Korintkarank Poili Chitt 15:1-58
15 Bhav-bhoinnimno, atam hanv tumkam tea bore khobre vixim ugddas korun ditam, ji hanvem tumkam sangloli, ji tumi manun ghetloli ani zachea vatten tumi atam meren thir ubim asat.
2 Hanvem sangloli bori khobor tumi ghott dhorun ravlim zalear tumi salvar zatolim, na zalear tumi bhavarth dovrun kainch faido na.
3 Karonn jeo vostu mhaka xikoilʼleo ani jem hanvem tumkam xikoilem tantunt sogleant mhotvachem mhunnttlear, Devachea Utrant boroilam toxem, Krist amchea patkam pasot melo,
4 ani taka purlo, ani Devachea Utrant boroilʼlem asa toxem tisrea disa Devan taka jivont kelo.
5 To Kefasak,* ani uprant Bara zannank* dixtti poddlo.
6 Tea uprant, to ekach vellar 500 poros chodd xisank* dixtti poddlo. Tantuntle zaite aiz pasun amchea sangata asat, punn thodde moron geleat.*
7 Magir to Jakobak dixtti poddlo, ani tea uprant soglea apostlank.
8 Xevottak to mhaka pasun dixtti poddlo. Mhaka-i, zo zolm zaunchea vella poilinch zolmolʼlea bhurgea sarko aslom.
9 Hanv apostlam modem kainch mhotv naslolom, ani ek apostl mhunnonk pasun hanv purto na, karonn hanvem Devache sobhek dhumallo dila.
10 Punn aiz, hanv zo konn asam to Devachea favo naslolea doiek lagon, ani mhojea pasot tachi favo nasloli doia kainch upeogachi na oxem zaunk na, karonn hanvem dusream poros chodd vavr kelo. Tori astana, hem mhaka lagon nhoi punn mhojer aslolea Devachea favo naslolea doiek lagon zalem.
11 Punn, hanv zaum vo dusre apostl zaum, ami sogle ekuch sondex porgott kortat, ani tumi teach sondexacher visvas dovorla.
12 Atam Kristak meloleantlo jivont kelo mhunn ami porgott kortat zalear, tumchea modle thodde melole jivont zaunchenant oxem koxem mhunnonk xoktat?
13 Melole jivont zaunchenant zalear Kristak pasun meloleantlo jivont korunk na.
14 Punn Kristak meloleantlo jivont korunk na zalear ami porgott korop kainch upeogachem na, ani tumcho bhavarth pasun kainch upeogacho na.
15 Itlench nhoi, Devan Kristak jivont kela mhunn sangon ami Deva vixim khotti govai ditat oxem zalem, karonn meloleank jivont korchenant tem khorem zalear Devan Kristak pasun jivont korunk na oxem zalem.
16 Karonn zor meloleank jivont korchenant, tor Kristakui jivont korunk na.
17 Ani Kristak jivont korunk na zalear, tumcho bhavarth kainch upeogacho nhoi ani tumi azunui tumchea patkantuch asat.
18 Ani mornnache nhident asat tea Kristachea xisancho pasun purnn toren nas zala.
19 Ami fokot heach jivita pasot Kristacher bhorvonso dovorla zalear, amchem sogleam poros chodd churchurem korunk zai.
20 Punn khorem mhunnttlear, Kristak meloleantlo jivont kela, ani mornnache nhident asat tanchea modlo to poilem foll zaun asa.
21 Eka munxa udexim moronn ailem, taka lagon eka munxa udexinch meloleank jivont kortole.
22 Zoxem Adanvak lagon soglim mortat, toxench Krista udexim sogleank jivont kortole.
23 Punn dor eklo sarke manddavollin: poilo Krist, zo poilem foll zaun asa, tea uprant, Krist hajir asa* tea vellar je Kristache asat tankam jivont kortole.
24 Uprant xevottak, to soglea sorkarank, odhikareank ani podveank kabar korun uddoitolo tednam to aplea Devachea ani Bapachea hatant Raj ditolo.
25 Karonn jea meren Dev soglea dusmanak tachea paim-am ponda ghalina, tea meren tannem raza mhunnon raz korop gorjechem.
26 Ani nimanno dusman, zacho nas zatolo to mhunnttlear, moronn.
27 Karonn Devan “sogleo vostu tachea adhin korun tachea paim-am ponda dovorleo.” ‘Sogleo vostu adhin korun,’ oxem to mhunntta, tachea voilean kollon ieta ki jea Devan sogleo vostu tachea adhin keleat to svota tachea adhin na.
28 Punn sogleo vostu Putachea adhin kelea uprant, zannem sogleo vostu tachea adhin kel’leo, taka Put apunnui adhin zatolo. Hea toren Devuch sogleam pasot soglem zatolo.
29 Tor, mornna pasot bautizm ghetat tanchem kitem zatolem? Meloleank jivont korchenant zalear, te mornna pasot bautizm kiteak ghetat?
30 Ami pasun soglea vellar amcho jiv dhokeant kiteak ghaltat?
31 Bhav-bhoinnimno, tumi Somi Jezu Kristachi patlavdar zal’lean mhaka tumcher gorv bhogta, hem jitlem khorem asa titlench hanv dor disa mornnacho fuddo kortam tem-ui khorem asa.
