová que é o “Deus da verdade”? (Ver tamén a imaxe).

⁴ Xehová é o “Deus da verdade” e ensínallela xenerosamente a tódolos que o aman (Sal. 31:5, TNM). Desa forma, libera as persoas das mentiras de Satanás. Xehová tamén lles ensina ós seus servos a ser honestos e xustos. Iso fai que teñan máis autoestima e paz interior (Pr. 13:5, 6). Pasouche isto a ti? Notaches como che axudaba Xehová cando estudabas a Biblia? Seguro que aprendiches que todo o que el di sempre é o mellor para ti e para o resto das persoas (Sal. 77:14 [77:13, TNM]). Así que seguro que queres facer o que Xehová di que é xusto, defender a verdade e desmentir tódalas mentiras que se dixeron sobre o noso Deus (Mt. 6:33). Como podes conseguilo?

5. Como podes defender a verdade e a xustiza?

⁵ Pola túa maneira de vivir podes demostrar que rechazas as mentiras de Satanás e que defendes a verdade. É coma se dixeses: “Quero que Xehová sexa o meu gobernante, quero facer o que el di que está ben”. Como podes facelo? Primeiro, faille unha oración a Xehová na que te dediques a el. Despois, bautízate para demostrar publicamente que te dedicaches. Amar a verdade e a xustiza é unha moi boa razón para decidir bautizarte.

6. Que razóns se mencionan en Salmo 45:4 (TNM) para amar a Xesús?

⁶ Por que amas a Xesús? Atopamos algunhas boas razóns en Salmo 45:4 (TNM) (leo). Xesucristo ama a verdade, a humildade e a xustiza. Se ti  tamén amas a verdade e a xustiza, é normal que o queiras a el. Pensa en como defendeu con valor a verdade e a xustiza (Xn. 18:37). Pero, como promove a humildade?

7. Que é o que máis che gusta da humildade de Xesús?

⁷ Xesús promove a humildade co seu exemplo. Sempre lle dá toda a gloria ó seu Pai, nunca a si mesmo (Mc. 10:17, 18; Xn. 5:19). Como te sentes cando ves o humilde que é? Verdade que te motiva a amalo e a ser o seu discípulo? Seguro que si. Por que é humilde Xesús? Porque imita e quere moito a seu Pai, que tamén é humilde (Sal. 18:36 [18:35, TNM]; Heb. 1:3). Ver como imita Xesús á perfección as calidades de Xehová fai que te queiras acercar máis a el.

8. Por que nos fai felices que Xesús sexa o noso Rei?

⁸ Xesús é o mellor gobernante que podemos ter. Por iso nos fai moi felices que sexa o noso Rei. O propio Xehová capacitouno e escolleuno para gobernar (Is. 50:4, 5). Ademais, pensa no amor que demostrou Xesús ó sacrificarse por nós (Xn. 13:1). Como é o teu Rei, merece o teu cariño. Para que nos vexa como os seus amigos, temos que querelo de verdade e demostrarlle ese amor facendo o que nos manda (Xn. 14:15; 15:14, 15). Que honor poder ser amigos do Fillo de Xehová!

9. En que se parece o bautismo dos cristiáns ó de Xesús?

⁹ Unha das cousas que Xesús lles mandou facer ós seus seguidores é bautizarse (Mt. 28:19, 20). El mesmo puxo o exemplo. Nalgúns aspectos, o seu bautismo foi diferente ó dos seus discípulos. (Mira o recadro “ En que se diferencia o bautismo de Xesús do dos seus seguidores?”). Pero noutros aspectos si que se parece. Cando se bautizou, comprometeuse a facer a vontade do seu Pai (Heb. 10:7). De maneira parecida, o bautismo dos seus seguidores tamén é unha demostración pública de que se dedicaron a Xehová e de que agora a súa vida se centra en facer a vontade de Deus, non a súa propia. Desta maneira, seguen o exemplo do seu Mestre, Xesús.

10. Por que queres a Xesús, e a que te debería motivar ese amor?

¹⁰ Para ti, Xesús é o Fillo unixénito de Xehová e o Rei que el escolleu para gobernarnos. Sabes que é humilde e que imita á perfección o seu Pai. Aprendiches que alimentou os que tiñan fame, consolou os desanimados e ata curou os enfermos (Mt. 14:14-21). Tamén viches como dirixe hoxe en día a congregación (Mt. 23:10). Ademais, sabes que fará aínda máis cousas no futuro como Rei do Reino de Deus. Como podes demostrar que o queres moito? Imitando o seu exemplo (Xn. 14:21). Podes facelo se te dedicas a Xehová e se te bautizas.

11. Cal dirías que é a razón máis importante pola que se bautiza unha persoa?

¹¹ Cal é a razón máis importante pola que se bautiza unha persoa? Xesús explicou cal é o maior mandamento de Deus, cando dixo: “Amara-lo Señor, o teu Deus, con todo o teu corazón, con toda a túa alma, con todo o teu entendemento e con tódalas túas forzas” (Mc. 12:30).  Cres que estas palabras describen ben canto queres a Deus?

12. Por que amas a Xehová? (Ver tamén a imaxe).

¹² Existen moitas razóns para amar a Xehová. Por exemplo, chegaches a comprender que el é a “fonte da vida” e que “todo bo regalo e toda dádiva perfecta” veñen del (Sal. 36:10 [36:9, TNM]; Sant. 1:17). Tódalas cousas boas das que desfrutas veñen de Xehová, o noso cariñoso e xeneroso Deus.

