Este ano as testemuñas de Xehová de todo o mundo esperaban con moitas ganas a presentación do episodio 1 da serie As boas noticias segundo Xesús. Xa o viron millóns de persoas e só é o primeiro dos 18 episodios! Pero, que está ocorrendo detrás das cámaras para que esta serie sexa posible? E como estás apoiando ti tamén este proxecto?

 A maioría das escenas da serie As boas noticias estanse gravando na sucursal de Australasia. Na gravación de cada unha destas escenas participan entre 50 e 80 persoas. a Hai que darlles o xantar, a cea e algún outro aperitivo tanto ós actores coma ó resto do equipo. Por iso é necesario planificar tódalas comidas con moita antelación. Esther, unha irmá que colabora co Departamento de alimentación, explica: “Comprámoslle a comida a distintos provedores, así obtemos ingredientes de calidade a bo prezo. Ademais, axustamos continuamente as receitas para asegurarnos de non desperdiciar comida”. Cada día gástanse uns 3,5 euros por persoa en comida.

 Os actores e o resto do equipo non só necesitan comida, tamén necesitan protexerse. Pero, protexerse de que? En Australia hai moitos días con sol e bo tempo, pero os niveis de radiación ultravioleta son moi altos. Para protexerse do sol e evitar un golpe de calor hai irmáns que se esforzan para habilitar zonas nas que a xente se poida refrescar. Nestes lugares sempre se aseguran de que haxa suficiente auga e tanto crema como paraugas para protexerse do sol. Kevin, que colabora con Servizos Audiovisuais, explica: “A maioría dos irmáns que axudan con estas tarefas son voluntarios externos de Betel. Fan estas e outras moitas cousas con humildade e alegría. Non poderiamos conseguilo sen eles”.

 Algunhas escenas non parecerían reais se se gravansen nun estudio ou nun escenario exterior dentro da sucursal. Nestes casos, grávase nalgunha localización fóra da sucursal. A miúdo, o equipo de gravación ten que desprazarse a zonas illadas para encontrar un sitio onde non haxa liñas eléctricas, camiños pavimentados ou edificios modernos e así poder gravar escenas bíblicas. Isto implica empaquetar, transportar e gardar de xeito seguro os traxes, os accesorios e os equipos no lugar onde se vai facer a gravación. Antes de comezar a gravar, os coordinadores de produción auxiliares teñen que asegurarse de que haxa xeradores, auga potable e aseos dispoñibles. Todo o persoal queda na casa de irmáns hospitalarios da zona, en remolques, hoteis ou cabanas.

 Gravar fóra da sucursal pode custar moitos cartos e consumir moito tempo e enerxías de tódolos que traballan no proxecto. Por iso, no 2023, o Consello Reitor aprobou a compra dun video wall que custou uns 2,2 millóns de euros, co cal se pode simular que se está noutro lugar. Esta tecnoloxía consegue, usando pantallas de alta resolución e iluminación sincronizada, que o vídeo pareza que se gravou no exterior. Como resultado, a miúdo podemos aforrar os cartos de gravar fóra da sucursal. Darren, membro do Comité de Sucursal de Australasia, explica: “Gravar con este sistema de vídeo reduce a fatiga dos actores e permite que o equipo poida repetir algunhas escenas. Por exemplo, se estivésemos gravando no exterior, só teriamos uns minutos para capturar a posta de sol antes de que desapareza. Pero con esta tecnoloxía, podemos crear unha posta de sol tantas veces como sexa necesario para conseguir a toma que necesitamos”.

 Necesítanse centos de actores e axudantes para gravar cada episodio da serie As boas noticias. Que pensan de todo o traballo que fan os irmáns para coidalos?

 Amber, que viaxou máis de setecentos quilómetros dende a súa casa en Melbourne para participar neste proxecto, escribiu: “Os irmáns de Betel coidáronme dende que cheguei ó aeroporto. Moitos betelitas invitáronme a comer ou a tomar un té. Cando gravabamos, todo o mundo era moi cariñoso, iso fixo que estivese moi cómoda. A miña viaxe estivo chea de bendicións, en ningún momento sentín que fose un sacrificio!”.

 Derek, que traballa co equipo de produción, di: “Moitos departamentos estiveron colaborando con nós dende o comezo. Agradezo moito que tantos irmáns usasen o seu tempo, os seus cartos e as súas enerxías neste proxecto. Son moi amables e sempre están dispostos para botar unha man. Sen dúbida Xehová bendiciunos. Estou convencido de que Xehová non só se preocupa polo resultado do traballo, senón tamén pola maneira como o facemos”.

 Moitas grazas por todo apoio que lle estades dando a esta serie. As vosas doazóns, incluídas aquelas que se fan a través de donate.pr418.com, fixeron que todo isto fose posible.