1. Que che vén á mente cando pensas en Xehová?

 PENSACHES algunha vez en como é Xehová? Cando lle oras, como o imaxinas? Aínda que non o podemos ver, a Biblia descríbeo de diferentes formas. Por exemplo, chámaselle “sol e escudo” e tamén “lume devorador” (Sal. 84:11, TNM; Heb. 12:29). Ezequiel tivo unha visión da presenza de Xehová e describiuna como unha pedra de zafiro, un metal brillante e un arco iris (Ezeq. 1:26-28). Quizais algunhas destas descricións nos impresionen moito ou incluso nos intimiden.

 2. Que pode facer que a algúns lles resulte difícil acercarse a Xehová?

² Como non podemos ver a Xehová quizais nos resulte difícil crer que nos quere. Ademais, as cousas que algúns viviron no pasado fanlles pensar que Deus nunca se fixaría neles e os querería. Pode ser que non tivesen un pai que lles dese cariño. Xehová entende como nos sentimos e como isto nos afecta. Para axudarnos, móstranos na Biblia a súa fermosa personalidade.

 3. Por que deberiamos analizar máis de cerca o amor de Xehová?

³ A palabra que mellor describe a Xehová é amor (1 Xoán 4:8). Esta cualidade defíneo e inflúe en todo o que fai. O amor de Deus é tan grande e forte que incluso llo demostra ós que non o aman (Mat. 5:44, 45). Neste artigo imos afondar en como é o amor de Xehová. Canto máis aprendamos sobre o noso Deus, máis o quereremos.

 XEHOVÁ QUÉRENOS MOITO

 4. Como te fai sentir o amor de Xehová? (Ver tamén a imaxe).

⁴ Xehová quérenos moito (Xoán 16:27). Na Biblia compárase a si mesmo cunha nai cariñosa (Is. 66:12, 13). Imaxina como unha nai coida con amor do seu neniño pequeno. Cólleo no colo e fálalle de maneira cariñosa. Cando chora ou ten dor, asegúrase de darlle todo o que necesita. Da mesma forma, cando nós sufrimos tamén podemos contar co amor de Xehová. O salmista escribiu: “Cando medran as coitas no meu peito, o teu consolo alégrame o espírito” (Sal. 94:19).

 5. Que significa para ti o amor leal de Xehová?

⁵ Xehová é leal (Sal. 103:8, TNM). El non deixa de querernos cando cometemos algún erro. Os israelitas decepcionárono unha e outra vez pero, cando se arrepentiron, el expresoulles o enorme amor que lles tiña coas seguintes palabras: “Fuches ben querido ós meus ollos; fuches glorificado, o meu predilecto” (Is. 43:4, 5). O amor de Deus non cambiou. Sempre podemos contar con el. Incluso se cometemos erros graves Xehová non nos abandona. Se nos arrepentimos e nos volvemos acercar a el, veremos que nos segue querendo. De feito, prométenos que nos perdoará con xenerosidade (Is. 55:7). E a Biblia di que cando Deus nos perdoa fai “vir tempos para recuperar as forzas e o ánimo” (Feit. 3:19).

 6. Que nos ensina Zacarías 2:12 (2:8, TNM) sobre Xehová?

⁶ Le Zacarías 2:12 (2:8, TNM). O ollo é unha parte moi sensible e importante do noso corpo. Así que cando Xehová nos compara coa meniña, ou pupila, do seu ollo é coma se dixese: “Quen lle fai dano ó meu pobo, faille dano a algo moi valioso para min”. Como nos ama, está atento ó que nos pasa e está desexando protexernos. El sente a nosa dor cando sufrimos. Por iso, podemos estar seguros de que nos contestará cando lle pidamos: “Gárdame coma á meniña dos teus ollos” (Sal. 17:8).

 7. Por que necesitamos fortalecer a nosa confianza en que Xehová nos quere?

 ⁷ Xehová quere que esteamos convencidos de que nos ama a cada un de nós. Pero el sabe que, debido ás experiencias que vivimos no pasado, quizais nos custe aceptalo. Ou é posible que esteamos pasando agora mesmo por problemas que poñan a proba a nosa confianza en que el nos quere. Que pode axudarnos? Analizar como demostra Xehová o seu amor por Xesús, polos unxidos e por todos nós.

