Julai 2011 thaun sompea bhaxen boroilolem Inglez Watchtower masik chhapunk suru kelem. Hem masik fokot ek voros uzar korun pollounk toiar kelolem. Eka vorsa uprant hem masik uzar korun lokank boreak poddtta tem polloun, hem masik chaluch dovorchem mhunn tharailem.

Janer 2013 thaun hem sompem Watchtower masik, French, Portuguese ani Spanish bhaxent mellttolem.

Thoddea lokank Inglez bhas bori somzona punn tim Inglez sobhent voitat. Taka lagon hem masik sompea bhaxen toiar kelolem asa.

Poilem sompea bhaxen Watchtower masik bhair sorlea uprant, tem somzonk boreak poddtta mhunn lokam koddlean zaiteo boreo chitteo aileo. Ek chitt Liberia desantlea Rebecca nanvachea baile koddlean aili. Hi 64 vorsanchi bail kednanch iskolak vochonk nasli. Tinnem boroilem, “Hanv vachunk xiktam. Thodde pautt hanv Watchtower masik vachtalem punn mhaka somzonaslem. Atam hem sompem masik mhaka somzota ani tem vachunk mhaka khub borem dista.”

Jehovachea Sakxeanchea eka mittingent Watchtower-achea adaran Bible xikounn melltta. Zaite avoi-bapui sompea bhaxen boroilolem hem Watchtower uzar korun aplea bhurgeam borabor hea mittingechi toiari kortat.

Rosemaryk tin nati asleo. Ti boroita, “Mhojea natink Watchtower xikoitana mhaka tras poddttale. Ami zaite pautti veg-vegllea utrancho orth sodtalim. Oxem korunk khub vell voitalo. Taka lagon Watchtower masikant jem gorjechem asa tem bhurgeank somzonaslem. Punn atam ami amcho vell Bible-achea vachpancher niall korunk ani tim vachpam koxim Watchtower-achea vixoiak lagu zata tem somzonk uzar kortat.”