32 Dusrea munxam sarko,* hanv pasun Efezant ranvotti zonvaram lagim zhuzlom zalear mhaka kitem faido? Meloleank jivont korchenant zalear, “ieiat, ami khaum-ia ani pieum-ia, karonn faleam tor moronkuch zai.”
33 Fosonakat. Vaitt sangateank lagon boreo sonvoim-o* piddʼddear zatat.
34 Borim kamam korunk lagon sintidant ieiat ani patok korit ravonakat, karonn thoddea lokank Deva vixim kainch ginean na. Hanv tumkam loz disonk zai mhunn oxem mhunnttam.
35 Punn, konnui mhunnot: “Meloleank koxe jivont kortole? Te koslea torechea kuddin jivont zatole?”
36 Are murkh munxa! Tum jem vompta tem jea meren morona, tea meren taka jivit mellona.
37 Tum vompta tem kirlolʼlem zhadd nhoi, punn ek bi asta, magir ti gonvachi bi zaum vo anik kosli-i bi zaum.
38 Punn Devak zoxem sarkem dista toxem to tea biek vaddoita, ani ti dor ek bi zhadd zata tednam tem zhadd dusrea zhaddam poros vegllem asta.
39 Sogleoch kuddi ek-sarkeo asonant, munxachi kudd veglli asta, ani zonvaranchi kudd veglli, suknneachi kudd veglli asta, ani nusteachi kudd veglli.
40 Je sorgar asat tanchi kudd prithumer ravtoleam poros veglli asa, je sorgar asat tanchea kuddichi sobitkai eka torechi asta, ani je prithumer ravtat tanchea kuddichi sobitkai dusrea torechi asta.
41 Suriacho porzoll ek torecho asta, ani chondracho porzoll dusrea torecho asta, ani noketrancho porzoll anik ek torecho asta. Khorem mhunnttlear, eka noketracho porzoll dusrea noketrachea porzolla poros vegllo asta.
42 Meloleank pasun heach toren jivont kortat. Kusta tosli kudd purtat,* punn kusona tosle kuddin jivont kortat.
43 Ti kudd opmanan purtat,* ani mhoimen jivont kortat. Tika oskot poristhitint purtat, ani xoktivont poristhitint jivont kortat.
44 Hadda-masachi kudd purtat, ani disona tosli kudd jivont kortat. Zoxi hadda-masachi kudd asta, toxich disona tosli kudd asta.
45 Oxem boroilʼlem asa: “Poilo munis Adanv jivo munis zalo.” Punn nimanno Adanv jivit diupi, disona toslo pranni zalo.
46 Punn, poili kudd disona tosli nhoi. Poili, hadda-masachi kudd asa ani uprant disona tosli kudd asa.
47 Poilo munis prithume voilo aslo ani taka dhul’li thaun rochlolo, ani dusro sorgar thaun asa.
48 Hea sonvsarantle lok Devan zaka dhulʼli thaun rochlo, tachea sarke asat, ani sorgar asat te sorgar thaun aila tachea sarke asat.
49 Jea toren ami, dhul’li thaun rochla tachea rupan asat, teach toren ami, sorgar thaun aila tachea rupan astolim.
50 Punn bhav-bhoinnimno, hanv tumkam sangtam ki mas ani rogot Devachea Rajeache daiji zaunk xokona, zoxi ji kudd kusta ti kusona tosli kudd daiz mhunn melloun gheunk xokona.
51 Polloiat! Hanv tumkam ek povitr gutt sangtam: Ami soglim mornnachea nhident nhidchimnant, punn ami soglim bodoltolim.
52 Nimanni turturi vazoitat teach ghoddie, mhunnche dolle bond korun ukte kortat mhunnttlear, ami bodoltolim. Turturi vazta tea vellar, meloleank kusona toslea kuddin jivont kortole ani ami bodoltolim.
53 Karonn hi kuson voita tosli kudd kusona tosli zaunk zai, ani hi moron voita ti kudd morona tosli zaunk zai.
54 Jednam kusta tem kusona toslem zata ani morta tem morona toslem zata, tednam Devachea Utrant boroilʼlem asa, tem purnn zata: “Mornnak sasnak gillun uddoilem.”
55 “Are mornna, tujem zoit khoim asa? Are mornna, tujem kuns khoim asa?”
56 Patok ek kuns zaun asa jem moronn haddtta, ani patkak xokti diupi Kaido zaun asa.*
57 Punn Devache upkar, karonn to amcho Somi Jezu Krista udexim amkam zoit dita!
58 Taka lagon, mhojea mogall bhav-bhoinnimno, ghott ravat, thir ravat ani Somiachea sevent tumchea lagim sodanch khub kam asum, karonn Somiachea sevent tumi kelʼlo vavr funkott voichona mhunn tumi zannant.
Footnotes
^ Haka Pedru pasun mhunnttale.
^ Mhunnche, 12 apostl.
^ Utran utor, “bhavank.” Thodde pavtti Bible-ant ‘bhavank’ hem utor dadleank toxench bailank pasun lagu zata tea toren uzar kelam.
^ Utran utor, “thodde mornnachea nhident nhidleat.”
^ Vo ghoddie, “munxanchea nodren.”
^ Vo “bore noitik dorje.”
^ Utran utor, “vomptat.”
^ Utran utor, “vomptat.”
^ Vo “ani Kaide patkak xokti ditat.”
