Nun vasto territorio que ocupa parte de Finlandia, Noruega e Suecia viven os saamis, un pobo con cultura, tradicións e lingua enxebres. Recentemente as testemuñas de Xehová levamos a cabo dúas iniciativas para compartir cos saamis a mensaxe da Biblia.

En primeiro lugar, no outono de 2015, as testemuñas de Xehová comezamos a traducir algunhas das nosas publicacións e vídeos á lingua saami. a En segundo lugar, fixemos dúas campañas especiais, en 2016 e 2017, para distribuír estas publicacións e vídeos. Nestas campañas percorremos a Laponia, unha enorme rexión pola que vagan os renos.

Durante a campaña especial en maio de 2017, máis de 200 testemuñas de Xehová de Finlandia, Noruega e Suecia participaron como voluntarios para visitar as numerosas aldeas espalladas ó longo de miles de quilómetros cadrados da Laponia. Algunhas aprenderan expresións na lingua saami e isto impresionoulles ás persoas desta fala. Denis, un dos voluntarios que visitou a localidade de Karigasniemi, dixo: “A xente decatouse do noso interese sincero e agradeceu o noso esforzo por falar a súa lingua”.

Como os saamis aprecian moito a natureza, chamoulles especialmente a atención a promesa que dá a Biblia de que a terra será un paraíso (Salmo 37:11). Por exemplo, cando unha muller saami comezou un curso da Biblia co folleto Deus ten boas noticias! e aprendeu o que Deus fará pola humanidade, preguntouse por que o seu ministro relixioso nunca lle falara do paraíso na terra.

Moitos deron as grazas polas visitas que recibiron. Un tendeiro, que observou dúas testemuñas de Xehová, felicitounas e díxolles que facían un labor importante e moi valioso para a comunidade. Convidounas a pasar pola súa tenda e coller a comida que precisasen, e insistiulles para que a levasen de balde.

Durante a campaña, os saami viron arredor de 180 vídeos e aceptaron máis de 500 publicacións. A miúdo pedían tódalas publicacións dispoñibles no seu idioma. Catorce persoas de fala saami comezaron un curso da Biblia.

Algúns dos saamis que leron as nosas publicacións apreciaron a alta calidade da tradución. Nilla Tapiola, mestre de primaria e membro do Consello Executivo do Parlamento Saami comentou: “As vosas publicacións están moi ben traducidas.” Explicou que “son fáciles de ler e teñen un bo nivel lingüístico.” Un saami que vive no punto máis setentrional de Finlandia tamén dixo: “Sen dúbida é un traballo moi profesional.”

En Karigasniemi, na fronteira entre Finlandia e Noruega, as testemuñas de Xehová analizaron cunha profesora a primeira lección do folleto Deus ten boas noticias! A mestra quedou abraiada pola calidade da tradución e pediulles permiso ás Testemuñas de Xehová para empregar o folleto na escola ó ensinar a lingua saami.

Xa están traducidos á lingua saami varios vídeos, varias folliñas e un folleto. O sitio web jw.org apareceu neste idioma o 29 de febreiro de 2016. Esta páxina recibe unhas 400 visitas cada mes de falantes da lingua saami quen descargan uns 350 arquivos dixitais, de son e de vídeo.

Tanto os saamis coma quen os visitaron beneficiáronse desta campaña. Os primeiros “puideron comprobar que a Biblia dá consellos prácticos”, din Henrick e Hilja Maria, que percorreron Utsjoki. Lauri e Inga, quen tamén estiveron en Utsjoki, engaden: “Esta campaña ensínanos que Deus é imparcial. Sentímonos moi felices de amosar o Seu amor nestes sitios tan afastados.”