1, 2. Por que asistimos tódolos anos á Conmemoración?

 HAI case 2000 anos, Xesús sacrificou a súa vida por nós e fixo posible que tivésemos a oportunidade de ter vida eterna. A noite antes de morrer, mandoulles ós seus seguidores que recordasen este acto de amor cunha cerimonia moi sinxela na que habería pan e viño (1 Cor. 11:23-26).

² Por que obedecemos este mandato que nos deu Xesús? Porque o queremos moito (Xn. 14:15). Cada ano, na época da Conmemoración, dedicamos tempo a orar e a meditar no que significa a súa morte para a humanidade. Así demostramos que agradecemos moito o que fixo por nós. Ademais, fainos moi felices poder predicar máis e animar o maior número de persoas posible a que nos acompañe nesta ocasión tan especial. Por suposto, estamos decididos a non permitir que nada nos impida asistir.

3. Que imos analizar neste artigo?

³ Neste artigo analizaremos os esforzos tan grandes que fixeron algúns servos de Xehová para recordar a morte de Xesús. Veremos que 1) celebraron a Conmemoración como Xesús ensinou, 2) invitaron a outros a asistir e 3) celebrárona a pesar das dificultades.

4. a) Que verdades se destacan cada ano na Conmemoración? b) Por que non deberiamos dar por sentado estas verdades? (Lucas 22:19, 20).

⁴ Tódolos anos, escoitamos un discurso na Conmemoración baseado na Biblia que responde claramente varias  preguntas. Por exemplo, explícase por que a humanidade necesita un rescate, e como a morte dun só home pode pagar os pecados de moitos. Ademais, recórdasenos o que representan o pan e o viño, e quen debe comer e beber deles (le Lucas 22:19, 20). Tamén meditamos nas bendicións que terán os que esperan vivir para sempre na Terra (Is. 35:5, 6; 65:17, 21-23). Non debemos dar por sentado estas verdades. Miles de millóns de persoas non as coñecen, e non saben o valioso que é o sacrificio de Xesús. Tampouco celebran a Conmemoración da súa morte do xeito que el lles ensinou ós seus seguidores. A que se debe isto?

5. Despois de que morrese a maioría dos apóstolos, que pasou coa maneira de conmemorar a morte de Xesús?

⁵ Pouco despois de que morrese a maioría dos apóstolos de Xesús, houbo falsos cristiáns que chegaron a formar parte da congregación (Mt. 13:24-27, 37-39). Falaban “cousas perversas, para arrastraren os discípulos tras eles” (Feit. 20:29, 30). Unha desas “cousas perversas” que empezaron a ensinar foi que Xesús non morreu “unha vez [...] para quita-los pecados”, como di a Biblia. En vez diso, dicían que o seu sacrificio debía repetirse unha e outra vez (Heb. 9:27, 28). Hoxe en día, moitas persoas cren nesta ensinanza falsa. Van ás igrexas tódalas semanas, ou incluso tódolos días, para celebrar o sacrificio de Xesús, o que na relixión católica se coñece como o “sacrificio da misa” ou “eucaristía”. b Outras relixións que din ser cristiás celebran a morte de Xesús con menos frecuencia, pero a maioría dos seus membros non entende ben o que implica o seu sacrificio. Pode que algúns se pregunten: “Será certo que grazas á morte de Xesús poden perdoarse os meus pecados?”. Por que se fan esta pregunta? Nalgúns casos, debido á influencia doutras persoas que dubidan de que grazas ó sacrificio de Xesús poidan perdoarse os pecados. Os verdadeiros seguidores de Xesús axudáronlles a outros a entender ben o que significa realmente o sacrificio de Xesús e cal é a maneira correcta de conmemorar a súa morte. Como o fixeron?

6. A que conclusión chegou un grupo de estudantes da Biblia en 1872?

⁶ A finais do século dezanove, un grupo de estudantes da Biblia dirixidos por Charles Taze Russell empezou a estudar a fondo as Escrituras. Querían saber que implicaba de verdade o sacrificio de Xesús e como se debía conmemorar a súa morte. En 1872, comprenderon que a Biblia di que Xesús morreu para rescatar a toda a humanidade. Que fixeron co que descubriron? En vez de escondelo, empezaron a ensinárllelo a outros a través de libros, periódicos e revistas. Pouco despois, imitando os cristiáns do primeiro século, empezaron a reunirse para celebrar a Conmemoración tan só unha vez ó ano.

