1. Cal é unha razón pola que Xehová creou o regalo do matrimonio?

 XEHOVÁ é o “Deus feliz” e quere que nós tamén sexamos felices (1 Tim. 1:11, TNM). Por iso nos deu moitos regalos que nos permiten desfrutar da vida (Sant. 1:17). Un deles é o matrimonio. O día da voda, a muller e o home prometen quererse, respectarse e valorarse un ó outro. Cando ambos cónxuxes se seguen amando, os dous poden ser moi felices (Prov. 5:18).

2. Cal é a situación de moitos matrimonios hoxe en día?

² Tristemente, moitos matrimonios da actualidade esquécense das promesas que fixeron o día da súa voda. Como resultado, non son felices. Un informe recente da Organización Mundial da Saúde indica que unha gran cantidade de maridos maltratan a súa muller física, verbal ou emocionalmente. Moitos dos que fan isto quizais dean a aparencia de ser amables coa súa muller cando están diante doutros, pero na casa maltrátana. Ademais, moitos ven pornografía, e iso tamén fai que a esposa se sinta pouco querida e infeliz.

3. Que factores poden contribuír a que un home maltrate a súa muller?

³ Que pode levar algúns homes a tratar mal a súa muller? Quizais foron criados nunha casa onde o pai era violento e por iso pensan que ese comportamento é normal. Outros están influenciados pola cultura que os rodea, que pode fomentar a idea equivocada de que “un home de verdade” debe usar a forza para demostrarlle á súa muller quen manda. Tamén hai homes ós que non se lles ensinou a controlar as súas emocións, entre elas a ira. E algúns teñen  o costume de ver pornografía, o que pode levalos a ter unha visión equivocada das mulleres e do sexo. Ademais, os informes indican que a pandemia da COVID-19 fixo que aumentasen estes problemas. Por suposto, ningún destes factores xustifica que un home maltrate a súa muller.

4. Contra que se deben protexer os maridos, e por que?

⁴ Os homes casados que serven a Xehová deben ter moito coidado de non ver as mulleres de forma equivocada. a Por que? Unha razón é que, a miúdo, un pensamento leva a unha acción. O apóstolo Paulo advertiu os cristiáns unxidos de Roma de que deixasen de adaptarse a este sistema (Rom. 12:1, 2). Cando Paulo lles escribiu ós romanos, a congregación xa se formara había uns anos. Aínda así, as palabras de Paulo dan a entender que algúns seguían sendo influenciados polos costumes e pola forma de pensar do mundo. Por iso os animou a cambiar a súa maneira de pensar e o seu comportamento. Está claro que este consello tamén lles aplica ós maridos cristiáns na actualidade. Por desgraza, algúns deixáronse influír pola actitude do mundo e incluso chegaron a maltratar a súa muller. b Pero, como espera Xehová que un home trate a súa muller? Encontramos a resposta no texto temático deste artigo.

5. Segundo 1 Pedro 3:7, como debe tratar o marido a súa muller?

⁵ Le 1 Pedro 3:7. Xehová pídelles ós homes que respecten a súa muller. Un marido que fai isto trátaa de maneira amable e cariñosa. Neste artigo imos analizar como os homes casados poden mostrarlle respecto á súa esposa. Pero primeiro imos analizar que comportamentos a deshonran.

REXEITA OS COMPORTAMENTOS QUE DESHONRAN A TÚA MULLER

6. Que pensa Xehová dun home que maltrata a súa muller fisicamente? (Colosenses 3:19).

⁶ Non a maltrates fisicamente. Xehová odia tódalas persoas que son violentas (Sal. 11:5). E odia especialmente os homes que maltratan a súa esposa (Mal. 2:16; le Colosenses 3:19). Segundo o texto temático de 1 Pedro 3:7, se un marido non trata ben a súa muller, danará a súa relación con Xehová. Incluso pode ser que Deus non escoite as súas oracións.

