1, 2. Segundo Salmo 25:14, TNM, que temos que facer se queremos ter unha amizade estreita con Xehová?

 QUE calidades dirías que son importantes para manter unha boa amizade con alguén? É probable que penses que os bos amigos teñen que terse cariño e respecto. Posiblemente nunca dixeses que o temor é unha calidade importante para ter unha boa amizade. Pero, como di o texto temático deste artigo, para ter unha amizade estreita con Xehová temos que temelo (le Salmo 25:14, TNM).

² Sen importar canto tempo levemos servindo a Xehová, todos temos que demostrar que o tememos. Pero que significa temer a Deus? Como podemos aprender a facelo? E que podemos aprender de Abdías, Iehoiadá e Ioax sobre temer a Xehová?

3. Explica como nos pode protexer sentir temor.

³ Quizais sintamos temor se pensamos en algo que nos fai sufrir ou nos causa dano. Ese sentimento ata podería ser saudable, xa que pode protexernos e axudarnos a tomar boas decisións. Por exemplo, o temor a caer fai que non camiñemos cerca dun acantilado. Se estamos nunha situación perigosa, o medo pode facer que escapemos para que non nos pase  nada malo. E o temor a perder a amizade de alguén que queremos evitará que digamos ou fagamos algo pouco amoroso.

4. Que tipo de temor por Xehová quere o Demo que teñamos?

⁴ O Demo quere que sintamos por Xehová un tipo de temor que non é o correcto. A el gustaríalle facernos crer que Xehová é un deus vingativo, que quere castigarnos e que nunca poderemos compracelo (Xob 4:18, 19). Satanás desexa que lle teñamos tanto medo a Deus que deixemos de servilo. Para evitar esta trampa necesitamos aprender a temer a Xehová como el quere que o fagamos.

5. Que significa temer a Deus?

⁵ A persoa que sente un tipo de temor correcto por Deus ámao, e non quere facer nada que poida danar a súa relación con el. Xesús tivo ese tipo de “temor de Deus” (Heb. 5:7, TNM). Iso non significa que lle tivese medo, senón que o amaba tanto que non quería desobedecelo nunca (Is. 11:2, 3; Xn. 14:21, 31). Igual ca Xesús, nós tamén sentimos un profundo respecto e aprecio por Xehová porque é amoroso, xusto, sabio e poderoso. Tamén sabemos que Xehová nos quere moitísimo e que lle importa como reaccionamos ó que el nos ensina. Dependendo do que fagamos podemos entristecelo ou alegralo (Sal. 78:41; Pr. 27:11).

6. Cal é unha forma de aprender a temer a Deus? (Salmo 34:12 [34:11, TNM]).

⁶ Como non nacemos con temor a Xehová, temos que cultivalo (le Salmo 34:12 [34:11, TNM]). Unha forma de facelo é observando a creación. Canto máis reflexionemos nas “súas obras”, máis veremos a súa sabedoría e o seu poder. Tamén nos daremos conta de canto nos quere. Todo isto fará que o amemos e o respectemos cada vez máis (Rm. 1:20). Unha irmá chamada Adrienne dixo: “Ver a sabedoría de Xehová na creación impresióname e axúdame a darme conta de que el sabe o que é mellor para min”. Ó meditar, chegou á seguinte conclusión: “Non quero facer nada que poida danar a miña relación con Xehová, quen me deu a vida”. Podes sacar un momentiño esta semana para meditar en algo que crease Xehová? Se o fas, amaralo e respectaralo aínda máis (Sal. 111:2, 3).

7. Como nos axuda a oración a cultivar un temor apropiado por Xehová?

⁷ Outra maneira de cultivar un temor apropiado por Xehová é orándolle con regularidade. Canto máis lle oramos, máis real é Xehová para nós. Cada vez que lle pedimos que nos dea forzas para aguantar unha proba recordamos o seu inmenso poder. Cando lle damos grazas polo rescate grávase no noso corazón canto nos quere. E cando lle suplicamos que nos axude con algún problema vénnos á mente o sabio que é. Oracións coma estas axúdannos a respectar aínda máis a Xehová e fortalecen a nosa resolución de non facer nada que poña en perigo a nosa amizade con el.

8. Que podemos facer para manter o noso temor a Deus?

⁸ Podemos manter o noso temor a Deus se estudamos a Biblia co obxectivo de aprender, tanto dos bos coma dos malos exemplos que contén. Imos analizar o bo exemplo de dous servos fieis de Xehová. Primeiro o de Abdías, que estaba a cargo do palacio do rei Acab, e despois o do sumo sacerdote Iehoiadá. Tamén veremos o que podemos aprender do rei Ioax de Xudá, que empezou ben, pero co tempo deixou de servir a Xehová.