7. Como nos beneficiamos do que investigaron os primeiros estudantes da Biblia?

⁷ Na actualidade, beneficiámonos da investigación que fixeron estes cristiáns hai moitos anos. Por que dicimos isto? Porque, coa bendición de Xehová, puidemos entender o que significa  o sacrificio de Xesús e como beneficiará a toda a humanidade (1 Xn. 2:1, 2). Tamén comprendemos que a Biblia di que os humanos que lle agradan a Deus teñen dous tipos de esperanza: algúns esperan ter vida inmortal no ceo e millóns de persoas esperan vivir para sempre na Terra. Cando pensamos en canto nos quere Deus e en como nos beneficia persoalmente o sacrificio de Xesús, achegámonos máis a Xehová (1 Pe. 3:18; 1 Xn. 4:9). Así que, igual que os nosos fieis irmáns do pasado, nós tamén invitamos a outros a celebrar con nós a Conmemoración, e a facelo como Xesús dixo.

8. Que fixo o pobo de Xehová para invitar a outros á Conmemoración? (Ver a imaxe).

⁸ O pobo de Xehová leva moitos anos invitando a outras persoas á Conmemoración. A principios de 1881, algúns irmáns e irmás dos Estados Unidos celebraron xuntos a Conmemoración na casa dun irmán en Allegheny (Pensilvania). Máis tarde, cada congregación empezou a celebrar a súa propia. En marzo de 1940, díxoselles ós publicadores que invitasen a calquera persoa do territorio que mostrase interese. E en 1960, Betel envioulles por primeira vez ás congregacións invitacións impresas para a Conmemoración. Dende aquela, distribuíronse miles de millóns destas invitacións. Por que dedicamos tanto tempo e esforzo a invitar a outros?

9, 10. Quen se beneficia dos esforzos que facemos por invitar a outros á Conmemoración? (Xoán 3:16).

⁹ Unha das razóns polas que invitamos  a outros a asistir á Conmemoración é porque queremos que descubran a verdade sobre o que fixeron Xehová e Xesús por todos nós (le Xoán 3:16). Gustaríanos que o que vexan e escoiten alí os anime a querer aprender máis e a chegar a ser servos de Xehová. Pero tamén hai outras persoas que se benefician disto.

¹⁰ Tamén invitamos as testemuñas de Xehová que se volveron inactivas. Queremos recordarlles que Xehová aínda os quere. Moitos aceptan asistir, e alégranos moitísimo volver a velos. Ir á Conmemoración failles recordar canto desfrutaban servindo a Xehová no pasado. Vexamos o exemplo de Mónica, c que levaba moitos anos sendo inactiva. Durante a pandemia da COVID-19, volveu a predicar de novo. Despois de asistir á Conmemoración do 2021, dixo: “Esta Conmemoración foi moi especial para min. Por primeira vez en 20 anos, fun capaz de predicarlles a outros e de invitalos a asistir. Fixen todo o posible por invitalos porque agradezo moito o que Xehová e Xesús fixeron por min” (Sal. 103:1-4). Tanto se as persoas responden ben á nosa invitación coma se non, nós esforzámonos ó máximo por invitalas, sabendo que Xehová valora moito os nosos esforzos.

11. Como bendice Xehová os esforzos que facemos por invitar as persoas á Conmemoración? (Axeo 2:7, TNM).

¹¹ Xehová bendice moito os nosos esforzos por invitar a outros á Conmemoración. En 2021, a pesar das restricións que tivemos pola pandemia da COVID-19, houbo un récord de asistencia á Conmemoración: asistiron 21.367.603 persoas. Isto é case dúas veces e media máis que a cantidade de testemuñas de Xehová que hai en todo o mundo! Pero Xehová non se fixa só na cantidade de asistentes. El interésase por cada persoa individualmente (Lc. 15:7; 1 Tim. 2:3, 4). Estamos convencidos de que Deus aproveita o noso labor de invitar as persoas para axudarnos a atopar as que teñen bo corazón (le Axeo 2:7, TNM).