7. Segundo Efesios 4:31, 32, que tipo de fala teñen que evitar os maridos? (Mira tamén a “Idea importante”).

⁷ Non a maltrates verbalmente. c Algúns maridos maltratan a súa muller falándolle con agresividade e dicíndolle cousas que lle fan dano. Pero Xehová odia a “carraxe, ira, berros ou aldraxes” (le Efesios 4:31, 32). El escoita todo o que dicimos e preocúpalle a maneira na que un home lle fala á súa muller, incluso cando están sós. Un marido que se expresa de maneira brusca coa súa esposa non só dana o seu matrimonio, senón tamén a súa relación con Deus (Sant. 1:26).

8. Que opina Xehová da pornografía, e por que?

⁸ Non vexas pornografía. Que opina  Xehová da pornografía? El ódiaa. Así que, un marido que ve imaxes inmorais dana a súa relación con Xehová e estalle faltando ó respecto á súa muller. d Xehová espera que o marido se manteña leal á súa muller non só co que fai, senón tamén co que pensa. Xesús dixo que un home que mira con paixón outra muller que non é a súa xa cometeu adulterio “no seu corazón” (Mat. 5:28, 29). e

9. Por que odia Xehová que un home lle insista á súa muller en realizar prácticas sexuais que a fagan sentir degradada?

⁹ Non intentes que realice prácticas sexuais que a fagan sentir degradada. Algúns maridos insístenlle á súa muller para que participe en prácticas sexuais que a fan sentir sucia, maltratada ou pouco querida. Xehová odia esa actitude fría e egoísta. El espera que os esposos traten con amor e bondade a súa esposa, e que respecten os seus sentimentos e a súa conciencia (Ef. 5:28, 29). Que pode facer un home cristián se caeu nalgún dos comportamentos dos que falamos neste subtítulo? Que pode facer para cambiar a súa maneira de pensar e actuar?

COMO SUPERAR AS MALAS CONDUTAS

10. Como lles pode axudar ós maridos o exemplo de Xesús?

¹⁰ Que pode axudarlle a un home a superar a conduta abusiva ou degradante? Esforzarse por imitar a Xesús. Aínda que el nunca casou, a maneira na que tratou os seus discípulos é un modelo de como un home debe tratar a súa muller (Ef. 5:25). Vexamos, por exemplo, que poden aprender os maridos da forma na que Xesús tratou e lles falou ós seus apóstolos.

11. Como tratou Xesús os seus apóstolos?

¹¹ Xesús tratou os seus apóstolos con cariño e dignidade. Nunca foi brusco nin dominante. Aínda que el era o seu Señor e Mestre, non sentía a necesidade de deixar clara a súa autoridade demostrando o seu poder. Máis ben, serviunos con humildade (Xoán 13:12-17). El díxolles: “Aprendede de min, porque son apracible e humilde de corazón. Comigo encontraredes alivio” (Mat. 11:28-30). Fíxate en que Xesús foi apracible. Unha persoa apracible non é débil, máis ben ten a forza interior necesaria para controlarse a si mesma. Incluso cando a provocan, mantén a calma e controla a súas emocións.

12. Como lles falou Xesús a outros?

¹² Xesús usou as súas palabras para consolar e animar a outros. El non lles falou de maneira brusca ós seus seguidores (Luc. 8:47, 48). Incluso cando os seus inimigos o insultaban e intentaban provocalo, “non devolvía aldraxes [ou insultos]” (1 Ped. 2:21-23). Ás veces incluso preferiu quedar calado antes que contestar mal (Mat. 27:12-14). Que bo exemplo para os maridos cristiáns!

13. Segundo Mateo 19:4-6, como pode un marido “[unirse] á súa muller”? (Ver tamén a imaxe).

¹³ Xesús ensinoulles ós maridos a ser leais á súa esposa. El citou as palabras do seu Pai, que dixo que un home ten que “[unirse] á súa muller” (le Mateo 19:4-6). O verbo grego orixinal que aparece nesta pasaxe para unirse significa literalmente “adherirse”. Por iso, a unión entre un home e a súa muller debería ser tan forte que é coma se estivesen pegados un ó outro. Esta unión non se pode  romper sen que os dous sufran. Un marido que ten esta relación tan estreita coa súa esposa rechazará calquera forma de pornografía. Apartará inmediatamente a mirada de calquera cousa que non serve para nada (Sal. 119:37). De feito, coma Xob, está decidido a non mirar con paixón a outra muller que non sexa a súa (Xob 31:1).

