Neste artigo imos ver:

•  Que significa saír con alguén?

•  Estás preparado para saír con alguén?

 Algunhas persoas pensan que saír con alguén é simplemente unha diversión máis. En cambio, neste artigo, estámonos referindo ó tempo que pasa unha parella xunta para ver se son compatibles para o matrimonio. Así que, saír con alguén ten un propósito. Non é só unha maneira de recibir a atención dunha persoa do sexo oposto.

 Co tempo, saír con alguén debe levar a tomar unha decisión, ben sexa casar ou terminar coa relación. Cando empezas a saír con alguén, necesitas estar preparado para que pase unha destas cousas.

 En resumo: Se pensas que estás preparado para saír con alguén, tamén deberías pensar que estas preparado para casar.

 Xa que saír con alguén pode levar ó matrimonio, farías ben en pensar que calidades podes aportar ti á relación. Por exemplo, pensa no seguinte:

•   A relación cos familiares. Como tratas os teus pais e os teus irmáns, especialmente cando estás estresado? A maneira como o fagas pode indicar como vas tratar o teu cónxuxe.

   Principio bíblico: “Liberádevos de todo amargo rencor, furia, ira, gritos e palabras ferintes, e tamén de toda maldade” (Efesios 4:31, TNM).

   Pregúntate: “Poden dicir os meus pais e os meus irmáns que os trato con respecto? Canto teño algún desacordo con algún deles, son capaz de falar as cousas con calma ou, pola contra, enfádome e discuto?“.

•   O espírito de sacrificio. Cando estás casado, necesitas ter en conta as preferencias do teu home ou da túa muller e, a miúdo, poñelas por diante das túas.

   Principio bíblico: “Que ninguén busque o seu propio interese, senón o dos demais” (1 Corintios 10:24).

   Pregúntate: “Quero sempre que as cousas se fagan á miña maneira? Pensan outros que son unha persoa razoable? De que maneiras demostro que poño as necesidades doutros por diante das miñas?”.

•   A humildade: Un bo cónxuxe debería poder admitir os seus erros e pedir desculpas de maneira sincera.

   Principio bíblico: “Porque todos cometemos errores moitas veces” (Santiago 3:2, TNM, nota).

   Pregúntate: “Admito axiña os meus erros ou ando poñendo escusas? Enfádome ou oféndome cando alguén me dá un consello sobre algo no que debería mellorar?”.

•   Os cartos. Unha persoa que xestione os cartos con sentidiño evitará unha das principais fontes de problemas no matrimonio.

   Principio bíblico: “Pois ¿quen de vós, querendo construír unha torre, non se para a pensar no presuposto, a ver se a pode rematar?” (Lucas 14:28).

   Pregúntate: “Podo controlar os cartos que gasto ou teño habitualmente débedas? Como demostro que uso os cartos de maneira responsable?”.

•   A saúde espiritual. Como testemuña de Xehová deberías ter unha boa rutina de estudo da Biblia e tamén asistir con regularidade ás reunións.

   Principio bíblico: “Felices os que recoñecen as súas necesidades espirituais” (Mateo 5:3, TNM).

   Pregúntate: “Fago os esforzos necesarios para ter unha fe forte? É a miña rutina espiritual unha prioridade ou deixo que outras cousas interfiran nela?”.

 En resumo: A persoa coa que cases merece un bo cónxuxe. Por iso, se traballas duro por ser ese tipo de persoa, é máis probable que lle gustes a alguén que tamén se esforce por facer o mesmo.