En marzo de 2020 a Organización Mundial da Saúde declarou a COVID-19 como unha pandemia. Poucos se imaxinaban que este virus seguiría afectando ó mundo enteiro un ano despois. Millóns de persoas, incluídas algunhas testemuñas de Xehová, sufriron os efectos físicos, emocionais e económicos da pandemia. Como se organizaron as testemuñas de Xehová para axudar ós seus irmáns durante esta crise?

 Baixo a supervisión do Comité de Coordinadores do Consello Reitor das Testemuñas de Xehová, formáronse máis de 950 Comités de Socorro por todo o mundo para facer fronte á COVID-19. Nalgúns casos os comités organizaron as labores de socorro a nivel local e noutros casos as testemuñas de Xehová beneficiáronse da axuda do goberno. Ademais, os Comités de Socorro organizaron a axuda a grande escala.

 Por exemplo, vexamos como é a situación en Paraguai. Un periódico di que por culpa dos problemas económicos causados pola pandemia moitos paraguaios non teñen o suficiente para comer. Pero o Comité de Socorro de Paraguai xa comezara a distribuír paquetes con comida suficiente, produtos de limpeza e artigos de hixiene persoal. Estes paquetes contiñan o necesario para unha familia de catro durante dúas semanas. Cada paquete custa uns 25 euros aproximadamente.

 Que fan os voluntarios para protexerse da COVID-19 e protexer os demais? Levan máscaras e manteñen a distancia de seguridade. Ademais, comproban que os provedores de alimentos traballen en lugares limpos e que sigan as estritas normas de seguridade. Isto inclúe que se aseguren de que tódolos que manipulan os paquetes levan posto o equipo de protección persoal, limpen e desinfecten os seus vehículos e almacenen os paquetes en lugares desinfectados. Por último, os que entregan os paquetes manteñen a distancia de seguridade axeitada cos irmáns que os reciben.

 En xaneiro de 2021, o Comité de Coordinadores aprobou empregar máis de 20 millóns de euros para axudar ós afectados pola COVID-19. As sucursais e os Comités de Socorro empregan con moito coidado os fondos doados e esfórzanse por obter o mellor prezo nos artigos necesarios. Por exemplo, en Chile os irmáns que organizan as labores de socorro querían comprar 750 quilogramos de lentellas. Pero o prezo das lentellas duplicouse en tan só un mes. Dúas horas despois de acordar mercar as lentellas ó prezo máis alto, o vendedor díxolles que outro comprador acababa de devolver o seu pedido de lentellas. Así que en vez de cobrarlles o prezo máis alto que acordaran, o vendedor vendeulles as lentellas devoltas polo prezo do mes anterior.

 Non obstante, cando os nosos irmáns foron recoller as lentellas, o vendedor quixo cancelar o acordo. Acusounos de distribuír a comida dun xeito inxusto, como facían outras organizacións. Despois de facer unha breve oración en silencio, un dos nosos irmáns díxolle ó vendedor que cada congregación fixera unha enquisa para saber quen precisaba axuda de verdade. Os irmáns tamén lle explicaron que ó facer os paquetes tiñan en conta as diferenzas culturais dos irmáns necesitados. Por iso, personalizábanse os paquetes e incluíanse os produtos que foran máis útiles para cada familia. Por último, aseguráronlle ó vendedor que tódalas doazóns que fan as testemuñas de Xehová, tanto de cartos como de traballo, son voluntarias. O vendedor quedou impresionado, e non só lles cobrou o prezo máis baixo senón que ademais fixo unha doazón de aproximadamente 400 quilogramos de lentellas que se incluíu no seguinte pedido dos irmáns.

 Lusu, unha irmá viúva e maior de Liberia, vive con cinco familiares. Unha mañá mentres almorzaban e analizaban o texto bíblico diario, o seu neto de sete anos notou que non quedaba máis comida na casa e preguntoulle: “Que imos comer?”. Lusu aseguroulle que fixera unha oración pedindo axuda e que confiaba en que Xehová lles daría o necesario. Esa mesma tarde, os anciáns da congregación chamaron a Lusu para que fora recoller algúns alimentos. Ela di: “O meu neto di que agora está seguro de que Xehová escoita e responde as nosas oracións porque viu como respondeu a miña”.

 Unha muller da República Democrática do Congo vive xusto ó lado dunha familia de testemuñas de Xehová. Despois de ver que esa familia recibía alimentos doutras testemuñas de Xehová, ela dixo: “Cando pase a pandemia imos facernos testemuñas de Xehová por que eles coidaron dos seus irmáns nestes momentos tan difíciles”. O seu home preguntoulle: “Vaste facer testemuña de Xehová só por unha bolsa de arroz?”. Ela respondeu: “Claro que non, pero esa bolsa de arroz é unha proba de amor de verdade”.

 Grazas as túas xenerosas doazóns, as testemuñas de Xehová puidemos axudar rapidamente ós nosos irmáns durante esta pandemia. Agradecemos moito as doazóns que fas a través dos diferentes métodos que atopamos en donate.pr418.com.