14. Que pasos debe dar un marido que maltrata a súa muller para reparar a súa relación con ela e con Xehová?

¹⁴ Un home que maltrata física ou verbalmente a súa muller necesita dar diferentes pasos para reparar a súa relación con ela e con Xehová. Cales son? Primeiro, recoñecer que ten un problema serio. Non se lle pode esconder nada a Xehová (Sal. 44:22 [44:21, TNM]; Ecl. 12:13 [12:14, TNM]; Heb. 4:13). Segundo, deixar de maltratar a súa muller e cambiar o seu comportamento (Prov. 28:13). Terceiro, recoñecer que lle fixo moito dano á súa muller e a Xehová e pedirlles perdón ós dous sinceramente (Feit. 3:19). Tamén debe pedirlle a Xehová o desexo de cambiar e a axuda necesaria para controlar os seus pensamentos, as súas palabras e as súas accións (Sal. 51:12-14 [51:10-12, TNM]; 2 Cor. 10:5; Filip. 2:13). Cuarto, actuar de acordo coas súas oracións aprendendo a odiar calquera tipo de violencia e de maltrato verbal (Sal. 97:10). Quinto, buscar inmediatamente a axuda dos cariñosos anciáns da congregación (Sant. 5:14-16). Sexto, facer un plan que lle axude a evitar calquera destas malas condutas no futuro. Un home casado que ve pornografía tamén debe seguir estes mesmos pasos. Xehová bendicirá os esforzos que faga por cambiar o seu comportamento (Sal. 37:5). Pero non é suficiente que un marido deixe de facer cousas que lle fan dano á súa muller. Tamén ten que aprender a respectala. Como pode facelo?

COMO HONRAR A TÚA MULLER

15. Como pode un marido demostrarlle cariño á súa muller?

¹⁵ Demóstralle cariño. Algúns irmáns  que teñen un matrimonio moi feliz asegúranse de facer algo cada día para demostrarlle á súa muller canto a queren (1 Xoán 3:18). Un home pode demostrarlle á súa muller o seu amor con pequenas cousas, como colléndoa da man ou dándolle un abrazo. Tamén lle podería enviar unha mensaxe dicíndolle “Bótote de menos” ou preguntándolle “Que tal che vai o día?”. De vez en cando, quizais lle poida expresar o seu cariño escribíndolle unhas palabriñas ben escollidas nunha tarxeta. Cando un home fai estas cousas, honra a súa muller e fortalece o seu matrimonio.

16. Por que debería un home dicirlle á súa muller o que valora dela?

¹⁶ Exprésalle o valiosa que é para ti. Un home que honra a súa muller faille saber por que a aprecia e axúdalle a sentirse ben consigo mesma. Unha maneira de facelo é dándolle as grazas polo apoio que lle dá (Col. 3:15). Cando un home felicita con sinceridade a súa muller, alégralle o corazón. Tamén a fará sentir segura, querida e respectada (Prov. 31:28).

17. Como pode un home demostrar respecto pola súa muller?

¹⁷ Sé amable e respectuoso. Un home que ama a súa muller apréciaa moito. El considéraa un regalo de Xehová de tanto valor que non ten prezo (Prov. 18:22; 31:10). Como resultado, trátaa con amabilidade e respecto incluso nos aspectos máis íntimos e privados do seu matrimonio. Cando teñen relacións sexuais, non lle insiste en facer nada que a faga sentir incómoda, degradada ou que moleste a súa conciencia. f E el tamén ten que esforzarse ó máximo por manter a súa propia conciencia limpa ante Xehová (Feit. 24:16).

18. Que deben estar decididos a facer os maridos? (Ver tamén o recadro “ Catro formas de ser un marido respectuoso”).

¹⁸ Maridos, podedes estar seguros de que Xehová ponse contento cando ve que vos esforzades por honrar a vosa muller con todo o que dicides e facedes. Así que, decidídevos a honrala evitando calquera cousa que a poida ferir e sendo amables, respectuosos e cariñosos con ela. Desta maneira, demostrarédeslle que a amades e a valorades moito. Respectade a vosa muller e protexeredes a relación máis importante que tedes: a vosa amizade con Xehová (Sal. 25:14).