Unha das situacións máis estresantes para un rapaz é o divorcio de seus pais. Se este é o teu caso, como podes facerlle fronte a eses momentos tan dolorosos?

Neste artigo imos ver:

•  Tres cousas que debes evitar

•  Tres cousas que debes facer

•  O que opinan outros mozos

 Tres cousas que debes evitar

 1. Pensar que ti tes a culpa

 “Miña nai díxome que tódolos problemas que tiña con meu pai comezaron cando eu nacín. Así que asumín que a eu era a razón pola que o matrimonio de meus pais fracasou” (Diana).

 Recorda isto: Teus pais non se están divorciando pola túa culpa, senón porque teñen problemas na súa relación. Ten en conta que ti non causaches esa situación e tampouco podes resolvela. Eles son os responsables de afrontar os seus problemas no matrimonio.

 2. Estar resentido

 “Estou moi enfadada con meu pai porque lle foi infiel á miña nai. Será moi difícil que volva a confiar nel outra vez” (Rianna).

 Recorda isto: Probablemente estás enfadado e frustrado polo que está pasando entre teus pais. É normal que te sintas así. Pero non é bo para ti estar resentido porque che pode facer dano física e emocionalmente. Por iso din que estar resentido é como tomar veleno e esperar que lle faga dano a outra persoa. a

 3. Pensar que ti tampouco terás un matrimonio feliz

 “Teño moito medo de facer o mesmo que fixo meu pai. Dáme medo casar, ter fillos e acabar divorciándome igual que meus pais” (Jessica).

 Recorda isto: Que o matrimonio dos teus pais fose un fracaso, non significa que ti vaias fracasar tamén. De feito, podes aprender moi boas leccións da súa experiencia. Por exemplo, agora podes fixarte mellor nas calidades da persoa coa que che gustaría casar. Ademais, o divorcio de teus pais pode motivarte a cultivar calidades que fagan de ti un mellor marido ou muller.

 Tres cousas que debes facer

 1. Falar do tema. A xente que non fala dos seus sentimentos negativos pode acabar facendo cousas que lle fagan dano, como por exemplo, abusar do alcohol ou das drogas. En lugar diso, por que non intentas o seguinte:

 Fala cos teus pais. Se algún dos teus pais, ou mesmo os dous, che falan moito dos seus problemas, dilles de forma calmada pero firme como che está afectando iso. Se para ti é moi difícil facelo en persoa, podes dicirllo nunha carta.

 Fala cun bo amigo. Ter alguén que simplemente te escoite pode ser de gran axuda e sentiraste moito mellor. A Biblia di que “o verdadeiro amigo ama en todo momento e é un irmán en tempos de angustia” (Proverbios 17:17, TNM).

 Fala co teu Creador. Xehová Deus, que é quen escoita as oracións, sempre vai querer escoitarte (Salmo 65:3 [65:2, TNM]). A Biblia di que podes contarlle a Deus tódalas túas preocupacións porque el se preocupa por ti (1 Pedro 5:7).

•   Con cal de teus pais podes falar de forma calmada e sen perder o control?

•   Que bo amigo, da túa idade ou máis maior, che podería axudar a afrontar esa situación tan difícil?

•   Que cousas poderías contarlle a Xehová en oración de forma específica?

 2. Adaptarte ós cambios

 Se teus pais se divorcian, quizais teñas que vivir nunha nova casa, ir a unha nova escola, ter outro nivel de vida ou mesmo facer novos amigos. É normal que te sintas frustrado, estresado ou penses que a túa vida está patas arriba. Que che pode axudar a levar mellor os cambios? Céntrate en como adaptarte ás novas circunstancias.

•   Cal é o cambio máis grande que tiveches que facer polo divorcio de teus pais?

•   Que podes facer para adaptarte a ese cambio?

 3. Pensar nas túas boas calidades

 Aínda que o divorcio dos teus pais pode causarche moita ansiedade, tamén che pode axudar a ver as túas boas calidades ou mesmo a cultivar outras novas. Jeremy tiña 13 anos cando seus pais se divorciaron, el conta: “O divorcio fixo que fose máis responsable. Eu era o irmán maior, así que tiven que axudar á miña nai e tamén ó meu irmán”.

•   Nesta situación, que novas calidades ou habilidades descubriches?

•   En que outras cousas che gustaría mellorar?