9. Como lle axudou a Abdías o temor a Xehová? (1 Reis 18:3, 12).

⁹ A primeira vez que a Biblia fala de Abdías di que este home temía a Xehová (le 1 Reis 18:3, 12). b Como lle axudou ese temor a Abdías? Por un lado, fixo que fose un home honesto e no que se podía confiar, por iso o rei o puxo a cargo do seu palacio (comparar con Nehemías 7:2). O temor a Xehová axudoulle a Abdías a ser moi valente. Esta calidade fíxolle moita falta porque viviu baixo o reinado do malvado rei Acab, quen “fixo o mal ós ollos do Señor, peor ca tódolos seus antecesores” (1 Re. 16:30). Ademais, a muller de Acab, Iezabel, adoraba a Baal. Esta muller odiaba tanto a Xehová que intentou acabar coa adoración verdadeira no reino de 10 tribos de Israel. Incluso chegou a matar a moitos profetas de Deus (1 Re. 18:4). Está claro que Abdías adorou a Xehová nunha época moi difícil.

10. Como demostrou Abdías que era moi valente?

¹⁰ Como demostrou Abdías que era moi valente? Cando Iezabel empezou a perseguir os profetas de Deus para matalos, Abdías colleu 100 deles, escondeunos en covas en grupos de 50 e levoulles “de comer e de beber” (1 Re. 18:13, 14). Se Iezabel soubese o que Abdías estaba facendo seguro que o mataba. Probablemente Abdías tiña medo e non quería morrer, pero amaba tanto a Xehová e os que o servían que os valorou máis que a súa propia vida.

11. Como imitan a Abdías algúns servos de Xehová da actualidade? (Ver tamén a imaxe).

¹¹ Hoxe en día, moitos servos de Xehová viven en lugares onde a nosa obra está prohibida. Estes irmáns respectan as autoridades dos países onde viven pero, igual que Abdías, danlle a Xehová a adoración exclusiva que el merece (Mt. 22:21). Demostran que temen a Deus obedecéndoo a el antes que ós homes (Feit. 5:29). Por iso, seguen predicando e reuníndose de forma discreta (Mt. 10:16, 28). Ademais, fan todo o posible  para asegurarse de que os seus irmáns teñan o alimento espiritual que necesitan e así poidan seguir achegándose a Xehová. Vexamos o exemplo de Henri, que vive nun país de África onde a nosa obra estivo prohibida por un tempo. Durante a prohibición, Henri ofreceuse para facerlles chegar publicacións bíblicas ós seus irmáns. El escribiu: “Son unha persoa tímida. Pero estou convencido de que o profundo respecto que sinto por Xehová me deu o valor que necesitaba”. Serías ti tan valente coma Henri? Podes selo se cultivas un temor apropiado por Xehová.

12. Como demostraron unha gran lealdade a Xehová o sumo sacerdote Iehoiadá e a súa muller?

¹² O sumo sacerdote Iehoiadá temía a Xehová, por iso foi leal a el e promoveu a adoración verdadeira. Isto quedou demostrado cando Atalía, a filla de Iezabel, se apoderou ilegalmente do reino de Xudá. A xente tiña bos motivos para terlle medo a Atalía. Esta muller era tan cruel e desexaba tanto ter poder que intentou matar toda a liñaxe real, incluso os seus propios netos! (2 Cró. 22:10, 11) Un destes neniños foi Ioax, que sobreviviu grazas a que Ioxeba, a muller de Iehoiadá o rescatou. Ela e o seu home esconderon o neno e coidaron del. Desta forma, aseguráronse de que alguén da liñaxe de David sobrevivise e puidese chegar a ser rei. Iehoiadá mantívose leal a Xehová e non deixou que o medo a Atalía lle impedise facer o correcto (Pr. 29:25).

13. Como volveu a demostrar Iehoiadá que era un home leal?

¹³ Cando Ioax tiña 7 anos, Iehoiadá volveu a demostrar a súa lealdade a Xehová. Ideou un plan. Se tiña éxito, Ioax chegaría a ser rei como lexítimo herdeiro de David. Pero, se fracasaba, probablemente Iehoiadá perdería a vida. Grazas á bendición de Xehová o plan tivo éxito. Coa axuda dos levitas e mais dos cabezas de familia de Israel, Iehoiadá fixo rei a Ioax e matou a Atalía (2 Cró. 23:1-5, 11, 12, 15; 24:1). Despois fixo un “pacto entre o Señor, o rei e mailo pobo, polo que este se obrigaba a facerse o pobo do Señor” (2 Re. 11:17). E ademais “puxo porteiros nas portas do templo para que non entrase absolutamente nada impuro” (2 Cró. 23:19).

