1909 hea vorsa thaun Jehovachea Sakxeanchi mukhel xakha New York-achea Brooklyn xarant asli. July 2009-ant, tannim hi xakha thoinchean ut’tor bhagant vhoronk tharailem. Ho 102 hector mhunnttlear 10 lakh 20 hozar metracho zago Brooklyn-ant aslolea mukhel xakhe thaun sumar 80 kilometr pois asa.

Hea zagear, ek ofisak lagon, ek her kamam korunk lagon ani char, ravonk lagon bilddingo bandhpacheo tharailea. Thoim sumar 800 Sakxi ravtole ani kam kortole. Jehovachea Sakxeanim hanga ek miuziom bandhpacho tharaila. Tantunt, aichea disamnim kelolea tanchea kamam vixim zannam zaunk mellttolem.

Sorvbhonvtonnim borim zaddam aslolean thoimchi sobitkai samballun dovrunk lagon fokot 18 hector zago hem soglem bandhpak uzar kortole ani her zaddam toxinch dovortole.

Arkitekttanim hi xakha oxea toren bandpachi tharailea jea udexim bhonvtonnchea hovamanak kainch luksonn zaunchem na ani bilddingechi dekh-rekh korunk chodd khorchui ascho na.

Udharonnak, tannim bilddingecher zaddam rovpachem tharailem. Hea zaddanchi chodd kallji gheunchi poddona ani vorsui bhor tim jivim urtat. Oslim zaddam roilolean, pausachem soglem udok vhavon voichem na ani bilddingent chodd gormi vo thonddi lagchi na. Ofisam-i, suriacho uzvadd ieta tea toren bandpachim tharaileam. Ani udok vachounk lagon sogleant poili toiari keloli asa.

Jehovachea Sakxeanchi mukhel xakha Brooklyn xarantlean dusrea zagear vhorpachi kiteak tharaili? Adim Bible ani Bible-acher adarit masikam fokot Brooklyn-antle xakhent chhaptalim. Punn atam dusrea zaitea desamnim noveo xakha bandleat ani tea-ui xakhanim chhapnnechem kam zata. United States-ant choltalem tem chhapnnechem, ani prokaxonam dusrea zagear dhaddpachem kam 2004 hea vorsa, Wallkill, New York-ant chalu kelem. Ho zago Brooklyn-a thaun sumar 145 kilo metr pois asa.

Jehovachea Sakxeanchi mukhel xakha Brooklyn xarantlean dusrea zagear vhoronk anink ek karonn aslem. Brooklyn-ant xakha veg-vegllea bilddingenim asli ani taka lagon tachi kallji gheunk ani ticho samball korunk khub khorch zatalo. Punn atam, soglem ekuch zagear aslolean khorch unno zata ani urta te poixe porgottnnechem kam fuddem vhoronk uzar korunk zata.

Xakhechea kamank lagon bhonvtonnchea vatavoronnacher kosloch vaitt porinnam zauncho na mhunn khatri kelea uprant, sorkari odhikaream koddlean pormitt mellttolem. Hem pormitt mell’llea uprant, 2013 thaun bandhkam chalu kortole ani char vorsam bhitor xakha bandhun zatoli.

Wallkill, New York-ant aslolea chhapnnechea kamam sangata, Patterson xarant, Bible xikounk lagon Jehovachea Sakxeancho ek mukhel zago-i asa. Toxench zaitea desamnim hea sogottnnecheo xakha-i asat. Ani sonvsarbhor, ponchat’tor lakham poros chodd Sakxi asat.