Jehovachea Sakxeam koddlean Braille lipint Bible magtana, tumchea ghorant tumkam thoddo zago korcho poddttolo. Ho ak’kho New World Translation Bible, Inglez, Spanish, Portuguese ani Italian Braille lipint toiar kelolo asa. Ho Bible 18 tem 28 pustokacho asonk xokta. Ani to dovrunk 6 futt poros chodd lambaicho zago zai.

Dusre formett, matxi unni suat gheunk xoktat. Dixtt naslolea lokank lagon ek lhan mexin toiar kelolem asa ani tem tanchean aplea borabor khoim-ui gheun vochonk zata. Hea mexinak Braille nott ttekor mhunnttat. Taka tonkam asat ani tacher mahiti ttaip korun ti kednam-i uzar korunk zata. Dixtt naslolea lokank skrin riddor-achea modotin prokaxonam aikonk mellttat. Ho skrin riddor, boroilolim utram vachun dakhoita.

Hachea bhair Jehovachea Sakxeanim anik ek komputer program toiar kela, zo zaiteo bhaso Braille lipint borounk xokta. Dor eka letrak braille letr toiar zatoch, ho program, utram braille bhaxent bodlunk xokta. Ho program, prokaxonam oxea ritin formett korta, jea udexim dixtt naslolea munxak vachunk sompem zata. Hea programa vorvim Braille letram asat tea khoinchea-i bhaxent, Braille Bible ani her prokaxonam toiar korunk zata. Inglez vo Romi lipi vapurnant tea bhaxent poriant Braille prokaxonam toiar korunk zata.

Dixtt naslolea lokank Braille bhaxent prokaxonam toiar korunk laglear atam Sakxeank 100 vorsam maiz zatolim. Aiz him Braille prokaxonam 19 bhaxent vachunk mellttat. Khoinchea-i dixtt naslolea munxan him prokaxonam mol farik kori nastanam vachunk zata. Punn thoddim zannam hea prokaxonam pasot khuxen denngim ditat.

Adim Jehovachea Sakxeanchea odhivexona vellar novim prokaxonam bhair sortalim tednam, Braille prokaxonam magir magonk zata mhunn lokank kolloitale. Fattlea vorsa United States xakhen ek sorve kelo. Tea desant dixtt naslole lok khoimchea odhivexonak vochonk sodtat ani te kosli Braille formett (Braille lipint pustok, Braille nott ttekor, elekttronik skrin riddor) uzar kortat hi mahiti sobhe koddlean xakhen magon ghetli.

Dixtt naslole lok jea odhivexonank vochpache asle, titlea-i zageancher Braille lipint novim prokaxonam dhaddlim. Taka lagon dixtt naslolea lokankui her lokam borabor novim prokaxonam mell’llim. Hea prokaxonanchem elekttronik formett odhivexonachea eka sumana uprant dor eka dixtt naslolea munxak e-mail korun dhaddlem.

Eka dixtt naslolea Sakxean mhunnttlem, “Soglea lokam borabor hem prokaxon mell’llem mhunn kitlem borem aslem. Stotr 37:4 mhunntta ki amchem kalliz axeta titlem-i Jehova amkam ditolo. Ani Jehovan toxench kelem.” Eka dusrea Sakxean roddon mhunnttlem, “Tannim mhojea vixim chintlem. Hanv Jehovachom chodd upkari kiteak to amchi kallji gheta.”