12. Que cousas poden facer que nos sexa difícil celebrar a Conmemoración? (Ver a imaxe).

¹² Xesús predixo que durante os últimos días pasariamos por moitas circunstancias difíciles, como a oposición da familia, a persecución, as guerras, as enfermidades e moitas outras (Mt. 10:36; Mc. 13:9; Lc. 21:10, 11). Ás veces, estas cousas fannos difícil celebrar a Conmemoración da morte de Xesús. Que fixeron os nosos irmáns e irmás para superar estas dificultades, e como lles axudou Xehová?

13. Como bendiciu Xehová o valor e a determinación que demostrou Artem ó celebrar a Conmemoración cando estaba no cárcere?

¹³ O cárcere. Os nosos irmáns que están presos pola súa fe fan todo o posible por celebrar a Conmemoración. Vexamos o exemplo de Artem. Durante a época da Conmemoración do 2020, estaba encerrado nunha cela de 17 metros cadrados xunto con outros cinco prisioneiros. A pesar de que estaba no cárcere, puido conseguir algunhas cousas para usalas como símbolos do corpo  e do sangue de Xesús durante a Conmemoración. Ademais, decidiu que ía dar o discurso para si mesmo. Pero os outros presos cos que estaba fumaban e eran moi mal falados. Que fixo Artem? Pediulles que deixasen de fumar e de falar así durante unha hora e, para a súa sorpresa, fixéronlle caso. El di: “Ofrecinme a falarlles da Conmemoración”. Aínda que ó principio dixeron que non querían oír falar do tema, despois de velo e escoitalo celebrar a Conmemoración, fixéronlle moitas preguntas.

14. Que esforzos se fixeron para celebrar a Conmemoración a pesar da pandemia da COVID-19?

¹⁴ A pandemia da COVID-19. Durante a pandemia, os servos de Xehová non puideron asistir en persoa á Conmemoración. Pero isto non impediu que a celebrasen. d As congregacións con conexión a Internet celebrárona por videoconferencia. Pero, que pasou cos millóns de persoas que non tiñan Internet? Nalgúns países, fíxose o necesario para  retransmitila por televisión ou radio. Ademais, as sucursais gravaron o discurso en máis de 500 idiomas para que tamén puidesen velo os que vivían en zonas remotas, e algúns irmáns encargáronse de entregar estas gravacións ós que vivían nesas zonas.

15. Que aprendemos do exemplo dunha estudante da Biblia chamada Sue?

¹⁵ A oposición da familia. Para algúns, o maior reto ó que se enfrontan para celebrar a Conmemoración é a oposición da familia. Vexamos o exemplo de Sue, unha muller que estaba estudando a Biblia. En 2021, o día antes da Conmemoración, díxolle á irmá que lle daba o curso da Biblia que non a podería celebrar por culpa da oposición dalgúns familiares cos que vivía. A irmá leu Lucas 22:44. Entón explicoulle que, cando pasamos por dificultades, debemos seguir o exemplo de Xesús orándolle a Xehová e confiando completamente nel. Ó día seguinte, Sue preparou o pan e o viño, e viu a adoración matinal do día da Conmemoración en jw.org. Esa tarde, mentres estaba soa na súa habitación conectouse por teléfono á Conmemoración. Despois escribiulle á irmá: “Onte animáchesme moito. Fixen todo o posible por celebrar a Conmemoración e Xehová axudoume de verdade. Non podo expresar con palabras o feliz e o agradecida que me sinto!”. Pensas que Xehová pode axudarche se pasas por unha situación parecida?

16. Por que estamos convencidos de que Xehová bendicirá os esforzos que fagamos por asistir á Conmemoración? (Romanos 8:31, 32).

¹⁶ Xehová valora moito os esforzos que facemos por celebrar a Conmemoración da morte de Xesús. Podemos estar seguros de que nos bendicirá se demostramos que estamos agradecidos polo que fixo por nós (le Romanos 8:31, 32). Polo tanto, decidámonos a asistir á Conmemoración deste ano, e aproveitemos esa época para facer máis por Xehová.