14. De que formas recompensou Xehová a Iehoiadá?

¹⁴ Xehová dixera anteriormente: “Eu honro ós que me honran”. E, por suposto, recompensou a Iehoiadá (1 Sam. 2:30). Por exemplo, incluíu na Biblia a súa historia para que poidamos aprender dela (Rm. 15:4). E cando morreu déuselle o honor especial de ser enterrado “cos reis na Cidade de David, porque foi bo con Israel, con Deus e co seu templo” (2 Cró. 24:15, 16).

15. Que podemos aprender do exemplo de Iehoiadá? (Ver tamén a imaxe).

¹⁵ O exemplo de Iehoiadá pode axudarnos a cultivar amor por Deus. Os anciáns cristiáns poden imitalo manténdose alerta e buscando sempre maneiras de protexer a congregación (Feit. 20:28). Os irmáns maiores poden aprender de Iehoiadá que, cando temen a Xehová e lle son leais, el nunca os rechaza. Máis ben, pode utilizalos para cumprir o seu propósito. Os máis novos poden aprender moito de como Xehová tratou a Iehoiadá e imitalo tratando os irmáns maiores con dignidade e respecto, sobre todo a aqueles que levan moitos anos servindo fielmente a Deus (Pr. 16:31). E, por último, todos podemos aprender dos levitas e dos  cabezas de familia de Israel que apoiaron a Iehoiadá. Igual ca eles, nós tamén debemos obedecer e apoiar lealmente os irmáns que dirixen a congregación (Heb. 13:17).

16. Como demostrou o rei Ioax que non era valente?

¹⁶ Iehoiadá foi unha boa influencia para Ioax (2 Cró. 24:1, 2). Como resultado, este rei quixo agradarlle a Xehová. Pero, cando Iehoiadá morreu, Ioax empezou a escoitar os príncipes apóstatas de Xudá. Cal foi o resultado? El e os seus súbditos “deron culto ás estelas e ós ídolos” (2 Cró. 24:4, 17, 18). Aínda que isto entristeceu moito a Xehová, el “mandoulles profetas para convertelos, pero non fixeron caso”. Nin sequera escoitaron a Zacarías c, o fillo de Iehoiadá, que non só era profeta e sacerdote senón tamén primo de Ioax. De feito, Ioax matou a Zacarías, demostrando así que non sentía ningún aprecio pola familia que lle salvara a vida (2 Cró. 22:11; 24:19-22).

17. Como lle foron as cousas a Ioax?

¹⁷ Ioax non mantivo un temor apropiado por Xehová e por iso as cousas non lle foron ben. Xehová dixera: “Os que me desprezan veranse desprezados” (1 Sam. 2:30). O exército sirio, a pesar de que era pequeno, derrotou o “exército enorme” de Ioax e deixouno “gravemente ferido”. Despois de que os  sirios marchasen, Ioax foi asasinado polos seus propios servos por matar a Zacarías. Este rei foi tan malo que nin sequera o consideraron digno de ser enterrado “no panteón real” (2 Cró. 24:23-25). d

18. Segundo Xeremías 17:7, 8, como podemos evitar ser coma Ioax?

¹⁸ Que podemos aprender do mal exemplo de Ioax? Este rei foi coma unha árbore con raíces pouco profundas que necesita un puntal para manterse dereita. Cando ese puntal, é dicir, Iehoiadá, xa non estaba, Ioax empezou a escoitar os apóstatas e deixou de serlle fiel a Xehová. Esta comparación ensínanos que non deberiamos servir a Deus só porque a nosa familia ou outros irmáns da congregación o fagan. Para manternos cerca de Xehová temos que fortalecer o noso amor e respecto por el estudando a Biblia regularmente, meditando e orando (le Xeremías 17:7, 8; Col. 2:6, 7).

19. Que espera Xehová de nós?

¹⁹ Xehová non pide demasiado de nós. Eclesiastés 12:13, TNM resume moi ben o que el espera, cando di: “Teme o Deus verdadeiro e obedece os seus mandamentos, porque iso é todo o que o home debe facer”. Se tememos a Deus poderemos serlle leais sen importar o que pase no futuro, igual ca Abdías e Iehoiadá. Non haberá nada que poida danar a nosa amizade con Xehová.