COMO EXPRESA XEHOVÁ O SEU AMOR

 8. Por que estaba Xesús convencido de que seu Pai o amaba?

⁸ A relación que teñen Xehová e Xesús é a máis antiga que existe no Universo. Levan miles de millóns de anos xuntos no ceo e chegaron a sentir un amor inmenso un polo outro. Como lemos en Mateo 17:5, Xehová díxolle claramente a Xesús que o amaba. Podería ter dito simplemente: “El ten a miña aprobación”. Pero, quixo que soubésemos o moito que o quere e por iso o chamou “meu querido Fillo”. El estaba orgulloso do seu Fillo e do que este ía facer (Ef. 1:7). E Xesús non tiña dúbidas do que seu Pai sentía por el. Estaba totalmente convencido de que o amaba. De feito, asegurou en varias ocasións que seu Pai o quería (Xoán 3:35; 10:17; 17:24).

 9. Que expresión describe o amor que Xehová sente polos unxidos? Explica a túa resposta (Romanos 5:5).

⁹ Xehová tamén di canto lles quere ós unxidos (le Romanos 5:5). Fíxate na expresión “vértese”. Unha obra de consulta explica que neste contexto se refire a algo que “vén sobre nós coma un río”. Que imaxe máis impresionante para mostrar canto ama Xehová os unxidos! Eles saben que Xehová os quere moito (Xud. 1). O apóstolo Xoán expresou o que eles senten cando escribiu: “Vede o moito que nos quixo o Pai, para nos chamarmos fillos de Deus” (1 Xoán 3:1). Pero, ama Xehová só os unxidos? Non, demostrou que nos quere a todos nós.

10. Cal é a maior demostración de amor que Xehová fixo por ti?

¹⁰ Cal é a maior confirmación do amor que Xehová sente por nós? O rescate. De feito, é a mostra de amor máis grande do Universo! (Xoán 3:16; Rom. 5:8) Xehová entregou o seu querido Fillo e permitiu que morrese para que tódolos humanos poidamos recibir o perdón dos nosos pecados e chegar a ser amigos seus (1 Xoán 4:10). Canto máis meditemos no prezo que estiveron dispostos a pagar Xehová e Xesús, máis entenderemos o moito que nos queren a cada un de nós (Gál. 2:20). O rescate non se pagou simplemente para cumprir cun contrato legal. É un regalo feito por amor. Xehová demostrou canto nos quere sacrificando o máis valioso para el, a Xesús. Permitiu que o seu Fillo sufrise e morrese por nós.

11. Que aprendemos de Xeremías 31:3?

¹¹ Como vimos, Xehová non oculta os seus sentimentos, senón que os expresa con cariño (le Xeremías 31:3). Como nos quere moito, acercounos a el (compara con Deuteronomio 7:7, 8). Nada nin ninguén pode separarnos do amor de Xehová (Rom. 8:38, 39). Como te fai sentir isto a ti? Ó ler o Salmo 23 fíxate no efecto que tivo en David sentir este amor e no que pode ter en todos nós.

 COMO TE FAI SENTIR O AMOR DE XEHOVÁ?

12. Como resumirías o Salmo 23?

¹² Le Salmo 23:1-6. No Salmo 23 David expresou a súa confianza en que Xehová o quería e o coidaba. Describiu a estreita amizade que tiña con Deus, a quen lle chamou o seu pastor. David sentíase seguro baixo a súa guía e confiaba totalmente nel. Sabía que Xehová lle seguiría demostrando o seu amor tódolos días da súa vida. Por que podía ter esta seguridade?

13. Por que estaba seguro David de que Xehová coidaría del?

¹³ “Nada me falta”. David sentía que Xehová coidaba ben del porque sempre lle dera todo o que necesitaba. Tamén sabía que Deus era o seu amigo e que tiña a súa aprobación. Por iso estaba seguro de que, sen importar o que lle pasase no futuro, sempre coidaría del. Confiaba en que o amor de Xehová era máis poderoso que calquera dos seus temores. Isto axudoulle a non preocuparse e a estar alegre e satisfeito (Sal. 16:11).

14. Como pode coidarnos Xehová?

¹⁴ Xehová cóidanos con cariño, especialmente cando nos pasan cousas malas. Claire, quen serviu en Betel durante máis de 20 anos, sentiuse indefensa cando a súa familia sufriu un golpe tras outro. a A seu pai deulle un ictus, unha das súas irmás foi expulsada e a súa familia perdeu a casa e o pequeno negocio que tiñan. Como lles demostrou Xehová o seu amor? Claire conta: “El encargouse de que a miña familia sempre  tivese o necesario para cada día. Moitas veces deunos incluso máis do que necesitabamos. Penso con frecuencia nos momentos nos que Xehová coidou da miña familia con cariño, e nunca os esquecerei. Estes recordos axudáronme a seguir servíndoo a pesar dos problemas”.