13. Por que o rescate é un regalo tan marabilloso?

¹³ O rescate é un regalo marabilloso que nos deu Xehová. Por que podemos dicir isto? Pensa na relación tan estreita que hai entre Xehová e o seu Fillo. Xesús dixo “ámame o Pai” e “eu amo ó Pai” (Xn. 10:17; 14:31). Esta relación fíxose máis forte co paso de miles de millóns de anos (Pr. 8:22, 23, 30). Agora pensa en canto lle debeu doer a Deus permitir que o seu Fillo sufrise e morrese. Xehová quérenos moito ós humanos, incluído a ti. De feito, quérenos tanto que estivo disposto a dar o seu querido Fillo como sacrificio para que ti e o resto de persoas tivésemos a oportunidade de vivir para sempre (Xn. 3:16; Gál. 2:20). Non existe razón máis importante para amar a Deus.

14. Cal é o mellor obxectivo que te podes poñer na vida?

 ¹⁴ Canto máis aprendías sobre Xehová, máis crecía o teu amor por el. Seguro que queres seguir acercándote a el por toda a eternidade. E podes conseguilo! El anímate con cariño a alegrar o seu corazón (Pr. 23:15, 16). Podes facelo non só coas túas palabras, senón tamén coas túas accións. Se decides vivir da maneira que lle agrada a Xehová, demostrarás que de verdade o amas (1 Xn. 5:3). Este é o mellor obxectivo que te podes poñer na vida.

15. Como podes demostrar que amas a Xehová?

¹⁵ Como podes demostrar que amas a Xehová? Primeiro, fai unha oración especial na que te dediques ó único Deus verdadeiro (Sal. 40:9 [40:8, TNM]). Despois, fai pública a túa dedicación bautizándote. Como vimos antes, este é un momento moi feliz e moi importante na túa vida. Ese día empezas unha nova vida na que xa non vivirás para ti, senón para Xehová (Rm. 14:8; 1 Pe. 4:1, 2). É certo que dar este paso é unha decisión moi importante, pero permitirache desfrutar da mellor vida posible. Como?

16. Segundo Salmo 41:12 (TNM), como recompensará Xehová os que dedican a súa vida a servilo?

¹⁶ Non hai ninguén máis xeneroso ca Xehová. Sen importar o que lle deas, el sempre che dará moito máis (Mc. 10:29, 30). De feito, se dedicas a túa vida a servilo, darache a vida máis interesante e satisfactoria posible, incluso xa agora neste malvado mundo. E isto é só o principio. A viaxe que empezas co teu bautismo non ten final, senón que poderás servir o teu querido Pai para sempre. O amor que hai entre ti e el seguirá medrando e, coma el, poderás vivir por toda a eternidade (le Salmo 41:12, TNM).

17. Que podes darlle a Xehová que aínda non ten?

 ¹⁷ Cando te dedicas e te bautizas, tes o privilexio de darlle algo moi valioso ó teu Pai. El deuche tódalas cousas boas e tódolos momentos felices dos que desfrutaches. A cambio, podes darlle ó Dono do ceo e da terra algo que non ten: a túa lealdade de corazón (Xob 1:8; 41:11, TNM; Pr. 27:11). Non existe forma mellor de usar a túa vida! Sen dúbida, amar a Xehová é a razón máis importante para bautizarse.

18. Que preguntas te podes facer?

¹⁸ Entón, que farás? Vaste bautizar? Isto é algo que só ti podes responder. Quizais poida axudarche saber a resposta a esta outra pregunta: “Por que aínda non me bauticei?” (Feit. 8:36). Recorda as tres cousas das que falamos neste artigo e que te motivarán a bautizarte. Primeiro, amar a verdade e a xustiza. Pregúntate: “Quero ver o día no que todos digan a verdade e fagan o que está ben?”. Segundo, amar a Xesús. Pregúntate: “Quero que o Fillo de Deus sexa o meu Rei e quero imitar o seu exemplo?”. E terceiro e máis importante, amar a Xehová. Pregúntate: “Quero alegrar o corazón de Xehová servíndoo?”. Se respondiches estas preguntas cun si, por que non te bautizas? Por que esperar? (Feit. 16:33).

19. Por que non deberías dubidar se bautizarte ou non? Pon un exemplo (Xoán 4:34).

¹⁹ Se dubidas se bautizarte ou non, fíxate no exemplo que usou Xesús (le Xoán 4:34). Xesús comparou facer a vontade do seu Pai coa comida. Por que? Porque a comida é algo bo para nós. Xesús sabía que todo o que Deus nos pide é bo para nós. Xehová non quere que fagamos nada que nos faga dano. Pensas que el quere que te bautices? Si (Feit. 2:38). Así que podes estar convencido de que obedecer o mandato de bautizarte será bo para ti. Seguro que se che ofrecesen a mellor comida do mundo non dubidarías en probala. Entón, por que dubidar se bautizarte ou non?

20. Que imos analizar no seguinte artigo?

²⁰ Por que aínda non te bautizaches? Algúns poderían dicir que aínda non están preparados. O certo é que dedicarte a Xehová e bautizarte é a decisión máis importante que vas tomar na túa vida. Así que tes que pensalo ben, dedicarlle tempo e esforzarte por estar preparado. Se de verdade queres dar este paso, que podes facer agora para estar preparado? Contestaremos esta pregunta no seguinte artigo.