Korintkarank Poili Chitt 11:1-34
11 Hanv Kristachi dekh gheun choltam toso, tumi mhoji dekh gheiat.
2 Tumi soglea vostumnim mhozo ugddas kortat ani hanvem xikoilam tem bariksannen pallttat dekhun hanv tumkam xabaski ditam.
3 Punn dor eka dadleacho mukheli* Krist, bailecho mukheli dadlo ani Kristacho mukheli Dev, hem tumi zannam zalʼlim mhaka zai.
4 Dor ek dadlo zo aplem mathem dhampun magnnem vo bhasaunni korta to aplea mukheleacho opman korta.
5 Punn dor ek bail ji aplem mathem dhampinastana magnnem vo bhasaunni korta ti aplea mukheleacho opman korta, karonn ti kens taslolea baile bhaxen zaun asa.
6 Karonn ek bail aplem mathem dhampina zalear tinnem aple kens katorche. Punn eke bailek aple kens katrunk vo tasunk loz dista zalear tinnem aplem mathem dhampchem.
7 Dadlean aplem mathem dhampchem nhoi, karonn taka Devachea rupan rochla ani to Devachi mhoima zaun asa, punn bail dadleachi mhoima zaun asa.
8 Karonn dadlo baile thaun ieunk na, punn bail dadlea thaun ailea.
9 Titlench nhoi, dadleak baile pasot nhoi, punn bailek dadlea pasot rochloli.
10 Teach pasot, apunn dadleachea odhikarak khalti asa mhunn dakhounk bailechea mathear devdutank lagon khunna asonk zai.
11 Tori astana, Somiache manddavollint bail dadlea poros veglli na ani dadlo baile poros vegllo na.
12 Karonn zoxi bail dadlea thaun asa, toxench dadlo-i baile udexim asa, punn sogleo vostu Deva thaun asat.
13 Tuminch tharaiat: Eke bailen aplem mathem dhampinastana magnnem korop sarkem kai?
14 Eka dadleache kens lamb asop tachea pasot opmanachem mhunn soimb pasun xikoina kai?
15 Punn eke bailek lamb kens asat zalear te kens tichi sobitkai. Karonn he kens tika tichem mathem dhampunk dileat.
16 Punn, zor konnui dusreo riti-rivazo pallunk vad-vivad korta zalear tannem hem zannam zaunchem ki amchea modem ani Devache sobhe modem anik kosleoch riti-rivazo nant.
17 Punn, heo suchounneo ditana hanv tumkam xabaski dina, karonn tumi ektthaim zatat tednam borem zaunchea suvater vaitt zata.
18 Sogleant poilim mhunnttlear, sobhent tumi ektthaim ietat tednam tumchea modem futt asta oxem hanvem aikolam, ani tantuntlem thoddem tori khorem asa mhunn hanv mantam.
19 Karonn tumchea modem veg-veglle zome* pasun astolech, punn hantuntlean Dev konnank maniotai dita hem spoxtt dison ietolem.
20 Tumi Somiachea Sanjechea Jevnnak eka zagear ektthaim ietat tednam, khorem mhunnttlear, tumi jevonn jevunk ektthaim ienant.
21 Karonn sanjechea jevnna poilim tumchea modle thodde poilinch jevonn jevlole astat. Taka lagon, thodde upaxim urtat, tor dusre pieun bebde zatat.
22 Tumkam khaunk-pieunk tumchim ghoram nant kai? Vo tumi Devachi sobha mhotvachi na mhunn somzotat kai, ani zanchea lagim kainch na tankam lojent ghaltat kai? Atam hanv kitem mhunnom? Hanv tumkam xabaski dium? Hea vixim hanv tumkam xabaski dina.
23 Khorem mhunnttlear, Somian mhaka sanglolem tench hanvem tumkam xikoilem. Jea ratik Somi Jezuk dhorun diunche asle, tea ratik tannem unddo ghetlo,
24 ani magnneant Devache upkar attoilea uprant, to moddlo ani mhunnttlem: “Ho mhojea kuddik suchit korta, ji tumchea pasot bhettounchi asa. Mhozo ugddas korun oxench korit ravat.”
25 Teach bhaxen sanjechem jevonn zalea uprant, tannem pelo gheun oxench kelem ani mhunnttlem: “Ho pelo novea korarak suchit korta zo mhojea rogta udexim stapon kela. Tumi hantuntlean pietat tednam mhozo ugddas korun oxench korit ravat.”
26 Karonn Somi ieta tea meren, tumi ho unddo khatat ani hea peleantlem pietat tednam tumi tachea mornna vixim porgott kortat.
27 Taka lagon, zo konn purto nastana ho unddo khata vo Somiachea peleantlem pieta to Somiachea kuddichea ani rogtachea babtint guneanvkari zata.
28 Dor eklean poilinch svotachi porikxa korun apunn purto asa kai na hem tharaunchem, ani tea uprant tannem to unddo khauncho ani tea peleantlem pieunchem.
29 Karonn Somiachi kudd kiteak suchit korta, hem somzon ghenastana zo khata ani pieta, to svotacher khast voddun gheta.
30 Takach lagon, tumchea modem zaite lok oskot ani duent asat, ani zaite mornnachea nhident nhidleat.*
31 Punn ami purtim asat kai na, hea vixim ami amchich porikxa keli zalear amkam guneanvkari tharaunchenant.
32 Amkam guneanvkari mhunn tharaitat tednam Jehova* koddlean amkam xist melltta, jea udexim amkam sonvsara sangata khast favo zaunchina.
33 Taka lagon, mhojea bhav-bhoinnimno, tumi jevnnak ektthaim ietat tednam, eka-mekachi vatt polloiat.
34 Konnankui bhuk laglea zalear tannem ghora khaunchem. Hea udexim tumi ektthaim ietat tednam tumchi zhoddtti zaunchina. Urlole prosn hanv thoim ailea uprant soddoitolom.
Footnotes
^ Hea utrak uzar kelolea Grik utracho orth mostokui zata ani hea akʼkhea odheai-ant he donui orth lagu zatat.
^ Hem khorea mornnak nhoi punn tancho Deva borabor tuttla tea sombondak suchit korta.