15. Por que se sentía David reconfortado? (Ver tamén a imaxe).

¹⁵ “El repón as miñas forzas”. Ás veces, David sentíase angustiado por tódolos problemas e probas que estaba pasando (Sal. 18:5-7 [18:4-6, TNM]). Pero, o amor de Xehová reconfortábao. Deus levou o seu cansado amigo a “pastos verdecentes” e a “augas tranquilas”. Como resultado, David recuperou as forzas e puido seguir servindo a Xehová con alegría (Sal. 18:29-33 [18:28-32, TNM]).

16. Como te reconfortou sentir o amor de Xehová?

¹⁶ Hoxe en día, Xehová tamén nos coida cando pasamos por probas ou dificultades (Lam. 3:22; Col. 1:11). Fíxate no exemplo de Rachel. Ela quedou devastada cando o seu home a deixou a ela e tamén a Xehová durante a pandemia da COVID-19. Como a coidou Xehová? Ela conta: “Asegurouse de que me sentise querida. Deume amigos que pasaban tempo comigo, me traían comida, me mandaban mensaxes bonitas e textos bíblicos, me sorrían e me recordaban día tras día que Xehová coidaba de min. Doulle sempre as grazas por permitirme formar parte dunha familia tan bonita e grande”.

17. Por que non temía David ningún mal?

¹⁷ “Ningún mal temería, pois ti vas comigo”. A miúdo, a vida de David corría perigo e tiña que enfrontarse a moitos inimigos poderosos. Pero, o amor de Xehová facíao sentir seguro e protexido. David sentía que Deus estaba con el en tódalas situacións, e isto animábao. Por iso cantou: “[Xehová] líbrame de tódolos temores” (Sal. 34:5 [34:4, TNM]). Os medos de David eran reais, pero o amor de Xehová era máis forte cós seus temores.

18. Cando tes medo, como pode darche forzas estar convencido de que Xehová te quere?

¹⁸ Cando pasamos por situacións difíciles, como nos fortalece saber que Xehová nos quere? Unha pioneira que se  chama Susi describe como se sentiron ela e o seu marido cando o seu fillo se suicidou: “Unha traxedia inesperada pode traumatizarnos e facernos sentir vulnerables e indefensos. Pero o amor de Xehová deunos seguridade e protección”. Rachel, da que xa falamos antes, recorda: “Unha noite na que estaba extremadamente triste, preocupada e asustada, oreille chorando a Xehová en voz alta. Nese mesmo momento sentín que el calmaba o meu corazón e que me tranquilizaba, igual que o fai unha nai co seu bebé. Finalmente, puiden durmir. Nunca esquecerei ese momento”. Un ancián que se chama Tasos pasou catro anos en prisión por negarse a ir ó exército. Como sentiu este irmán que Xehová o coidaba? El conta: “Xehová deume máis do que necesitaba. Isto fíxome estar máis seguro de que podo confiar completamente nel. Grazas ó seu espírito, tamén me sentía feliz a pesar de estar nun ambiente moi deprimente. Isto deume a garantía de que, canto máis cerca estea de Xehová, máis percibirei o seu amor. Así que, fíxenme pioneiro regular mentres estaba no cárcere”.

ACÉRCATE Ó TEU CARIÑOSO DEUS

19. a) Que efecto terá nas nosas oracións saber que Xehová nos ama? b) Que descrición do amor de Xehová che chegou máis ó corazón? (Ver o recadro “ Palabras que nos axudan a sentir o cariño e o amor de Xehová”).

¹⁹ As experiencias que mencionamos son proba de que Xehová, “o Deus do amor”, está ó noso lado (2 Cor. 13:11). El interésase persoalmente por cada un de nós. Por iso estamos convencidos de que ó seu pobo “rodéao o seu amor leal” (Sal. 32:10, TNM). Canto máis meditemos en como nos demostrou Xehová o seu amor, máis real se fará para nós e máis cerca estaremos del. Podemos achegarnos a Deus con liberdade e contarlle canto necesitamos o seu amor. Digámoslle todo o que nos preocupa coa seguridade de que nos entende e de que está desexando axudarnos (Sal. 145:18, 19).

20. Como nos acerca a Xehová o seu amor?

²⁰ Igual que nos gusta estar cerca do lume cando temos frío, tamén nos gusta sentir o amor de Xehová. Aínda que o seu amor é poderoso, tamén é compasivo. Así que, esteamos felices porque Xehová nos quere e digámoslle tamén canto o amamos nós a el (Sal. 116:1).